އަޔާޒް އާއި ފާސިރު ނުހިމަނައި ޤައުމީ ފުޓްސަލް ޓީމުގެ ސްކޮޑު އިޢުލާންކޮށްފި

Read Time:4 Minute, 1 Second

(ފޮޓޯ ކްރެޑިޓްސް: ޕީއެސްއެމް ނިއުސް)

އަންނަ އަހަރު ތައިލެންޑުގެ ނޮންތަންބުރީގައި ބާއްވާ ސާފް ފުޓްސަލް ޗެމްޕިއަންޝިޕަށް ރާއްޖޭގެ ޤައުމީ ފުޓްސަލް ޓީމުގެ ސްކޮޑު ވަނީ އިޢުލާންކޮށްފައެވެ. 18 ކުޅުންތެރިން ހިމެނޭ މި ސްކޮޑުން އަލަށް ފުރުސަތު ހޯދި ކުޅުންތެރިންގެ ތެރޭގައި ހުސެއިން ޝަރީފް، ޢަބްދުﷲ ޖުނައިދު، އަލީ ހައިޝަމް، މުޙައްމަދު އިސާމް، ޢަބްދުﷲ ޝާފިއު އަދި އަޙްމަދު ހަމީދު ހިމެނެއެވެ. އޭޝިއަން ކަޕުގެ ސްކޮޑުގައި ހިމެނުނު މުޙައްމަދު އިމްރާން، އިޝާން އިބްރާހީމް، ހުޒައިފަތު ރަޝީދު، އަލީ ޝިޔާހު، އަލީ ޝަމާލް ޢަބްދުﷲ، އަޙްމަދު ރާހިލް ރަޝީދު، ހަސަން ސުހައިލް އަދި އިސްމާޢީލް ވަޖީހު ވަނީ ސްކޮޑުން ޖާގަ ހޯދާފައެވެ. ކީޕަރުންގެ ގޮތުގައި މުހައްމަދު ލުފްސާން، އިބްރާހީމް ނާޖިހު، ޢަބްދުﷲ ޒިމާމް އަދި ޒައިދާން އަޙްމަދު ހިމެނެއެވެ.

އޭޝިއަން ކަޕުގައި ކުޅުނު މުޙައްމަދު ފާސިރު، އަޔާޒް އަޙްމަދު، އަލީ ހާފިޒް، ސާމިން މުޙައްމަދު ނަސީރު އަދި ޢަބްދުﷲ ނާސިހަށް މިފަހަރު ޖާގަ ލިބިފައެއް ނުވެއެވެ. ފާސިރާއި އަޔާޒް މިހާރު ކުޅެނީ ފުރަތަމަ ޑިވިޝަނުގެ ކުލަބުތަކުގައި ކަމަށްވާއިރު، ހާފިޒް ހުރީ އަނިޔާގައެވެ. ޖެނުއަރީ 13 އިން 26 އަށް ލީގު ފޯމެޓަށް ކުރިއަށްދާ މި މުބާރާތުގައި ސަރަހައްދީ ހަތް ގައުމަކުން ވާދަކުރާނެއެވެ. ރާއްޖޭން ފުރަތަމަ މެޗު ޕާކިސްތާނާ ދެކޮޅަށް ޖެނުއަރީ 14 ގައި ކުޅޭނެއެވެ. އެއަށްފަހު ޖެނުއަރީ 16 ގައި ބަންގްލަދޭޝްއާ، ޖެނުއަރީ 20 ގައި އިންޑިއާއާ، ޖެނުއަރީ 22 ގައި ނޭޕާލާ، ޖެނުއަރީ 24 ގައި ބޫޓާނާ އަދި ފަހު މެޗު ޖެނުއަރީ 26 ގައި ސްރީ ލަންކާއާ ދެކޮޅަށް ކުޅޭނެއެވެ.

މުބާރާތަށް ތައްޔާރުވުމުގެ ގޮތުން ޤައުމީ ޓީމު މި މަހު ފަހުކޮޅު ޗައިނާއަށް ތަމްރީނު ކޭމްޕަކަށް ދިޔުމަށް ހަމަޖެހިފައިވެއެވެ. ޓީމުގެ ހެޑް ކޯޗު ފާރޫކް ޒަކިރޯވް ވިދާޅުވެފައިވަނީ މި ކޭމްޕުގެ ބޭނުމަކީ އިންޑޯއަށް ފަރިތަވެލުން ކަމަށާއި، މިގޮތަށް 10 ވަރަކަށް ދުވަހު ފަރިތަކުރެވިއްޖެނަމަ ވަރުގަދަ ޓީމެއް މުބާރާތަށް ނެރެވޭނެ ކަމުގެ އުއްމީދު ބޮޑު ކަމަށެވެ. ޒަކިރޯވްއަށް މި މުބާރާތަށް ޓީމު ތައްޔާރުކުރުމުގައި އެހީތެރިވަނީ ކޯޗު އަޙްމަދު ނިޔާޒް، އަޙްމަދު އަހުސަން، މުޙައްމަދު ފުހެއިދު އަދި މުޙައްމަދު އިހުސާނެވެ.