ސިޔާސަތުތައް ބައްޓަންކުރާނީ ކުދި އަދި މެދުފަންތީގެ ވިޔަފާރިތައް ކުރިއެރުވުމަށް: ރައީސް

Read Time:4 Minute, 13 Second

(ފޮޓޯ ކްރެޑިޓްސް: ރައީސް އޮފީސް)

ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެފައިވަނީ ސަރުކާރުގެ ސިޔާސަތުތައް ބައްޓަން ކުރައްވާނީ ކުދި އަދި މެދުފަންތީގެ ވިޔަފާރިތައް ހިމެނޭގޮތަށް ހުރިހާ ފަންތިއެއްގެ ވިޔަފާރިއެއްވެސް ކުރިއެރުވުމަށް ކަމަށެވެ. އެމަނިކުފާނު މިކަން ހާމަކުރެއްވީ ކުދި އަދި މެދު ފަންތީގެ ވިޔަފާރިވެރިންނާއެކު ބޭއްވި ބައްދަލުވުމެއްގައެވެ. މި ބައްދަލުވުމުގެ މަޤްޞަދަކީ ވިޔަފާރިވެރިންގެ ކަންބޮޑުވުންތަކާއި ޚިޔާލު ހޯއްދެވުން ކަމަށް ރައީސުލްޖުމްހޫރިއްޔާ ވިދާޅުވިއެވެ. ސަރުކާރުން ވަނީ ކުދި އަދި މެދުފަންތީގެ ވިޔަފާރިތައް ކުރިއެރުވުމަށް ގިނަ މަސައްކަތްތަކެއް ފަށާފައެވެ. މިގޮތުން، ދިވެހިންނަށް އެކަނި ވިޔަފާރި ކުރެވޭ ދާއިރާތަކުގެ ޢަދަދު 34 އަށް އިތުރުކޮށް، އެ ދާއިރާތަކުގައި ބިދޭސީން ހަރަކާތްތެރިވުން ހުއްޓުވުމަށް އިޤްތިޞާދީ އަދި ދާޚިލީ ވުޒާރާއިން ދަނީ މަސައްކަތް ކުރަމުންނެވެ. މިހާތަނަށް 30 އަށް ވުރެ ގިނަ ވިޔަފާރި ވަނީ ބަންދުކޮށްފައެވެ.

މީގެ އިތުރުން ވިޔަފާރިތަކުގެ އުފެއްދުންތައް ހިމާޔަތްކުރުމަށް ދެ ޤާނޫނަކަށް ޢަމަލުކުރަން ފަށާފައިވާއިރު، މީގެ ސަބަބުން ދިވެހިރާއްޖޭގެ ވިޔަފާރީގެ އުފެއްދުންތަކަށް ބައިނަލްއަޤްވާމީ ގޮތުންވެސް ހިމާޔަތް ލިބޭނެއެވެ. ބޭރުފައިސާގެ ދަތިކަން ހައްލުކުރުމަށް ބޭރުފައިސާގެ ޤާނޫނަށް ވަނީ އިސްލާހު ގެނެސްފައެވެ. މި ބަދަލާއެކު، ފަތުރުވެރިކަމުގެ ސިނާޢަތަށް ވަންނަ ބޭރުފައިސާގެ 20 އިންސައްތަ ބޭންކުތަކުން މާރުކުރާނެއެވެ. އަދި ވިޔަފާރިތަކަށް ބޭންކުތަކުން ދޫކުރާ ބޭރުފައިސާގެ ނިސްބަތް 50 އިންސައްތައަށް ވަނީ އިތުރުކޮށްފައެވެ.

ފަންނުވެރި ކުދި އަދި މެދުފަންތީގެ ވިޔަފާރިތައް ކުރިއެރުވުމަކީ ރައީސުލްޖުމްހޫރިއްޔާގެ ރިޔާސީ ވަޢުދެކެވެ. ޤައުމުގެ ޖީޑީޕީގެ 15 އިންސައްތަ ފަންނުވެރިކަމުގެ އިޤްތިޞާދުން ޙިއްސާކުރުމަށް މަސައްކަތް ކުރައްވަމުން ގެންދަވާކަމަށް އެމަނިކުފާނު ވިދާޅުވިއެވެ. މި މަޤްޞަދުގައި މިހާތަނަށް ބޭއްވުނު އެންމެ ބޮޑު މަޢުރަޒު ކަމަށްވާ ޤައުމީ އުފެއްދުތެރިކަމުގެ މަޢުރަޒު ވަނީ މިއަހަރު ބާއްވާފައެވެ. މި މަސައްކަތްތަކާއެކު، 2040 ވަނަ އަހަރު އަންނަންވާއިރަށް ރާއްޖެއަކީ ތަރައްޤީވެފައިވާ ޤައުމަކަށް ހެދުމަކީ ރައީސުލްޖުމްހޫރިއްޔާގެ އަމާޒެކެވެ.