Read Time:3 Minute, 9 Second
(ފޮޓޯ ކްރެޑިޓްސް: ޕީއެސްއެމް ނިއުސް)
މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ތަފާސްހިސާބުތަކުން ދައްކާ ގޮތުގައި، މިދިޔަ އޮކްޓޫބަރު މަހުގެ ނިޔަލަށް ރަސްމީ ރިޒާވުގައި 866 މިލިޔަން ޑޮލަރު ހުރިއިރު، މިއަހަރުގެ ޖުލައި މަހުން ފެށިގެން ރަސްމީ ރިޒާވް ދެމެހެއްޓެނިވި ގޮތެއްގައި އިތުރުވަމުން އަންނަ ކަމަށެވެ. ސެޕްޓެންބަރު މަހާ އަޅާބަލާއިރު އޮކްޓޫބަރު މަހު ރަސްމީ ރިޒާވް ވަނީ 0.79 އިންސައްތަ އިތުރުވެފައެވެ. ރަސްމީ ރިޒާވް އިތުރުވެފައިވީ ނަމަވެސް، ކުރު މުއްދަތަށް ދައްކަންޖެހޭ ބޭރު ފައިސާގެ އިލްތިޒާމުތައް ވަނީ އިތުރުވެފައެވެ. އޮކްޓޫބަރު ނިޔަލަށް 789.6 މިލިޔަން ޑޮލަރުގެ ކުރު މުއްދަތުގެ އިލްތިޒާމުތައް ހުރިއިރު، ކުރީ މަހު މި އަދަދު ހުރީ 781.7 މިލިޔަން ޑޮލަރުގައެވެ. މިކަމުގެ ސަބަބުން ބޭނުންކުރެވޭ ރިޒާވް ދަށްވެ، އޮކްޓޫބަރު ނިޔަލަށް 193 މިލިޔަން ޑޮލަރަށް ވަނީ ދަށްވެފައެވެ. ސެޕްޓެންބަރު މަހާ އަޅާބަލާއިރު މިއީ 1.4 އިންސައްތަ ދަށްވުމެކެވެ.
ރިޒާވް ހަރުދަނާކުރުމަށް ސަރުކާރުން ގިނަ މަސައްކަތްތަކެއް ކުރަމުންދާ ކަމަށާއި، މިގޮތުން ބޭންކުތަކަށް ލިބޭ ޑޮލަރުގެ 60 އިންސައްތަ ރިޒާވަށް ޖަމާކުރުމުގެ އިތުރުން، ފަތުރުވެރިކަމުން ލިބޭ އާމްދަނީ އިތުރުވެފައިވާ ކަމަށާއި، ބޭންކް އޮފް އިންޑިއާއާ އެކު ސޮއިކޮށްފައިވާ 400 މިލިޔަން ޑޮލަރުގެ ކަރަންސީ ސްވޮޕަކީ ރިޒާވަށް ހެޔޮ ބަދަލެއް ގެނުވި ސަބަބެއް ކަމަށް އެމްއެމްއޭއިން ފާހަގަކުރެއެވެ. ރާއްޖެއިން އެންމެ ބޮޑު ދަރަނި ދައްކަންޖެހެނީ މި އަހަރާއި އަންނަ އަހަރު ކަމަށްވާތީ، އަންނަ އަހަރު 1 ބިލިޔަން ޑޮލަރަށްވުރެ ގިނަ އަދަދެއް ދައްކަންޖެހޭތީ ރިޒާވް ހަރުދަނާވުމަކީ ވަރަށް މުހިންމު ކަމެއް ކަމަށް އެމްއެމްއޭއިން ބުނެއެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0