އިންޑޮނޭޝިއާ މުބާރާތުގެ ކާމިޔާބީއާއި ސްކޭޓް އެރީނާއަކީ ބޮޑު ކާމިޔާބީއެއް: ހާނިމް

Read Time:4 Minute, 6 Second

(ފޮޓޯ ކްރޭދިޓްސް: ޕީއެސްއެމް ނިއުސް)

ސްކޭޓް މޯލްޑިވްސްގެ ރައީސް މުޙައްމަދު ހާނިމް ވިދާޅުވާ ގޮތުގައި، މި އަހަރުގެ އެންމެ ބޮޑު ކާމިޔާބީތަކަކީ އިންޑޮނޭޝިއާ މުބާރާތުން ލިބުނު ކާމިޔާބީއާއި ސްކޭޓް އެރީނާއެއް ލިބުން ކަމަށެވެ. އިންލައިން ސްކޭޓިންއިން މި އަހަރު މެއި މަހު އިންޑޮނޭޝިއާގައި ބޭއްވި ސީރީޒްގައި ވާދަކޮށް ރާއްޖެއަށް އެއް ރަން، އެއް ރިހި އަދި އަށް ލޯ މެޑަލް ހޯދައިދެވުނު ކަމަށާއި، މިއީ މި ކުޅިވަރުން ބައިނަލްއަޤްވާމީ ފެންވަރުގައި ރާއްޖެއަށް ލިބުނު އެންމެ ފުރިހަމަ ކާމިޔާބީ ކަމަށް ހާނިމް ފާހަގަކުރެއްވިއެވެ. 19 ކުދިންނާ އެކު ދެ އަހަރެއްހާ ދުވަހު ތައްޔާރުވެގެން މި މުބާރާތަށް ފުރީ މެޑަލްތަކެއްގެ އުންމީދުގައި ކަމަށާއި، އުންމީދުކުރި ވަރަށް ވުރެ މާ ބޮޑަށް ރަނގަޅު ނަތީޖާއެއް (10 މެޑަލް) ލިބުނުކަން އޭނާ ފާހަގަކުރެއްވިއެވެ. މިއީ ސްކޭޓިން ތާރީޚުގައި ރަން ޞަފުހާއެއް ހުޅުވުނު ކާމިޔާބީއެއް ކަމަށާއި، މި މުބާރާތުގައި ފަސް ގައުމަކުން 595 ސްކޭޓަރުން ވާދަކުރި ކަމަށް ވެސް ހާނިމް ވިދާޅުވިއެވެ.

(ފޮޓޯ ކްރެޑިޓްސް: ޕީއެސްއެމް ނިއުސް)

މީގެ އިތުރުން، ސްކޭޓަރުންގެ ދުވަސްވީ ހުވަފެނެއް ކަމަށްވާ ސްކޭޓިން އެރީނާ މާލޭގެ މުހިންމު ސަރަހައްދެއްގައި ބިނާކުރަން ފެށުމަކީ ވެސް މި އަހަރުގެ އެންމެ ބޮޑު ކާމިޔާބީއެކެވެ. ރައީސުލްޖުމްހޫރިއްޔާ ޑރ. މުޙަންމަދު މުޢިއްޒުގެ ދީލަތިފުޅުކަމާ އެކު، އުސްފަސްގަނޑު ފަދަ ސަރަހައްދަކުން ބިމެއް ދެއްވައިގެން އޮކްޓޯބަރު 2 ގައި ބިންގާ އެޅުނު މި އެރީނާއަކީ، މި ކުޅިވަރަށް ސަރުކާރުން ދެއްވާ ޚާއްސަ އަހަންމިއްޔަތުކަން ދައްކުވައިދޭ ކަމެއް ކަމަށް ހާނިމް ވިދާޅުވިއެވެ. މި އެރީނާއަކީ، މި ކުޅިވަރު ކުރިއެރުވުމަށްޓަކައި، އިތުރަށް ވާދަވެރި ރޫހެއްގައި ބައިނަލްއަޤްވާމީ މުބާރާތްތަކުގައި ބައިވެރިވެ، ކުދިން ތަމްރީނުކުރުމަށް އެޅޭ ބިންގަލެއް ކަމަށް ސްކޭޓް މޯލްޑިވްސްއިން ސަރުކާރަށް ވަރަށް ބޮޑަށް ޝުކުރު އަދާކުރިއެވެ. މި މަސައްކަތް އާރްސީސީގެ ސީއެސްއާރުގެ ދަށުން މި އަހަރު ނިމުމުގެ ކުރިން ނިންމަން އަމާޒު ހިފާފައި ވެއެވެ. މި ކުޅިވަރަށް ތިން އަހަރުގެ ކުދިން ވެސް ގަވާއިދުން ފަރިތަކުރުންތަކުގައި ބައިވެރިވަމުންދާތީ، މިއީ މުސްތަޤްބަލު އޮތް ކުޅިވަރެއް ކަމަށް ހާނިމް ފާހަގަކުރެއްވިއެވެ.