އާމުދަނީ އިތުރުވެ، ޕީއެސްއައިޕީ މަޝްރޫޢުތައް ހަލުވިވެއްޖެ

Read Time:4 Minute, 1 Second

މާލީ ކަންކަމާއި ތަރައްޤީގެ ރޭވުންތެރިކަމާ ބެހޭ ވުޒާރާއިން އެކުލަވާލާފައިވާ ވީކްލީ ފިސްކަލް ޑިވެލޮޕްމަންޓްސް ރިޕޯޓުން ދައްކާ ގޮތުގައި ދައުލަތަށް ލިބޭ އާމުދަނީ އިތުރުވެ، ޕަބްލިކް ސެކްޓަރ އިންވެސްޓްމަންޓް ޕްރޮގްރާމް (ޕީއެސްއައިޕީ) މަޝްރޫޢުތަކުގެ މަސައްކަތް ހަލުއިވެފައިވެއެވެ. މި ކުރިއެރުން ވަނީ ފަތުރުވެރިކަމުގެ ދާއިރާގެ ތަކެއްޗާއި ޚިދުމަތްތަކުން ނަގާ ޓެކްސް (ޓީ.ޖީ.އެސް.ޓީ.) އިތުރުވުމުގެ ސަބަބުންނެވެ. މިމަހުގެ 18 ވަނަ ދުވަހުގެ ނިޔަލަށް ދައުލަތަށް ލިބުނު ޖުމްލަ އާމުދަނީއާއި ހިލޭ އެހީ 36.9 ބިލިއަން ރުފިޔާއަށް އަރާފައިވާއިރު، މިއީ 2024 ވަނަ އަހަރުގެ މިމުއްދަތުގައި ލިބުނު އަދަދަށްވުރެ 3.8 ބިލިއަން ރުފިޔާ ނުވަތަ 11.5 އިންސައްތަ އިތުރުވުމެކެވެ. އާމުދަނީ އެންމެ ބޮޑަށް އިތުރުވީ ޓީ.ޖީ.އެސް.ޓީ. އިން ކަމަށް ރިޕޯޓުގައި ބަޔާންކޮށްފައިވެއެވެ. ޓެކްސްގެ ގޮތުގައި ޖުމްލަ 27.5 ބިލިއަން ރުފިޔާ ލިބިފައިވާއިރު، ޓެކްސް ނޫން ގޮތްގޮތުން 9.1 ބިލިއަން ރުފިޔާ ލިބިފައިވެއެވެ.

މިމަހުގެ 18ގެ ނިޔަލަށް ޖުމްލަ ޚަރަދުތައް ހުރީ 38.9 ބިލިއަން ރުފިޔާގައެވެ. ފާއިތުވި ހަފްތާގައި ޚަރަދުތައް އިތުރުވި މައިގަނޑު ސަބަބަކީ ދަރަނީގެ ޚިދުމަތަށް ކުރި ޚަރަދުތަކެވެ. ސަބްސިޑީތަކަށް 3.4 ބިލިއަން ރުފިޔާ ޚަރަދުކުރެވިފައިވާއިރު، މިއީ 2024 ވަނަ އަހަރުގެ މިމުއްދަތުގައި ކުރި ޚަރަދަށްވުރެ 5.3 އިންސައްތަ ކުޑަ އަދަދެކެވެ. ޕީއެސްއައިޕީއަށް ޖުމްލަ 7.5 ބިލިއަން ރުފިޔާ ޚަރަދުކުރެވިފައިވާއިރު، މީގެތެރެއިން އެންމެ ބޮޑު ބައި ކަމަށްވާ 4.4 ބިލިއަން ރުފިޔާ ޚަރަދުކުރެވުނީ ދަތުރުފަތުރުގެ ދާއިރާއަށެވެ. މީގެތެރޭގައި އެއަރޕޯޓު ތަރައްގީ ކުރުމަށް 3.2 ބިލިއަން ރުފިޔާ އަދި ބުރިޖު ހެދުމަށް 870.3 މިލިއަން ރުފިޔާ ހިމެނެއެވެ. ސިއްޙީ ދާއިރާއަށް ކުރި ޕީއެސްއައިޕީ ޚަރަދުތައް މިދިޔަ އަހަރަށްވުރެ 307.7 މިލިއަން ރުފިޔާ އިތުރުވެ، 453.1 މިލިއަން ރުފިޔާއަށް އަރާފައިވެއެވެ.

ދައުލަތުގެ ބަޖެޓުގެ ޑެފިސިޓް 2.0 ބިލިއަން ރުފިޔާއަށް ވަނީ ކުޑަވެފައެވެ. މިއީ މިދިޔަ އަހަރުގެ މިމުއްދަތުގައި ރިޕޯޓު ކުރި 11.5 ބިލިއަން ރުފިޔާގެ ޑެފިސިޓަށްވުރެ 9.5 ބިލިއަން ރުފިޔާ ނުވަތަ 82.5 އިންސައްތަ ކުޑަ އަދަދެކެވެ.