ވަޢުދާ އެއްގޮތަށް އެފްޑީސީ ފްލެޓުތަކުގެ ކުއްޔާއި ޑިޕޮސިޓަށް ހެޔޮ ބަދަލެއް

Read Time:3 Minute, 10 Second

(ފޮޓޯ ކްރެޑިޓްސް: ރައީސް އޮފީސް)

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ވަޢުދުފުޅާ އެއްގޮތަށް ފަހިދިރިއުޅުން ކޯޕަރޭޝަން (އެފްޑީސީ)ގެ ފްލެޓުތަކުގެ ކުއްޔާއި ޑިޕޮޒިޓަށް ބަދަލު ގެނެސްފިއެވެ. އެފްޑީސީގެ ފްލެޓުތަކުގެ ބޮޑު ކުއްޔާއި ޑިޕޮސިޓްގެ ސަބަބުން ރައްޔިތުންގެ ކަންބޮޑުވުންތައް ރައީސްއާ ހިއްސާކުރެވުމުން، ރައީސް ވަނީ އަގުތައް ކުޑަކުރައްވާނެކަމަށް ވިދާޅުވެފައެވެ.

އިމާރާތް ކުރުމާއި ގެދޮރުވެރިކަމާއި ބިނާރާބެހޭ ވަޒީރު ޑރ. ޢަބްދުﷲ މުއްތަލިބު ހާމަކުރެއްވި ގޮތުގައި، އަމާން ދޯދި އަދި އަމާން އުދަރެސްގެ 3 ކޮޓަރީގެ ފްލެޓުތަކަށް ކުރިން މަހަކު 10,500 ރުފިޔާ ކުލި އަދި 25,000 ރުފިޔާ ޑިޕޮޒިޓް ދައްކަން ޖެހުނުއިރު، މިހާރު މަހު ކުލި 8,500 ރުފިޔާއާއި މެއިންޓަނަންސް ފީ 1,500 ރުފިޔާ ހިމެނޭހެން ޖުމްލަ 10,000 ރުފިޔާ ދައްކަން ޖެހެއެވެ. ސެކިއުރިޓީ ޑިޕޮޒިޓްގެ ގޮތުގައި ދައްކަން ޖެހޭނީ 8,500 ރުފިޔާއެވެ. އަދި 2 ކޮޓަރީގެ ފްލެޓުތަކަށް ކުރިން މަހަކު 8,000 ރުފިޔާ ކުލި އަދި 15,000 ރުފިޔާ ޑިޕޮޒިޓް ދައްކަން ޖެހުނުއިރު، މިހާރު މަހު ކުލި 6,000 ރުފިޔާއާއި މެއިންޓަނަންސް ފީ 1,000 ރުފިޔާ ހިމެނޭހެން ޖުމްލަ 7,000 ރުފިޔާ ދައްކަން ޖެހެއެވެ. ސެކިއުރިޓީ ޑިޕޮޒިޓްގެ ގޮތުގައި ދައްކަން ޖެހޭނީ 6,000 ރުފިޔާއެވެ.

ރައީސުލްޖުމްހޫރިއްޔާ ވަނީ ހިޔާ ފްލެޓުތަކާއި ވިނަރެސް ފްލެޓުތަކާ ގުޅޭގޮތުން ހުރި ކަންބޮޑުވުންތަކަށް ޖުމްލަ ހައްލެއް ހޯއްދަވައިދެއްވާނެކަމަށް ވިދާޅުވެފައެވެ. އެގޮތުން، ހުޅުމާލެ ދެވަނަ ފިޔަވަހީގެ ހިޔާ އަދި ވިނަރެސް ފްލެޓުތަކުގެ ދިރިއުޅޭ ފަރާތްތަކަށް ލުއިގޮތްތަކެއް ހަމަޖެއްސުމުގެ މަސައްކަތް މިހާރު ކުރައްވަމުންދާކަމަށްވެސް އެމަނިކުފާނު ވަނީ ހާމަކުރައްވާފައެވެ.