“ބޮޑުކަންނެލީގެ ޒަމާންވީ ކަންބޮޑުވުންތަކަށް އަލި މަގެއް ފެންނަން ފެށީ މިދައުރުގައި”

Read Time:4 Minute, 57 Second

(ފޮޓޯ ކްރެޑިޓްސް: ރައީސް އޮފީސް)

ބޮޑުކަންނެލީގެ މަސްވެރިންގެ ކަންބޮޑުވުންތަކަކީ އާ ކަންތައްތަކެއް ނޫނެވެ. އައިސްގެ ދަތިކަމާއި، ހަމަ އަގެއްގައި މަސް ނުގަނެވުމާއި، ފައިސާ ލިބުން ލަސްވުމަކީ ދިގު މުއްދަތަކަށް ދިމާވެފައިވާ މައްސަލަތަކެކެވެ. މިކަންކަމާ ގުޅިގެން މަސްވެރިން ސަރުކާރުތަކާ މަޝްވަރާކޮށް، މަސްވެރިންގެ ދުވަހާ ގުޅުވައިގެން މުޒާހަރާވެސް ކުރެއެވެ. ނަމަވެސް މިހާތަނަށް އެއްވެސް ޢަމަލީ ހައްލެއް ފެނިފައެއް ނުވެއެވެ. ކުރީގެ ރައީސް އިބްރާހީމް މުޙައްމަދު ޞާލިޙު ވެސް މަސްވެރިންނާ ބައްދަލުކުރައްވައި ހައްލު ހޯއްދަވައިދެއްވާނެކަމަށް ވިދާޅުވި ނަމަވެސް، އެމަނިކުފާނުގެ ދައުރު ނިމުނުއިރު މަސްވެރިންނަށް ދޭންޖެހޭ 230 މިލިއަން ރުފިޔާ ނުދައްކާ އޮތެވެ.

މިފަދަ ހާލަތެއްގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެރިކަމާ ހަވާލުވެވަޑައިގަތީ މަސް ކިރާތާ 48 ގަޑިއިރު ތެރޭގައި ފައިސާ ދޫކުރާނެކަމަށާއި، މަސްވެރިކަން ދިވެހި އިޤްތިޞާދުގެ މައި ލޭނާރަށް ހައްދަވައިދެއްވާނެކަމުގެ ވަޢުދާއެކުއެވެ. މި ވަޢުދުފުޅާ އެއްގޮތަށް، ކުރީ ސަރުކާރުން ނުދީ އޮތް 230 މިލިއަން ރުފިޔާ މަސްވެރިންނަށް ދައްކައި، މަސް ކިރާތާ 48 ގަޑިއިރުގެ ތެރޭގައި ފައިސާ ދޫކުރަން ފެށީ 2024 ވަނަ އަހަރުގެ ޑިސެންބަރު މަހުގެ 9 ވަނަ ދުވަހުއެވެ. މަސްވެރިންގެ ބޮޑު ކަންބޮޑުވުމެއް ކަމަށްވާ ހަމަ އަގުގައި މަސް ނުގަތުމުގެ މައްސަލައަށް ހައްލު ހޯދުމަށް ސަރުކާރުން މިހާރު ދަނީ ހުޅުމާލޭގައި މަސް ޕްރޮސެސިން ފެސިލިޓީއެއް އަޅައި، ސަރުކާރުން ބޮޑުކަންނެލި ގަންނަން ތައްޔާރުވަމުންނެވެ. މި މަސައްކަތުގެ ޢަމަލީ ފެށުން އަންނަ މަހު އޮންނާނެކަމަށް މަސްވެރިކަމާ ބެހޭ ވަޒީރު އަޙްމަދު ޝިޔާމް ވިދާޅުވިއެވެ. މީގެ އިތުރުން، ތެޔޮ އަގުހެޔޮކޮށް ނުލިބުމުގެ ކަންބޮޑުވުމަށް ހައްލު ހޯދުމުގެ ގޮތުން އަންނަ މާރިޗު މަހުގެ ނިޔަލަށް ކޮންމެ އަތޮޅަކުންވެސް ރަށެއްގައި ހެޔޮ އަގުގައި ތެޔޮ ލިބޭނެ ސްޓޭޝަނެއް ޤާއިމުކުރުމަށް ސަރުކާރުން އަމާޒު ހިފާފައިވާއިރު، ފުރަތަމަ ޝެޑް ރ. ދުވާފަރުގައި މިމަހުގެ 13 ވަނަ ދުވަހު ހުޅުވާފައިވެއެވެ.

އައިސް ލިބުމުގައި ދިމާވާ ދަތިކަން ހައްލުކުރުމަށް ރައީސް މުޢިއްޒުގެ ސަރުކާރުން ދަނީ އޮޑިފަހަރުގައި ލޮނުފެނުން މަސް ފިނިކުރާ އާރުއެސްޑަބްލިޔު ސިސްޓަމްތައް ހަރުކުރުމަށް ލުއި ލޯނު ދެމުންނެވެ. މިފްކޯއިން މި ސިސްޓަމްތައް ހަރުކޮށްދެއެވެ. މީގެ އިތުރުން، ރަށްރަށުގައި އައިސް ޕްލާންޓްތައް ހެދުމުގެ މަސައްކަތްވެސް ސަރުކާރުން ކުރަމުން ދެއެވެ. މިގޮތުން، ޒަމާނުއްސުރެ މަސްވެރިންނަށް ދިމާވަމުން އަންނަ މައްސަލަތަކަށް ދާއިމީ ހައްލުތަކެއް ހޯދައިދީ، މަސްވެރިކަމުގެ ސިނާޢަތް ކުރިއެރުވުމަކީ މި ސަރުކާރުގެ އަމާޒެކެވެ.