މި ސަރުކާރުން މަސްވެރިންނަކީ ދައުލަތް ދަންނަ ބަޔަކަށް ހަދާދީފި

Read Time:4 Minute, 13 Second

(ފޮޓޯ ކްރެޑިޓްސް: ރައީސް އޮފީސް)

މަސްވެރިކަމަކީ ދިވެހީންގެ ލޭނާރާއި ޤައުމުގެ އިޤްތިޞާދުގެ އެންމެ ބޮޑު އެއް ބިންގަލެވެ. ދިވެހީންގެ ދިރިއުޅުމާއި ޘަޤާފަތާއި ތާރީޚާ ވަރަށް ބޮޑަށް ގުޅިފައިވާ މި މަސައްކަތަކީ، ޤައުމުގެ މިނިވަންކަން ދަމަހައްޓައިދޭ އެއް ވަސީލަތްވެސް މެއެވެ. ނަމަވެސް ކުރީގެ ސަރުކާރުތަކުގައި މި ސިނާޢަތަށް ދިމާވެފައިވާ ގޮންޖެހުންތައް ހައްލުކުރުމަށް އެދެވޭ މަސައްކަތްތަކެއް ކޮށްފައިނުވެއެވެ. މި ސަރުކާރުން މަސްވެރިކަމުގެ ދާއިރާއަށް އައު އުންމީދުތަކެއް ގެނެސް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ މަސްވެރިކަން ރާއްޖޭގެ ހަޤީޤީ ލޭނާރަށް ހެދުމަށް ގިނަ މަސައްކަތްތަކެއް ކުރައްވާފައެވެ.

މިގޮތުން، މަސް ކިރާ ވަގުތުން ފެށިގެން 48 ގަޑިއިރުގެ ތެރޭގައި މަސްވެރިންނަށް ފައިސާ ލިބޭނެ އިންތިޒާމު ހަމަޖައްސައި، ކުރިން ނުދީހުރި 250 މިލިއަން ރުފިޔާގެ ބެކްލޮގްވެސް ސާފުކޮށްފައިވެއެވެ. މަސް ގަންނަ ކާރުޚާނާތަކުގެ ކެޕޭސިޓީ އިތުރުކުރުމަށް ދެކުނުގައި މަސް ބަންދުކުރާ ކާރުހާނާއަކާއި އުތުރުގައި މަސް ގަންނަ ފެސިލިޓީއެއް ތަރައްޤީ ކުރުމަށް މަސައްކަތް ކުރަމުންދާ ކަމަށާއި، މަސް ޕްރޮސެސް ކުރުމުގެ ކެޕޭސިޓީ 25000 ޓަނަށް އިތުރުކުރުމަކީ ސަރުކާރުގެ އަމާޒެކެވެ. މާލީ ނިޒާމުގެ ތެރެއިންވެސް މަސްވެރިންނަށް އެތައް ފުރުސަތުތަކެއް ވަނީ ހުޅުވާލާފައެވެ. މަސްވެރިކަމުގެ ދަފްތަރެއް އެކުލަވާލައި، ރަޖިސްޓްރީވެފައިވާ ފަރާތްތަކަށް ބޭންކް އޮފް މޯލްޑިވްސްއިން ލޯނު ދޫކުރުމުގެ އިތުރުން ފަރުމަހުގެ މަސްވެރިކަމަށާއި، ދޯނިފަހަރުގައި އާރު.އެސް.ޑަބްލިއު ސިސްޓަމް ހަރުކުރުމަށްވެސް ލޯނު ދޫކުރަމުންދެއެވެ. އަދި 1 ނޮވެމްބަރުން ފެށިގެން ކަށިމިޔަރުގެ މަސްވެރިކަން ކުރުމުގެ ހުއްދަ ދީ، އޭގެ ޤަވާއިދުތައް އާންމުކޮށްފައިވެއެވެ.

މަސްވެރިކަމުގެ ސިނާޢަތް ސިންދަފާތު ކުރުމަށް ފަރުމަސްވެރިކަން ތަރައްޤީކޮށް، އެކުއަކަލްޗަރ އާއި މެރިކަލްޗަރ ފަދަ އާ ސިނާޢަތްތައް ތަރައްޤީ ކުރަމުންދެއެވެ. މުނިފޫހިފިލުވުމަށް ކުރާ މަސްވެރިކަން (ސްޕޯޓްސް ފިޝިން) ތަރައްޤީ ކުރުމަށްވެސް މަސައްކަތް ކުރެވެއެވެ. މި ސަރުކާރުން ވަނީ މަސްވެރިކަމުގެ ހުރިހާ ދޮރެއް ހުޅުވާލައި، މަސްވެރިންނަކީ ދައުލަތް ދަންނަ، އިޤްތިޞާދަށް ބޮޑު އެހީއެއް ފޯރުކޮށްދޭ ބަޔަކަށް ހަދާދީފައެވެ.