Read Time:3 Minute, 7 Second
(ފޮޓޯ ކްރެޑިޓްސް: އެމްއޭސީއެލް)
ވެލާނާ އިންޓަރނޭޝަނަލް އެއަރޕޯޓުގެ ޓަރމިނަލް 1 އިން މިހާރު 32 އެއަރލައިނަކަށް ޚިދުމަތް ދެމުންދާއިރު، އެންމެ ފަހުން ޚިދުމަތް ދޭން ފެށީ ސިންގަޕޫރުގެ ޤައުމީ އެއަރލައިން, ސިންގަޕޯ އެއަރލައިންސްއަށެވެ. މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް) އިން ވިދާޅުވީ، ސިންގަޕޯ އެއަރލައިންސްއަށް ޚިދުމަތް ދޭން ފެށުން ފާހަގަކުރުމަށް ޚާއްޞަ ރަސްމިއްޔާތެއް ބާއްވާފައިވާ ކަމަށެވެ. މި ރަސްމިއްޔާތު ޝަރަފުވެރިކޮށްދެއްވީ ދިރާގުގެ ސީއީއޯ އަދި މެނޭޖިންގ ޑިރެކްޓަރ އިސްމާއިލް ރަޝީދެވެ. މި ރަސްމިއްޔާތުގައި އެމްއޭސީއެލްގެ ސީއީއޯ އިބްރާހިމް ޝަރީފު މުހައްމަދާއި، ސިންގަޕޯ އެއަރލައިންސްގެ ޖެނެރަލް މެނޭޖަރ ހާޒިގު ސުލައިމާން ވެސް ބައިވެރިވެވަޑައިގެންނެވިއެވެ.
ސިންގަޕޯ އެއަރލައިންސްގެ ކައުންޓަރުތައް ރަސްމީކޮށް ހުޅުވާލުމާއެކު، އެ އެއަރލައިނުން ފުރި 205 ފަސިންޖަރުންނަށް ހަދިޔާ ދިނުމުގެ އިތުރުން، ޓާމިނަލަށް ކައިރި ކުރި އެ އެއަރލައިންގެ ފުރަތަމަ ފްލައިޓުން ރާއްޖެ އައި 244 ފަސިންޖަރުންނަށް ސަޤާފީ ހަރަކާތްތަކާއެކު ހޫނު މަރުޙަބާއެއް ކިޔާފައިވެއެވެ. މިއީ ޓާމިނަލް 1 އިން އެއަރބަސް 350ގެ ފްލައިޓަކަށް މަރުހަބާކީ ފުރަތަމަ ފަހަރެވެ. ސިންގަޕޯ އެއަރލައިންސްއިން ރާއްޖެއަށް ދަތުރުތައް ފެށީ 1984 ވަނަ އަހަރުގެ މާރިޗު މަހުގެ 28 ގައެވެ. އެމްއޭސީއެލްގެ އަމާޒަކީ ރާއްޖެއަށް ދަތުރު ކުރާ ހުރިހާ އެއަރލައިނަކަށްވެސް އެންމެ ފުރިހަމަ އަދި އެންމެ މަތީ ފަންތީގެ ޚިދުމަތެއް ފޯރުކޮށްދިނުމެވެ. ފަތުރުވެރިކަމާ ބެހޭ ވުޒާރާގެ މިމަހުގެ 11 ވަނަ ދުވަހު ނެރުނު ރިޕޯޓުގައިވާ ގޮތުން މިހާރު 35 އެއަރލައިނަކުން ރާއްޖެއަށް ދަތުރު ކުރަމުންދެއެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0