Read Time:3 Minute, 42 Second
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެފައިވަނީ ބޮޑު ކަންނެލީގެ މަސްވެރިންނަށް ދިމާވާ މައްސަލަތަކަށް ދެމެހެއްޓެނިވި ހައްލެއް ހޯދައިދެއްވުމަކީ ސަރުކާރުގެ އަމާޒެއް ކަމަށެވެ. މިއަހަރުގެ މަސްވެރިންގެ ދުވަހުގެ ރަސްމިއްޔާތުގައި ވާހަކަފުޅުދައްކަވަމުން ރައީސް ފާހަގަކުރެއްވީ ޕްރައިވެޓް ކުންފުނިތަކުން މަސްގަތުމަށްފަހު ފައިސާ ދިނުން ލަސްވުމަކީ މަސްވެރިންގެ އެންމެ ބޮޑު އެއް ކަންބޮޑުވުން ކަމަށެވެ. މިކަމަށް ހައްލެއްގެ ގޮތުން ސަރުކާރުގެ ފަރާތުން މަސް ގަނެ، ދެމެހެއްޓެނިވި ގޮތެއްގައި މަސްވެރިންނަށް 48 ގަޑިއިރުގެ ތެރޭގައި ފައިސާ ލިބޭނެ ނިޒާމެއް ޤާއިމުކޮށްފައިވާކަން ރައީސް ފާހަގަކުރެއްވިއެވެ. މި ނިޒާމު އިތުރަށް ހަރުދަނާކުރުމަށް ކަނޑުއޮށްގިރި އަދި ހުޅުމާލޭގައި މަސް ޕްރޮސެސިންގ ފެސިލިޓީތައް ގާއިމުކުރުމުގެ މަސައްކަތް މިހާރު ކުރިއަށްދާކަމަށް ވިދާޅުވިއެވެ.
މީގެ އިތުރުން މަސްވެރިންނަށް އައިސް ލިބުމުގައި ދިމާވާ ދަތިތަކަށް ހައްލެއްގެ ގޮތުން އޮޑިފަހަރުގައި ލޮނު ފެނުން މަސް ފިނިކުރާ އާރުއެސްޑަބްލިޔު ސިސްޓަމްތައް ހަރުކުރުމަށް 35 ދޯންޏަކަށް ލޯން ދޫކޮށްފައިވާކަމަށާއި އިތުރު 200 ދޯންޏަށް ލޯން ދޫކުރާނެކަން ރައީސް ވިދާޅުވިއެވެ. އަދި ރާއްޖޭގެ އެކި ކަންކޮޅުތަކުގައި ކޯލްޑް ސްޓޯރޭޖް ފެސިލިޓީތައް ތަރައްޤީކުރުމުގެ މަސައްކަތްވެސް ކުރައްވަމުން އެބަ ގެންދެވައެވެ. ހެޔޮ އަގުގައި މަސްވެރިންނަށް ތެޔޮ ފޯރުކޮށްދިނުމުގެ ގޮތުން އަންނަ އަހަރުގެ މާރިޗު މަހުގެ ނިޔަލަށް ކޮންމެ އަތޮޅެއްގައި ތެޔޮ ސްޓޭޝަނެއް ޤާއިމުކުރެވޭނެކަމަށް ރައީސުލްޖުމްހޫރިއްޔާ ވިދާޅުވިއެވެ.
ސަރުކާރުގެ އަމާޒަކީ ދިވެހި މަސްވެރިންގެ ހުރިހާ ކަންބޮޑުވުމަކަށް ހައްލު ހޯދައިދީ، މަސްވެރިކަމުގެ ސިނާޢަތަށް އިންގިލާބީ ކުރިއެރުމެއް ގެނެސްދިނުމެވެ. މިހާތަނަށް ވެސް މަސްވެރިންނަށް ލުއި ލޯން ލިބޭނެ އިންތިޒާމު ހަމަޖެހިފައިވާއިރު، މަސް ކިރާތާ 48 ގަޑިއިރުގެ ތެރޭގައި ފައިސާ ދޭން މިހާރު ވަނީ ފަށާފައެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0