Read Time:3 Minute, 10 Second
(ފޮޓޯ ކްރެޑިޓްސް: ޕީއެސްއެމް ނިއުސް)
ބ. ދަރަވަންދޫ އެއާޕޯޓުގެ ޓާމިނަލް އިތުރަށް ތަރައްޤީކުރުމުގެ ޑިޒައިން އަދި ކޮންސަލްޓެންސީ މަސައްކަތް އީޕޯޗް އެސޯސިއޭޓްސް ޕްރައިވެޓް ލިމިޓެޑާ ހަވާލުކޮށްފިއެވެ. މި މަސައްކަތްތަކާބެހޭ އެއްބަސްވުމުގައި އައިލެންޑް އޭވިއޭޝަންގެ މެނޭޖިންގ ޑިރެކްޓަރ އިބްރާހީމް އިޔާސްއާއި، އީޕޯޗް އެސޯސިއޭޓްސްގެ މެނޭޖިން ޑިރެކްޓަރ މުޢާވިޔަތް އަބްދުއްސައްތާރު ވަނީ ސޮއިކުރައްވާފައެވެ. އައިލެންޑް އޭވިއޭޝަންގެ ޑެޕިއުޓީ މެނޭޖިން ޑިރެކްޓަރ އަލީ ސަލީމް ވިދާޅުވީ، ޑިޒައިން މަސައްކަތް 45 ދުވަހުގެ ތެރޭގައި ނިންމާނެ ކަމަށާއި، އޭގެ ފަހުން ތަރައްޤީކުރުމުގެ އަމަލީ މަސައްކަތް ފެށޭނެ ކަމަށެވެ. މި މަޝްރޫޢުގެ ދަށުން އެރައިވަލް ހޯލް ބޮޑުކުރުމާއި، ޗެކިން އަދި އެރައިވަލް ބެލްޓް އިތުރުކުރެވޭނެއެވެ. އަދި ޑިޕާޗަރ ހޯލުގައި ކެފޭއެއް ހެދުމާއި، ޑިޕާޗަރ ގޭޓް އިތުރުކުރެވޭނެއެވެ. ޖުމްލަ 814 އަކަމީޓަރުގެ އިމާރާތް ކުރުމަށް ހަމަޖެހިފައިވެއެވެ.
ސަލީމް ވިދާޅުވީ، މި މަސައްކަތުގެ ސަބަބުން ބ. އަތޮޅުގެ އިޤްތިޞާދަށް ވަރަށް ބޮޑެތި ފައިދާތައް ކުރާނެ ކަމަށާއި، ބައިނަލްއަޤްވާމީ އެއާޕޯޓެއްގެ ފެންވަރުގެ ޚިދުމަތްތަކެއް ދެވޭނެ ކަމަށެވެ. މީގެ ސަބަބުން މި ސަރަޙައްދުގެ ފަތުރުވެރިކަން އިތުރަށް ކުރިއަރާނެ ކަމަށްވެސް އޭނާ ވިދާޅުވިއެވެ. ދަރަވަންދޫ އެއާޕޯޓު ތަރައްޤީ ކުރުމުގެ މަސައްކަތަކީ ރައީސުލްޖުމްހޫރިއްޔާގެ ރިޔާސީ ވަޢުދެކެވެ. ދަރަވަންދޫ އެއާޕޯޓު ޚިދުމަތް ދޭން ފެށިތާ 14 އަހަރު ވެފައިވާއިރު، ބ. އަތޮޅަކީ ގިނަ ރިސޯޓުތަކާއި ލޯކަލް ޓޫރިޒަމް ފުޅާވަމުންދާ އަތޮޅަކަށްވާތީ، މި އެއާޕޯޓަކީ އެ ސަރަހައްދުގެ ފަތުރުވެރިކަމަށް ވަރަށް މުހިއްމު އެއާޕޯޓެކެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0