ދިވެހި ވަތަނީ ހިދުމަތުގެ ފުރަތަމަ ބުރުން 344 ދަރިވަރުން ދަސްވެނިވެއްޖެ

Read Time:4 Minute, 41 Second

ދިވެހި ވަތަނީ ހިދުމަތް (ނޭޝަނަލް ސާވިސް ޕްރޮގްރާމް) ގެ ފުރަތަމަ ބުރުގައި ބައިވެރިވި ދަރިވަރުންގެ ތެރެއިން 344 ދަރިވަރުން މިއަދު ދަސްވެނިވެއްޖެއެވެ. މިއީ ދިވެހި ގައުމިއްޔަތަށް ލޯބިކުރާ، ޒިންމާދާރު، ޖިސްމާނީ، ރޫހާނީ އަދި ނަފްސާނީ ގޮތުން ދުޅަހެޔޮ ދިވެހި ރައްޔިތެއް ބިނާކޮށް މަސައްކަތަށް އަހުލުވެރި އަހްލާގް ރަނގަޅު ހަރުދަނާ ޒުވާން ޖީލެއް ބިނާ ކުރެއްވުމަށް ރައީސް ޑރ. މުހައްމަދު މުއިއްޒު އިސް ނަންގަވައިގެން ރާއްޖޭގައި މުޅިން އަލަށް ފެށި ޕްރޮގްރާމެކެވެ. މި ޕްރޮގްރާމްގެ ފުރަތަމަ ބުރުގައި 108 ރަށަކުން 350 ދަރިވަރުން ބައިވެރިވެފައިވާއިރު، އޭގެ ތެރޭގައި ހިމެނެނީ 64 އަންހެން ދަރިވަރުންނާއި 286 ފިރިހެން ދަރިވަރުންނެވެ. މީގެ ތެރެއިން ދަސްވެނިވެފައިވަނީ 344 ދަރިވަރުންނެވެ. އެއީ ބައިވެރިވި ދަރިވަރުންގެ އިންސައްތައަށް ބަލާނަމަ، 78.48 އިންސައްތައެވެ.

މި ޕްރޮގްރާމްގައި ބައިވެރިވި ދަރިވަރުންގެ އެވްރޭޖް އުމުރަކީ 18 އަހަރެވެ. މި ޕްރޮގްރާމްގައި ބައިވެރިވި ދަރިވަރުންގެ ދަސްވެނިވުމުގެ ރަސްމިއްޔާތު ބާއްވާފައިވަނީ އެ ޕްރޮގްރާމްގެ ތަމްރީނުތައް ކުރިއަށް ގެންދިޔަ ޅ. މާފިލާފުށީގައި ހުންނަ ދިވެހި ގައުމީ ދިފާއީ ބާރުގެ ކޮމްޕޮސިޓް ޓްރެއިނިން ސެންޓަރުގައެވެ. ދިވެހި ވަތަނީ ހިދުމަތުގެ މިޝަންގެ ގޮތުގައި ކަނޑައަޅާފައިވަނީ، ދިވެހި ގައުމިއްޔަތަށް ލޯބިކުރާ، ޒިންމާދާރު، ޖިސްމާނީ، ރޫޙާނީ އަދި ނަފުސާނީ ގޮތުން ދުޅަހެޔޮ ދިވެހި ރައްޔިތެއް ބިނާކުރުމެވެ. ނޭޝަނަލް ސާވިސް އިނީޝިއަލް ތަމްރީނަކީ، ތިން މަސް ދުވަހުގެ ޕްރޮގްރާމެކެވެ.

ދިފާއީ ބާރުން ވިދާޅުވީ، މި ތަމްރީނުގައި ދިވެހި ގައުމިއްޔަތު، ޒިންމާދާރު ރައްޔިތުކަން، ދިނީ ތައުލީމު، ލީޑަޝިޕް އަދި ބަހުގެ ޕްރޮފިޝަންސީ އުނގަންނައިދީ، ކަސްރަތާއި ހަށިހެޔޮކަމާއި، ހެވިކަމުގެ ތަމްރީނުތައް ކުރިއަށްގެންދާނެ ކަމަށެވެ. އަދި ފަސްޓް އެއިޑް، ފަޔާ ފައިޓިން އަދި ސެލްފް ޑިފެންސްވެސް ދަރިވަރުންނަށް ދަސްކޮށްދޭނެ ކަމަށް ވެސް ވިދާޅުވިއެވެ. ދިފާއީ ބާރުން ވިދާޅުވީ، ޕްރޮގްރާމްގައި ބައިވެރިވި ދަރިވަރުންގެ ތެރެއިން ކަނޑައެޅިފައިވާ މިންގަނޑުތައް ހާސިލުކުރި ދަރިވަރުންނަށް އެކި ސެޓްފިކޭޓް ހަވާލުކޮށްފައިވާ ކަމަށެވެ. އޭގެ ތެރޭގައި ފަސްޓް އެއިޑް ފުރިހަމަ ކުރި ކަމުގެ ސެޓްފިކޭޓާއި ސެޓްފިކޭޓް 3 އިން ސިވިކް އެޑިއުކޭޝަން އެންޑް ލީޑާޝިޕް ހިމެނެއެވެ.

މި ޕްރޮގްރާމްގައި ބައިވެރިވި ދަރިވަރުންގެ ތެރެއިން 96 އިންސައްތަ ދަރިވަރުން ވަނީ ސެޓްފިކޭޓް 3 އިން ސިވިކް އެޑިއުކޭޝަން އެންޑް ލީޑާޝިޕް ހާސިލުކޮށްފައި ކަމަށް ދިފާއީ ބާރުން ވިދާޅުވިއެވެ.