ޣައްޒާ ޤަތުލުޢާންމު ތަޙުޤީޤު ކުރުން ހުއްޓަން ޔަހޫދީން ހުށަހެޅުމުން އައިސީސީން ބުނީ ނޫނެކޭ

Read Time:4 Minute, 21 Second

(ފޮޓޯ ކްރެޑިޓްސް: ރޮއިޓާރސް)

ފަލަސްޠީނުގެ ޣައްޒާގެ ރައްޔިތުންގެ ނަސްލުހޭދު ކުރުމަށް ޔަހޫދީން ހިންގި ޤަތުލުޢާންމުގެ ތެރެއިން ހިންގާފައިވާ ހަނގުރާމައިގެ ކުށްތައް ދެނެގަތުމަށް ބައިނަލްއަޤްވާމީ ޖިނާޢީ ކޯޓު (އައިސީސީ)ން ކުރަމުންދާ ތަޙުޤީޤާ ގުޅޭ ޙުކުމް ޔަހޫދީން އިސްތިއުފާނު ކުރުމުން، އެ ކޯޓުން އެ މައްސަލަ ބޭރު ކޮށްލައިފިއެވެ. ޔަހޫދީން އިސްތިއުނާފު ކޮށްފައި ވަނީ، ޤަތުލުޢާންމުގެ ތެރެއިން ހަނގުރާމައިގެ ކުށްތައް ހިންގާފައިވާ ކަމަށް ކަނޑައަޅައި، އައިސީސީގެ ދަށު ކޯޓުން ކޮށްފައިވާ ޙުކުމެވެ.

އެ ޙުކުމާ އެކު، އައިސީސީން ވަނީ ޒަަޔަނިސްޓުންގެ ހައްދުފަހަނަ އެޅި ބޮޑުވަޒީރު ބެންޔަމިން ނަތަންޔާހޫއާއި، ކުރީގެ ދިފާޢީ ވަޒީރު ޔޮއާވް ގަލާންތު ހައްޔަރު ކުރުމުގެ އަމުރެއް ވެސް ނެރެފައެވެ. އައިސީސީގެ ދަށު ކޯޓުގެ ޙުކުމް އިސްތިއުނާފު ކުރުމުގައި ޔަހޫދީންގެ އަމާޒަކަށްވީ، އަނިޔާވެރި ނަތަންޔާހޫއާއި ގަލާންތާ ދެކޮޅަށް ނެރެފައިވާ އަމުރު ބާޠިލު ކުރުވުމެވެ. ނަމަވެސް، އައިސީސީން ވަނީ ޔަހޫދީންގެ އިސްތިއުނާފު ބޭރުކޮށް، ޤަތުލުޢާންމުގެ ތެރެއިން ހިންގާފައިވާ ހަނގުރާމައިގެ ކުށްތަކުގެ ތަޙުޤީޤު ދެމެހެއްޓުމަށް ނިންމާފައެވެ. އަދި، ނަތަންޔަހޫއާއި ގަލާންތު ހައްޔަރު ކުރުމުގެ އަމުރު ދެމެހެއްޓުމަށް ވެސް ނިންމާފައެވެ.

ޔަހޫދީން ވަނީ މި ނިންމުމަށް ވަރަށް ބޮޑަށް ފާޑު ކިޔާފައެވެ. ޒަޔަނިސްޓު ދައުލަތުގެ ޚާރިޖީ ވަޒީރު ބުނީ، ކޯޓުގެ މެންބަރު ކަން ނެތް ޤައުމުތަކުގެ ސިޔާދަތީ މިނިވަން ކަން އެ ކޯޓުން ބަލައިނުގަންނަ ކަން، ނިންމުމުން ސާފުވެގެން ގޮސްފައިވާ ކަމުގައެވެ. ނަތަންޔާހޫއާ ދެކޮޅަށް އައިސީސީން މީގެ ކުރިން ނެެރެފައިވާ ޙުކުމާއި، ހައްޔަރު ކުރުމުގެ އަމުރު ބަލައިގަތުމަށް ވެސް ޔަހޫދީން ވަނީ ދެކޮޅު ހަދާފައެވެ.

2023ވަނަ އަހަރުގެ އޮކްޓޫބަރު މަހުގެ 7ވަނަ ދުވަހުން ފެށިގެން ދެ އަހަރު ދުވަހުގެ މުއްދަތަކަށް ޣައްޒާގައި ޔަހޫދީން ހިންގި ޤަތުލުޢާންމުގައި ޝަހީދު ކޮށްލާފައިވާ މީހުންގެ އަދަދު 70,000ށް އަރައެވެ. އޭގެ ތެރޭގައި ގިނައީ ކުށެއް ނެތް އަންހެނުންނާއި، މައުސޫމު ކުޑަކުދިންނާއި އުމޫރުންނެވެ. އަދި، ޒަޚަމު ކޮށްލާފައިވާ މީހުންގެ އަދަދު 158,000ށްވުރެ މައްޗަށް އަރައެވެ. ޔަހޫދީންގެ ޤަތުލުޢާންމު “ނަމެއްގައި” މެދުކަނޑައިލާފައި ވަނީ، އޮކްޓޫބަރު 10ވަނަ ދުވަހު ޔަހޫދީންނާއި ޣައްޒާގައި ވެރިކަން ކުރާ ޙަމާސާ ދެމެދު އަމަލު ކުރަން ފެށި އެއްބަސްވުމެއްގެ ދަށުންނެވެ.