Read Time:3 Minute, 41 Second
ދިވެހިރާއްޖޭގެ ކުރިކެޓު ކުޅުންތެރިންނަށް ދިމާވާ އެންމެ ބޮޑު ގޮންޖެހުމަކީ ގައުމުގައި ނެޗުރަލް ޓާފެއް ނެތުންކަމަށް ކުރިކެޓް ބޯޑް އޮފް މޯލްޑިވްސް (ސީބީއެމް)ގެ އެގްޒެކެޓިވް ކޮމިޓީގެ މެންބަރު އަހުމަދު ހުސައިން (ދޮނާ) ވިދާޅުވެއްޖެއެވެ. ޕީއެސްއެމް ނިއުސްއަށް ދެއްވި އިންޓަވިއުއެއްގައި އޭނާ ވިދާޅުވީ، ރާއްޖޭގައި ސިންތެޓިކް ޓާފުގައި ފަރިތަކުރުންތައް ކުރިއަށް ގެންދާއިރު، ބޭރުގެ މުބާރާތްތަކުގައި ކުޅެންޖެހެނީ ނެޗުރަލް ޓާފެއްގައި ކަމަށެވެ. މި ދެ ޓާފުގެ ތަފާތުގެ ސަބަބުން ބޯޅައިގެ ހަރަކާތާއި ބައުންސަށް ބޮޑު ތަފާތުތަކެއް އަންނަކަން އޭނާ ފާހަގަކުރެއްވިއެވެ.
މިކަމަށް ހައްލެއް ހޯދުމަށް މިހާރު މަސައްކަތް ކުރަމުން އަންނައިރު، ބޭރުގެ މުބާރާތްތަކަށް ދިއުމުގެ ކުރިން ލަންކާ ނުވަތަ އިންޑިއާ ފަދަ ގައުމުތަކުގައި ކޭމްޕުކޮށް ނެޗުރަލް ޓާފުގެ ތަޖުރިބާ ހޯދަންޖެހޭ ދަތިކަން މިހާރު ދިމާވެފައިވާ ކަމަށް އަހުމަދު ވިދާޅުވިއެވެ.
ސީބީއެމްއިން މިހާރު މަސައްކަތްކުރަމުން އަންނަނީ ފުވައްމުލަކުގައި މިހާރު ފަރިތަކުރަމުންދާ ކުރިކެޓު ގުރައުންޑް ތަރައްގީކޮށް ޒަމާނީ ފެންވަރުގެ ނެޗުރަލް ޓާފެއް އެޅުމަށް ކަމަށް އޭނާ ހާމަކުރެއްވިއެވެ. މިކަމަށް ބޭރުގެ އެހީތެރިކަން ހޯދުމަށް މަސައްކަތްކުރަމުންދަނީ، ޓާފެއް އެޅުމާއި ބެލެހެއްޓުމަކީ ބޮޑު ޚަރަދެއް ހިނގާ ކަމަކަށްވާތީއެވެ. މިކަމުގައި އިންޑިއާ ނުވަތަ ސިލޯނު ކުރިކެޓު އެސޯސިއޭޝަނާ ގުޅިގެން މަސައްކަތް ކުރެވެމުންދާ ކަމަށް އޭނާ ވިދާޅުވިއެވެ.
ރާއްޖޭގައި ނެޗުރަލް ޓާފެއް އެޅިއްޖެނަމަ އެއީ ކުރިކެޓަށް ލިބިގެންދާނެ ބޮޑު ކުރިއެރުމެއްކަމަށާއި، ބައިނަލްއަގްވާމީ މުބާރާތްތައް ރާއްޖޭގައި ބޭއްވުމުގެ ފުރުސަތު ލިބިގެންދާނެ ކަމަށް އަހުމަދު ފާހަގަކުރެއްވިއެވެ. ފުވައްމުލަކަކީ މިވަގުތު މިފަދަ ޓާފެއް އެޅުމަށް އެންމެ އެކަށީގެންވާ ސިޓީކަމަށް ވެސް އޭނާ ވިދާޅުވިއެވެ. އެއީ އެ ސިޓީގައި އެކޮމޮޑޭޝަން، ޗޭންޖިން ރޫމް އަދި ސައިޒަށް ފެތޭ ދަނޑުވެސް ހުރި ކަމަށް ވާތީއެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0