Read Time:6 Minute, 3 Second
(ފޮޓޯ ކްރެޑިޓްސް: ޕީއެސްއެމް ނިއުސް)
ލީގުގައި އެންމެ ފަހުން ކުލަބު ވެލެންސިއާ ކުޅުނު މެޗުގައި އައު ކުޅުންތެރިއަކު ގުޅުމާއެކު ކުރިއެރުން ފެނިގެން ދިޔަ ކަމަށް އެކުލަބުގެ ކޯޗު އަޙްމަދު މުޖުތަބާ (ފެސްކޯ) ބުނެފިއެވެ. ދިރާގު ދިވެހި ޕްރިމިއާ ލީގުގައި ގައުމީ ފުޓްބޯޅަ ދަނޑުގައި އެންމެ ފަހުން ވެލެންސިއާއިން ނިކުތީ ނިއުރޭޑިއަންޓާއި ދެކޮޅަށެވެ. އެ މެޗުގައި ނިއުރޭޑިއަންޓުން ވަނީ 3-1 ލަނޑުން ވެލެންސިއާގެ މައްޗަށް ކުރި ހޯދާފައެވެ. އެ މެޗުގައި ވެލެންސިއާއާ އަލަށް ގުޅުނު ޑިފެންސިވް މިޑްފީލްޑަރ އުރުގުއާއީގެ އަމަޓިއަސް މާޓިނޭޒް ވަނީ މެޗުގަ ފުރަތަމަ އެގާރައިގެ ތެރޭގައި ހިމެނިގެން މެޗު ފުރިހަމަކޮއްފައެވެ. އެ މެޗަށްފަހު ޕީއެސްއެމް ނިއުސްއަށް ދިން އިންޓަވިއުއެއްގައި ވެލެންސިއާގެ ކޯޗު މުޖުތަބާ ބުނީ ވެލެންސިއާގެ އުންމީދަކީ ކުރިޔަށް އޮތް މެޗުތަކުގައި އެ މެޗަށްވުރެ ރަނގަޅު ކުޅުމެއް ދެއްކުން ކަމަށެވެ. ވެލެންސިއާގެ ޒުވާން ކުޅުންތެރިންނާ ދެކޮޅަށް ނިކުތް އެމެޗުގައި ނިއުއަށް މާ އެދެވޭ ކުޅުމެއް ދެއްކިފައެއް ނުވެއެވެ.
މުޖުތަބާ ބުނީ ވެލެންސިއާގެ ހުރިހާ ކުޅުންތެރިންވެސް އެ މެޗުގައި ކުރި މަސައްކަތަށް ސާބަސްދޭ ކަމަށެވެ. ހުރިހާ ކުޅުންތެރިންވެސް ވަރަށް ރަނގަޅަށް މަސައްކަތް ކުރި ދުވަހެއްގެ ގޮތުގައި ފެނުނު ކަމަށާއި، އެހެންނަމަވެސް ޒުވާން ސްކޮޑަކަށްވެފަ ތަޖުރިބާ މަދުވުމުގެ ސަބަބުން ގޯސްތަކެއް ހެދޭނެ ކަމަށް އޭނާ ފާހަގަކުރިއެވެ. މެޗުގައި ނިއުއިން ޖެހި ފުރަތަމަ ލަނޑަކީ ވެލެންސިއާ އަށް ހެދުނު ބޮޑު ގޯހަކުން ވަތް ލަނޑެއް ކަމަށް މުޖުތަބާ ބުންޏެވެ. “ފުރަތަމަ ގޯލުވެސް އައީ ހަމަ ބޮޑު މިސްޓޭކަކުން. މިސްޓޭކެއް ނުހެދެންޔާ ގޯލެއް ނުވެސް ވަންނާނެ. އެކަމު މީ ހެދެންޖެހޭ ވަރުގެ މިސްޓޭކަށްކަށްވުރެ ބޮޑެތި މިސްޓޭކުތަކެއް ހެދިގެން މިއަދު މިނަތީޖާ ނިކުތީ” ކޯޗު ބުންޏެވެ. ވެލެންސިއާގެ ކޯޗު ބުނީ އެ ކުލަބު ބޭނުންވާ އަމާޒަށް ގެންގޮސްދޭނެކަމުގެ 100 ޕަސެންޓް އިތުބާރު ހުރިހާ ކުޅުންތެރިންނަސްވެސް އެބައޮތް ކަމަށެވެ.
ވެލެންސިއާއާއި ނިއުރޭޑިއަންޓް ފުރަތަމަ ބުރުގައި ވާދަކުރި މެޗު 2-0 ލަނޑުން ކާމިޔާބުކުރީ ނިއު ރޭޑިއަންޓުންނެވެ. ލީގުގައި ދެން ވެލެންސިއާއަށް އޮންނާނީ ކުލަބު ގްރީން ސްޓްރީޓްސްއާއި ދެކޮޅަށް އަންނަ ބުރާސްފަތި ދުވަހުގެރޭ ކުޅެން ޖެހޭ މެޗެވެ. ޕޮއިންޓު ތާވަލުގައި ވެލެންސިއާ އޮތީ ހަތް ޕޮއިންޓާއެކު ތާވަލުގެ 8 ވަނައިގައެވެ. ކްލަބު ވެލެންސިއާއިން ވަނީ މި ޓްރާންސްފާ މުއްދަތުގައި ބިދޭސީ ދެ ކުޅުންތެރިން ގެނެސްފައެވެ. އޭގެތެރޭގައި ނިއު އާއި ދެކޮޅަށް ކުޅުނު މެޗުގައި ފެނިގެން ދިޔަ އުރުގުއާއީގެ މިޑްފީލްޑަރުގެ އިތުރުން ފްރާންސްގެ 32 އަހަރުގެ ފޯވަޑް ސްޓެފަން ބްލަންވަނީ އެޓީމާ ގުޅިފައެވެ.
ވެލެންސިއާއިން މި ސީޒަން ފެށީ ސްޕެއިންގެ ފޯވަޑް އަބޫބަކުރު ބޫސާ ސިއްލާ ގޮވައިގެންނެވެ. ރާއްޖެ އައިއިރުވެސް އަނިޔާގައި ހުރި ކުޅުންތެރިޔާއަށް އެކަށީގެންވާ ކުޅުމެއް ނުދެއްކުމުން އޭނާ ވަނީ ފޮނުވާލާފައެވެ. އަދި އެ ޓީމަށް ކުޅުނު އުޒުބަކިސްތާން ޑިފެންޑަރު ޑަވްރަންބެކަށްވެސް އެދެވޭ ކުޅުމެއް ދެއްކިފައިނުވާތީ އޭނާވެސް ވަނީ ފޮނުވާލާފައެވެ. އަލަށް ގުޅުނު ދެ ކުޅުންތެރިންނާއި މަލްޑޯވާގެ ކީޕަރަކާއި މިސްރުގެ ޑިފެންޑަރު މޫސާ ބަސެލް އާއިއެކު ޖުމްލަ ހަތަރު ބިދޭސީން ކުޅުންތެރިން މިހާރު ވެލެންސިއާގައި އެބަތިއްބެވެ.
Happy
0 %
Sad
0 %
Excited
0 %
Sleepy
100 %
Angry
0 %
Surprise
0 %
0
0