އަންނަ އަހަރު ޑިޖިޓަލް އައިޑީއާއެކު ސްމާޓު އައިޑީކާޑު ދޫކުރަނީ

Read Time:3 Minute, 40 Second

(ފޮޓޯ ކްރެޑިޓްސް: ޕީއެސްއެމް ނިއުސް)

ދާޚިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިޙްސާން ވިދާޅުވީ، އަންނަ އަހަރުގެ ތެރޭގައި ޑިޖިޓަލް އައިޑީއާއެކު ސްމާޓް އައިޑީކާޑު ދޫކުރާނެ ކަމަށެވެ. މިއީ ރާއްޖެ ޑިޖިޓަލައިޒް ކުރުމުގެ މަސައްކަތުގެ މުހިއްމު ބައެކެވެ. މި މަސައްކަތުގެ ދަށުން، ވަކިވަކި އިދާރާތަކުން ދެމުން އަންނަ ޚިދުމަތްތައް އެއް ޕްލެޓްފޯމްއަކަށް ބަދަލުކުރުމުގެ މަސައްކަތް މިހާރުވެސް ކުރިއަށްދާކަން ވަޒީރު ފާހަގަކުރެއްވިއެވެ. މިހާތަނަށް އުމުރުން 10 އަހަރުން މަތީގެ ދެލައްކަ ހަތްދިހަ ދެހާސް ދިވެހިން (އެ އާބާދީގެ 80 އިންސައްތަ) ޑިޖިޓަލް އައިޑީ ނިޒާމުގެ ތެރެއަށް ވަދެފައިވާ ކަމަށް ވަޒީރު ވިދާޅުވިއެވެ. މި ނިޒާމް ބޭނުންކޮށްގެން ސަރުކާރުގެ އެކި ޚިދުމަތްތައް ފަސޭހައިން ލިބޭނެއެވެ. އަދި މިދިޔަ ދެ އަހަރުގެ ތެރޭގައި 17 އިދާރާއަކުން ވަންގަވްގެ ތެރެއިން މެނުއަލްކޮށް ދެމުން ދިޔަ ޚިދުމަތްތައް ފޯރުކޮށްދެމުންދާކަންވެސް ވަޒީރު ހާމަކުރެއްވިއެވެ.

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ، 2030 ވަނަ އަހަރު އަންނައިރު ރާއްޖޭގެ އުފެއްދުންތެރިކަމުގެ 15 އިންސައްތަ ޑިޖިޓަލް އިގްތިޞާދުން ހިއްސާކުރާނެ ކަމަށް ވިދާޅުވެފައެވެ. ސަރުކާރުގެ އަމާޒަކީ، ދައުލަތުން ފޯރުކޯށްދޭ ހުރިހާ ޚިދުމަތަކީވެސް، ކޮންމެ ރަށެއްގެ ކޮންމެ ތަނެއްގައި ހުރެގެންވެސް ހޯދޭހާ ފަސޭހަ ޚިދުމަތަކަށް ހެދުމެވެ. މި އަމާޒަށް ވާސިލުވުމަށް، ޒަމާނީ ފެންވަރުގެ ރައްކާތެރި ޑިޖިޓަލް އައިޑީއެއް ތައްޔާރުކުރުމާއި، އިދާރާތަކުގެ މެދުގައި މައުލޫމާތު ބަދަލުކުރެވޭނެ ހަރުދަނާ ނިޒާމެއް ޤާއިމްކުރުމުގެ އިތުރުން، ސައިބަރ ހަމަލާތަކުން ރައްކާތެރިވެވޭނެ ނިޒާމެއް ޤާއިމްކުރުމަށް ސަރުކާރުން ވަނީ ނިންމާފައެވެ. މި މަސައްކަތްތަކުގެ ނަތީޖާއެއްގެ ގޮތުން، މިހާރު ބޭނުންކުރަމުންދާ އީ-ފާސް ޑިޖިޓަލް އައިޑީއަށް ޒަމާނީ ބަދަލުތަކެއް އައިސް، ރައްޔިތުންގެ ކަންބޮޑުވުންތަކަށް ހައްލެއް ލިބިގެންދާނެ ކަމަށް ސަރުކާރުން ވިދާޅުވެއެވެ.