Read Time:2 Minute, 45 Second
ނަބިއްޔާ ﷺ އެކަލޭގެފާނުގެ އަޞްޙާބުންނާ ސުވާލުކުރެއްވީ ބަނގުރޫޓުވެފައިވާ މީހަކީ ކާކުތޯއެވެ. އެބޭކަލުން ދުނިޔަވީ ނަޒަރަކުން ޖަވާބު ދެއްވީ، މުދަލާއި ފައިސާ ނެތް މީހާ ކަމަށެވެ. ނަމަވެސް ނަބިއްޔާ ﷺ ޙަޤީޤީ ބަނގުރޫޓުވުން ބަޔާންކޮށްދެއްވީ، ޤިޔާމަތް ދުވަހުގައި ނަމާދާއި ރޯދަ އަދި ޒަކާތް ފަދަ ހެޔޮ ޢަމަލުތަކާއެކު އަންނަ މީހާ ކަމުގައެވެ. އެހެންނަމަވެސް، ދުނިޔޭގައި އުޅުނުއިރު އެމީހާ ވަނީ އެހެން މީހުންނަށް އެއްޗެހި ގޮވައި، ޒިނޭގެ ތުހުމަތު އަޅުވައި، މުދާ ކައި، ލޭ އޮހޮރުވައި، އަނިޔާކޮށްފައެވެ. މިގޮތުން، އޭނާގެ ހެޔޮކަންތައްތައް އޭނާ އަނިޔާކުރި މީހުންނަށް ދެވި، ހެޔޮކަންތައް ހުސްވެއްޖެނަމަ، އެމީހުންގެ ފާފަތައް އޭނާގެ ބޮލުގައި އެޅި، ނަރަކައަށް އެއްލައިލެވޭނެއެވެ.
މި ޙަޤީޤީ ބަނގުރޫޓަކީ، ހެޔޮ ޢަމަލުތަކުގެ ޘަވާބުން މަޙްރޫމުވެ، ސުވަރުގެ ނުލިބުމެވެ. އަނިޔާވެރިވުމުގެ ސަބަބުން މީހާގެ ބުރަ މަސައްކަތުން ހޯދި އަޅުކަންތަކުގެ ޘަވާބު ބޭކާރުވެ، ދުނިޔޭގައި އެންމެ ނަފްރަތުކުރި މީހުންނަށް ވެސް އެ ޘަވާބު ދޭންޖެހޭނެއެވެ. ޤިޔާމަތް ދުވަހުން، އެހެން މީހުންނަށް ކުރެވުނު ކުޑަވެސް އަނިޔާއަކަށް، ދީނާރަކުން ނުވަތަ ދިރުހަމަކުން ބަދަލު ނުދެވޭނެއެވެ. ބަދަލު ދެވޭނީ ހަމައެކަނި ހެޔޮކަންތަކުންނެވެ. ވުމާއެކު، ޙަޤީޤީ ބަނގުރޫޓަކީ އާޚިރަތުގައި އެހެން މީހުންގެ ޙައްޤުތަކަށް އަރައިގަނެ އަނިޔާވެރިވުމުގެ ސަބަބުން ހެޔޮކަންތައްތައް ގެއްލި، ފާފަތައް ބޮލުގައި އެޅި ނަރަކައަށް ދާންޖެހޭ މީހާއެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0