“ބަދަލުވަމުން އަންނަ ދުނިޔެއަށް ތައްޔާރުވުމަށް ޒުވާނުންގެ ތައުލީމާއި ހުނަރު ތަރައްޤީކުރުން މުހިންމު”

Read Time:3 Minute, 50 Second

(ފޮޓޯ ކްރެޑިޓްސް: ޕީއެސްއެމް ނިއުސް)

ޒުވާނުން ބާރުވެރިކުރުވުމާއި މައުލޫމާތާއި ފަންނާއި ބެހޭ ވަޒީރު އިބްރާހިމް ވަހީދު ވިދާޅުވީ، ބަދަލުވަމުން އަންނަ ދުނިޔެއަކަށް ތައްޔާރުވުމަށް ޒުވާނުންގެ ތައުލީމާއި ހުނަރު ތަރައްޤީކުރުމަކީ މުހިންމުކަމެއް ކަމަށެވެ. ޒުވާނުންގެ ޤައުމީ ކޮންފަރެންސް ފެށުމުގެ ރަސްމިއްޔާތުގައި ވާހަކަފުޅު ދައްކަވަމުން ވަޒީރު ފާހަގަކުރެއްވީ، ޒުވާނުންނަކީ މުސްތަޤްބަލުގެ ލީޑަރުންނާއި ޤައުމުގެ ބަޠަލުން ކަމަށާއި، މާދަމާގެ ރާއްޖެ ބިނާވެފައި އޮންނާނީ މިއަދުގެ ޒުވާނުންގެ ފިކުރާއި ސުލޫކުގެ މައްޗަށް ކަމަށެވެ. ވަޒީރު ވަހީދު އިތުރަށް ވިދާޅުވީ، ޒުވާނުންނަކީ ދީނަށް އަމަލުކުރާ، އަޚްލާގު ރަނގަޅު، ސުލޫކީ އަދި އިޖްތިމާޢީ ރަނގަޅު ސިފަތަކުން ޒީނަތްތެރިވެފައިވާ ބަޔަކަށް ހެދުމަކީ މުހިންމު ކަމެއް ކަމަށެވެ. ޤައުމުގެ އިޤްތިޞާދު ކުރިއެރުވުމަށް މަސައްކަތުގައި އުޅޭ ހިތްވަރުގަދަ ޒުވާނުން ބޭނުންވާ ކަމަށާއި، ކަންނެތްކަމުން އެއްވެސް ކަމެއް ހާސިލްނުވާނެ ކަމަށް ވިދާޅުވެ، ކާމިޔާބީ އޮތީ ތިމާގެ އަތުގައިކަން ވަޒީރު ފާހަގަކުރެއްވިއެވެ.

ސަރުކާރުން ޒުވާނުންގެ ޚިޔާލުތައް ހަޤީގަތަކަށް ހެދުމަށް އެންޓަރޕްރިނިއަރޝިޕް ޕްރޮގްރާމްތައް ހިންގާ، ޒުވާނުންގެ ނަފްސާނީ އަދި ޖިސްމާނީ ދުޅަހެޔޮކަން އިތުރުކުރުމަށް މަސައްކަތްކުރާނެ ކަމަށް ވަޒީރު ވިދާޅުވިއެވެ. މީގެ އިތުރުން ކުޅިވަރާއި ކްރިއޭޓިވް އާރޓްސްގައި ޒުވާނުންގެ ހުނަރާއި ޝައުގުވެރިކަން އިތުރުކުރުމަށް ޤައުމު ބޭނުންވާކަމަށާއި، ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން ޒުވާނުންގެ އަގު ވަޒަންކުރައްވާނެ ކަމަށް ވެސް ވަޒީރު ވިދާޅުވިއެވެ. ކޮންމެ ދާއިރާއެއްގެ މީހަކަށްވިއަސް ޤައުމުގެ ކުރިއެރުމަށް އެމީހެއްގެ ހުނަރު ބޭނުންކުރުމަކީ މުހިންމުކަމެއް ކަމަށާއި، އިލްމަކީ އެންމެ ވަރުގަދަ ހަތިޔާރު ކަމުގައި ވިދާޅުވެ، ކެނޑިނޭޅި އިލްމު ހޯދާ ހިއްސާކުރުމަށް ވަޒީރު ބާރުއެޅުއްވިއެވެ. މިސަރުކާރުން ޒުވާނުންނަށް ބޭނުންވާ މަގުތައް ފަހިކުރަމުން އަންނަ ކަމަށް ވެސް ވަޒީރު އިބްރާހިމް ވަހީދު ވިދާޅުވިއެވެ.