އެފްރިކާ ކަޕުގެ ސަބަބުން މެންޗެސްޓާ ޔުނައިޓެޑަށް ގެއްލުންވާނެ: ކޯޗު

Read Time:3 Minute, 31 Second

މި މަހު ފަހުކޮޅު ފަށާ އެފްރިކާ ކަޕް ފުޓްބޯޅަ މުބާރާތުގެ ސަބަބުން މެންޗެސްޓާ ޔުނައިޓަށް ގެއްލުންވާނެ ކަމަށް އެ ކުލަބުން ބުނެފި އެވެ. ކޯޗު ރުބެން އަމޮރިމް މިހެން ބުނީ ޔުނައިޓެޑްގެ ވަރަށް މުހިންމު ތިން ކުޅުންތެރިއަކު މި މުބާރާތުގައި ގައުމީ ޓީމަށް ކުޅެން ދާން ޖެހޭތީ އެވެ. އެ ތިން ކުޅުންތެރިންނަކީ ކެމަރޫނުގެ ބަރަޔަން އެމްބުއެމޯ އާއި އައިވަރީ ކޯސްޓްގެ އަމަޑް ޑިއާލޯ އާއި މޮރޮކޯގެ ނޯސައިރް މަޒްރައުއީ އެވެ. “ވަރަށް މުހިންމު ވަގުތެއްގައި ވަރަށް މުހިންމު ކުޅުންތެރިންތަކެއް ޓީމާ ވަކިވުމަކީ ލިބޭނެ ވަރަށް ބޮޑު ގެއްލުމެއް. އަހަރުމެންނަށް މިވަގުތު ވަރަށް މުހިންމު ކުޅުންތެރިންތަކެއް ޓީމާ އެވަކިވަނީ. މީގެ ސަބަބުން ޔުނައިޓެޑް ފަދަ ޓީމުތަކަށް މީގެ ސަބަބުން ވަރަށް ގެއްލުންވާނެ. އެކަމަކު މި މުބާރާތަކީ ވެސް ކުޅުންތެރިންނަށް މުހިންމު މުބާރާތެއް،” އަމޮރިމް ބުންޏެވެ.

އޭނާ ބުނީ މުހިންމު ކުޅުންތެރިންތަކެއް ގެއްލުމުން އެ ކުޅުންތެރިން ނެތްތަން ފޫބައްދަން ޖެހޭނީ ޓީމުގައި އެހެން ކުޅުންތެރިން ބޭނުންކޮށްގެން ކަމަށާއި ނަމަވެސް ކޮންމެ ކުޅުންތެރިއެއްގެ މަގާމު ކުއްލިއަކަށް ފޫބެއްދުމަކީ އެހާ ފަސޭހަ ކަމަކަށް ނުވާނެ ކަމަށެވެ. “ޕްރެމިއާ ލީގުގައި އެބަތިބި މި މުބާރާތުގެ އަސަރު ނުކުރާ ޓީމުތައް ވެސް. އަހަރުމެންނަކީ އެންމެ ބޮޑަށް އެފރިކާ ކަޕުގެ އަސަރު ކުރާނެ އެއް ޓީމު. މިއީ ޔުނައިޓެޑް ވަރަށް ބޮޑަށް ވިސްނަންޖެހޭ ކަމެއް،” ކޯޗު ބުންޏެވެ. ޔުނައިޓެޑް މިވަގުތު އޮތީ 15 މެޗުން 25 ޕޮއިންޓާއެކު ޓޭބަލުގެ އަށް ވަނާގަ އެވެ. އަމޮރިމް ބުނީ ޑިސެމްބަރު ޖެނުއަރީ މަހަކީ ސީޒަނުގެ އެންމެ މުހިންމު ދުވަސްކޮޅު ކަމަށެވެ.

“ސަބަބަކީ މިއީ ސީޒަން އެންމެ ބާރުބޮޑުވާ ވަގުތު. މި ވަގުތު މުހިންމު ކުޅުންތެރިންތަކެއް މަދުވުމަކީ ގެއްލުމެއް. އެކަމަކު މިއާއެކު ކުރިއަށްދާން ޖެހޭނީ،” އަމޮރިމް ބުންޏެވެ. މޮރޮކޯގައި އެފްރިކާ ކަޕް ފުޓްބޯޅަ މުބާރާތް ފަށާނީ އަންނަ ހަފުތާގަ އެވެ.