Read Time:2 Minute, 56 Second
(ފޮޓޯ ކްރެޑިޓްސް: ޕީއެސްއެމް ނިއުސް)
ގައުމީ ޕެރަ ޓީމުގެ ކޯޗު މުހަންމަދު ސަމީރު ވިދާޅުވީ، ރާއްޖޭގެ ޕެރަ އެތުލީޓުން މަސައްކަތްކުރާނީ ލޯ މެޑައްޔަކުން ރިހި މެޑައްޔަކަށް، އަދި އެއަށްފަހު ރަން މެޑައްޔަކަށް ބަދަލުކޮށް ގައުމު ފަޚުރުވެރިކޮށްލުމަށް ކަމަށެވެ. މިމަހުގެ 7 އިން 12 އަށް ދުބާއީގައި ބޭއްވުނު އޭޝިއަން ޔޫތު ޕެރަ ގޭމްސްގައި، މުހައްމަދު ރިޒްހާންވަނީ 12 އަހަރާއި 16 އަހަރާ ދެމެދުގެ އުމުރުފުރާއިން 50 މީޓަރު ފްރީ ސްޓައިލް ފެތުމުން ރާއްޖެއަށް ލޯ މެޑަލް ހޯދައިދީފައެވެ. މިއީ ރާއްޖޭގެ ޕެރަ އެތުލީޓަކު ފެތުމުން މިހާތަނަށް ހޯދި އެންމެ ބޮޑު ކާމިޔާބީއެވެ.
ކޯޗު ސަމީރު ވިދާޅުވީ، މުބާރާތަށް ފުރުމުގެ ކުރިން މިފަދަ ނަތީޖާއެއް ލިބިދާނެކަމަށް އުންމީދު ނުކުރެވުނު ނަމަވެސް، މި ކާމިޔާބީއަކީ ހީނުކުރާ ފަދަ އުފާވެރިކަމެއް ކަމަށާއި، ކުރިއަށް އޮތް މުބާރާތްތަކަށް އައު ހިތްވަރެއް ލިބިފައިވާ ކަމަށެވެ. އަދި ލޯ މެޑަލް ހޯދި ރިޒްހާނަށް ކޯޗާއެކު ފަރިތަކުރެވުނީ އެންމެ ހަފްތާއެއްހާ ދުވަހު ކަމަށް އޭނާ ފާހަގަކުރެއްވިއެވެ.
ސަމީރު ވަނީ ރާއްޖޭގެ އެކި ހިސާބުތަކުގައި ތިބި މޮޅެތި ޕެރަ އެތުލީޓުން ކޯޗުންނާއި ހަމައަށް ގެނެސްދީ އިތުރަށް ތަމްރީނުކުރުމަށް އެންމެން މަސައްކަތްކޮށްދިނުމަށް އެދިވަޑައިގެންފައެވެ. އޭނާގެ އުންމީދަކީ ޕެރަ ޓީމަށް ކުދިން އިތުރުކޮށް ޓީމު ވަރުގަދަކުރުމެވެ. މި މުބާރާތުގައި ރާއްޖެއިން 4 އެތުލީޓަކު (3 ފެތުންތެރިންނާއި 1 އެތުލެޓިކްސް ކުޅުންތެރިއެއް) ވާދަކުރި އިރު، 35 ގައުމަކުން 1500 އަށްވުރެ ގިނަ އެތުލީޓުން 8 ކުޅިވަރަކުން ވާދަކޮށްފައިވެއެވެ.
Happy
0 %
Sad
0 %
Excited
50 %
Sleepy
0 %
Angry
50 %
Surprise
0 %
0
0