މަސްދުވަހުން 509 ބިދޭސީން ޑީޕޯޓްކޮށްފި

Read Time:3 Minute, 47 Second

(ފޮޓޯ ކްރެޑިޓްސް: ޕީއެސްއެމް ނިއުސް)

ދާޚިލީ ސަލާމަތާއި ފަންނިއްޔާތާ ބެހޭ ވަޒީރު އަލީ އިޙްސާން ވިދާޅުވެފައިވަނީ މިދިޔަ ނޮވެމްބަރު 15 ވަނަ ދުވަހުން ފެށިގެން މިހާތަނަށް 509 ބިދޭސީން ޑީޕޯޓްކޮށްފައިވާ ކަމަށެވެ. އެނޫންގޮތަކަށް ބަލާއިރު މިދިޔަ ދެ އަހަރު ދުވަހުގެ ތެރޭގައި ޖުމްލަ 9697 ބިދޭސީން ޑީޕޯޓްކޮށްފައިވެއެވެ. ބިދޭސީންގެ މައްސަލަ ހައްލުކުރުމަށް “އޮޕަރޭޝަން ކުރަނގި” އެކި ފިޔަވަހިތަކަށް ބަހާލައިގެން ކުރިއަށްގެންދާކަމަށް ވަޒީރު ވިދާޅުވިއެވެ. ފުރަތަމަ ފިޔަވަހީގައި މާލެ ސަރަހައްދުގައި ދިރިއުޅޭ ބިދޭސީންގެ މަޢުލޫމާތު އެއްކުރިއިރު، ދެވަނަ ފިޔަވަހީގައި ރާއްޖޭގެ ހުރިހާ ރަށަކާއި ސިނާއީ ރަށްރަށާއި ރިސޯޓުތަކުގައި މަސައްކަތްކުރާ ބިދޭސީންގެ މަޢުލޫމާތު އެއްކުރެވުނެވެ. މިހާތަނަށް 202,000 ބިދޭސީންގެ 10 އިނގިލީގެ ނިޝާނާއި ފޭސް ރިކޮގްނިޝަން ނަގައި މަޢުލޫމާތު އެއްކޮށްފައިވެއެވެ.

މި މަސައްކަތުގެ ތިންވަނަ ފިޔަވަހި އަންނަ ޖެނުއަރީ މަހު ފަށާނެއެވެ. އެގޮތުން ޖެނުއަރީ މަހުގެ 1 ވަނަ ދުވަހުން ފެށިގެން އޭޕްރީލް މަހާ ހަމައަށް، މިހާރު ފިންގަ ޕްރިންޓް ނަގާފައި ތިބި ނަމަވެސް ގަވާއިދާ ޚިލާފަށް އުޅޭ ބިދޭސީން ގަވާއިދުގެ ތެރެއަށް ވެއްދުމުގެ ބޮޑު މަސައްކަތެއް ކުރާނެއެވެ. މި މަރުހަލާގައި ރަސްމީ އެމްޕްލޯޔަރެއް ނެތް މީހުންނާއި ފިލައިގެން އުޅޭ ބިދޭސީންނަށް ސައްހަ ވޯކް ޕާމިޓް ހޯދުމުގެ ފުރުސަތު ލިބިގެންދާނެއެވެ.

އަންނަ އަހަރުގެ އޭޕްރީލް މަހުގެ 2 ވަނަ ދުވަހުން ފެށިގެން 2027 ވަނަ އަހަރުގެ މެއި މަހުގެ 1 ވަނަ ދުވަހާ ހަމައަށް، ގަވާއިދާ ޚިލާފަށް އުޅޭ ބިދޭސީން ހިފައި ހައްޔަރުކޮށް ޑީޕޯޓްކުރުމުގެ ޚާއްސަ މަސައްކަތެއް ފަށާނެއެވެ. މި މަސައްކަތް ނިމޭއިރު ރާއްޖޭގައި އުޅޭ ހުރިހާ ބިދޭސީންނަކީ ކާކުކަން އެނގޭ، އެމީހަކަށް ޒިންމާވާނެ އެމްޕްލޯޔަރެއް ހުރެ، އެމީހަކު އެކަމަށް ޒިންމާކުރެވޭނެ ހުރިހާ މަޢުލޫމާތެއް ވަގުތުން ސިސްޓަމުން ބެލޭނެ ނިޒާމެއްގެ ތެރެއަށް ގެނެސް، ޖަވާބުދާރީވެވޭނެ ގޮތަކަށް ބިދޭސީންގެ ކަންކަން ބެހެއްޓުމަކީ މި މަސައްކަތުގެ މައިގަނޑު މަގުސަދެވެ.