އަންނަ އަހަރުން ފެށިގެން ދަރިވަރުންނަށް ކްލާހުގައި ފޯނު ބޭނުން ނުކުރެވޭނެ!

Read Time:3 Minute, 4 Second

(ފޮޓޯ ކްރެޑިޓްސް: ޕީއެސްއެމް ނިއުސް)

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެފައިވަނީ އަންނަ ދިރާސީ އަހަރުން ފެށިގެން އެއްވެސް ދަރިވަރަކަށް ކްލާހުގައި ފޯނު ބޭނުން ނުކުރެވޭނެ ކަމަށެވެ. އެމަނިކުފާނު މިހެން ވިދާޅުވީ ހުޅުމާލެ ދެވަނަ ފިޔަވަހީގެ ރައްޔިތުންނާ ބައްދަލުކުރެއްވުމަށް ރެހެންދި ސްކޫލުގައި ބޭއްވި ރަސްމިއްޔާތެއްގައެވެ. ގިނަ ބެލެނިވެރިން ފޯނު ގެންދިއުން މަނާކުރުމަށް އެދެމުންދާތީ، މިހާރު ގްރޭޑް 10 އިން ދަށުގެ ދަރިވަރުންނަށް ފޯނު ގެންދިއުން މަނާކުރެވިފައިވީ ނަމަވެސް އެކަން ރަނގަޅަށް ތަންފީޒު ނުވާކަމަށް ރައީސް ފާހަގަކުރެއްވިއެވެ. އެހެންކަމުން، އަންނަ ދިރާސީ އަހަރުން ފެށިގެން ގްރޭޑް 10 އިން ދަށުގެ ދަރިވަރުން ސްކޫލަށް ފޯނު ގެންދޭތޯ ވަރަށް ހަރުކަށިކޮށް ބަލަމުންދާނެ ކަމަށާއި، ސްކޫލް ގަޑީގައި އެ ގްރޭޑްތަކުގެ ދަރިވަރުންނަށް ސްކޫލްގައި ފޯނު ބޭނުން ނުކުރެވޭނެ ކަމަށް ވިދާޅުވިއެވެ.

މީގެ އިތުރުން، އޭލެވެލް ކިޔަވާ ގްރޭޑް 11 އަދި 12 ގެ ދަރިވަރުންނަށް ސްކޫލަށް ފޯނު ގެންދެވޭނެ ކަމަށާއި، ނަމަވެސް އެ ދަރިވަރުންގެ ފޯނުތައް ހުންނަށްވާނީ ސްކޫލްގައި ބަހައްޓާ ޚާއްސަ ލޮކަރުތަކެއްގައި ކަމަށް ރައީސް ވިދާޅުވިއެވެ. ކްލާސް ގަޑީގައި ފޯނު ބޭނުން ނުކުރެވުނަސް ކްލާސް ނިމުމުން އެމީހުންގެ ފޯނުތައް އަނބުރާ ލިބޭނެ އިންތިޒާމު ހަމަޖައްސަވާނެ ކަމަށް ވެސް ރައީސް ވިދާޅުވިއެވެ. މިކަން ހާމަކުރައްވާފައި މިވަނީ ދާދިފަހުން ރާއްޖޭގެ ސްކޫލެއްގައި ކްލާސް ގަޑީގައި ދަރިވަރުން ފޯނު ގެންގުޅެގެން މައްސަލަތަކެއް ފެންމަތިވެ، ސްކޫލަށް ފޯނު ގެންދިއުމާ ދެކޮޅަށް ގިނަ ބަޔަކު އަޑުއުފުލާފައިވާ ދަނޑިވަޅެއްގައެވެ.