ޙަސަދަވެރިންނެއް ނުރުއްސޭނެއެވެ!

Read Time:3 Minute, 28 Second

މާތް ﷲ ދުނިޔޭގައި މީސްތަކުންނަށް ނިޢުމަތްތައް ދެއްވަނީ އެކި މިންވަރަށެވެ. އެއީ އެކަލާނގެ ޙިކްމަތްތެރި ރޭއްވެވުމެވެ. މިކަން ޤަބޫލުކޮށް ހެޔޮގޮތުގައި ދިރިއުޅުމަށް މަސައްކަތްކުރާ މީހާއަށް ބަރަކާތް ލިބެއެވެ. ނަމަވެސް އެކަމާ ނުރުހި، އެހެން މީހުންނަށް ލިބިފައިވާ ނިޢުމަތްތައް ފިލައިދިއުމަށް އެދޭ މީހާއަކީ ނުރައްކާތެރި ބައްޔެއް ކަމަށްވާ ޙަސަދައިގެ ތެރެއަށް ވެއްޓިފައިވާ މީހެކެވެ. ޙަސަދައަކީ ހިތުގެ ބައްޔެކެވެ. މާތް ﷲ އަށް އުރެދުމުގެ ފުރަތަމަ ފާފަ އުޑުތަކުގައްޔާއި ބިމުގައިވެސް ފެށުނީ ޙަސަދައިގެ ސަބަބުންނެވެ. އެކަލާނގެ ރަސޫލާ މުޙައްމަދު ﷺ ވަނީ ޙަސަދައިގެ ނުބައިކަމުން އިންޒާރުދެއްވާފައެވެ.

ޙަސަދަވެރިކަމުގެ ސަބަބުން އެންމެ ބޮޑު ގެއްލުމެއް ލިބެނީ ޚުދު ޙަސަދަވެރިޔާއަށެވެ. އެހެން މީހުންނަށް ލިބިފައިވާ ނިޢުމަތްތައް ފެނުމުން އޭނާގެ ހިތް ހަމަޖެހުމެއް ނުލިބެއެވެ. އެއްވެސް މީހަކަށް ﷲ ގެ ނިޢުމަތެއް ލިބިއްޖެނަމަ، އެ ނިޢުމަތަށް ޙަސަދަވެރިވާނެ މީހަކު ހުންނާނެ ކަމަށް ޢުމަރު ބިން އަލްޚައްޠާބު ރަޟިޔަﷲ ޢަންހު ވިދާޅުވެފައިވެއެވެ. ޙަސަދަވެރިޔާއަށް ނިޢުމަތް ފިލައިގެން ދިއުން މެނުވީ ރުހުމެއް ނުލިބޭނެއެވެ.

ޙަސަދައިގެ ޢަލާމާތްތަކުގެ ތެރޭގައި ތިބާގެ ކުރިމަތީގައި ތަޢުރީފުކޮށް ގާތްވެ، ނެތްތަނުގައި ޣީބަބުނެ، މުޞީބާތެއް ޖެހުމުން އުފާކުރުން ހިމެނެއެވެ. އަދި ކުލަވަރު ބަދަލުވުމާއި، ސަލާމްކުރުން ސިއްރުކުރުމާއި، ތިބާއަށް ފުރަގަސްދިނުން ފަދަ ކަންކަންވެސް ފެނިދާނެއެވެ. ދުނިޔެއަށް ލޯބިކުރުމާއި، މީހުންގެ ތެރޭގައި މަތީ މަޤާމު ހޯދަން ބޭނުންވުމާއި، ނަފްސުގެ ނުބައިކަމަކީ ޙަސަދަ އުފައްދާ ބައެއް ކަންކަމެވެ. ވީމާ، މިފަދަ ނުބައި ސިފަތަކުން ދުރުހެލިވެ، ޙަސަދައިގެ ނުރައްކާތެރި ބަލިން ސަލާމަތްވެ، އަޅުގަނޑުމެންގެ ހިތްތައް ޙަސަދައާއި ރުޅިވެރިކަމުން ޠާހިރުކުރުމަށް މަސައްކަތްކުރަމާ ހިނގާށެވެ.