މުސްތަޤުބަލް ބިނާކުރުމުގައި ސާބިތުވެއޮތީ، ހާމަކަން ބޮޑު ޤައުމެއްގެ ގޮތުގައި: ރައީސް

Read Time:4 Minute, 53 Second

(ފޮޓޯ ކްރެޑިޓްސް: ރައީސް އޮފީސް)

ބައިނަލްއަޤްވާމީ އެންޓި-ކޮރަޕްޝަން ދުވަހުގެ މުނާސަބަތުގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވީ، ދިވެހިރާއްޖެއަކީ، ޤައުމުގެ މުސްތަޤްބަލް ބިނާކުރުމުގައި ހާމަކަން ބޮޑު، ޖަވާބުދާރީކުރުވުމާއި ނަޒާހާތްތެރިކަމަށް ޚާއްޞަ އަހަންމިއްޔަތުކަމެއް ދޭ ޤައުމެއް ކަމަށެވެ. މިކަމަށް ރާއްޖެއިން ދޭ އަހަންމިއްޔަތުކަން ފާހަގަކުރައްވައި، 2007 ވަނަ އަހަރު އ.ދގެ ކޮންވެންޝަން އަގެއިންސްޓް ކޮރަޕްޝަން (ޔޫ.އެން.ސީ.އޭ.ސީ) ގައި ދިވެހިރާއްޖެއިން ބައިވެރިވިކަން ރައީސް ފާހަގަކުރެއްވިއެވެ.

ރައީސް ވިދާޅުވީ، ނިޒާމީ ކޮރަޕްޝަނުގެ ސަބަބުން ޤާނޫނުގެ ވެރިކަން ބަލިކަށިވެ، ދެމެހެއްޓެނިވި ތަރައްޤީއަށް ހުރަސްއެޅި، ރައްޔިތުންގެ ޙައްޤުތައް ނިގުޅައިގަނެވޭ ކަމަށެވެ. އެހެންކަމުން، މި ސަރުކާރުން ކޮރަޕްޝަނަށް އެއްވެސް ޖާގައެއް ނުދޭނެ ކަމަށާއި، ކޮރަޕްޝަނާއި ފަސާދައިގެ ނުރައްކަލާ ދެކޮޅަށް މަސައްކަތްކުރާނެ ކަމުގެ ޔަޤީންކަން ދެއްވިއެވެ. ކޮރަޕްޝަނާ ދެކޮޅަށް ސަރުކާރުން އަޅާނެ ފިޔަވަޅުތަކުގެ ތެރޭގައި މޯލްޑިވްސް 2.0 ޑިޖިޓަލް ޓްރާންސްފޯމޭޝަން ޕްރޮޖެކްޓާއި، ޤާނޫނުލްޢުޤޫބާތަށް ގެނެވުނު ބަދަލުތަކުގެ ތެރެއިން އެސެޓް ރިކަވަރީގެ މަސައްކަތްތައް ހިމެނެއެވެ. މީގެ އިތުރުން ނޭޝަނަލް އެންޓި-ކޮރަޕްޝަން ޕްލޭނާއި، 20 އަހަރުގެ ޤައުމީ ތަރައްޤީގެ ޕްލޭން، އަދި “ހިންމި” ކޮރަޕްޝަން ރިސްކް ސެލްފް އެސެސްމަންޓް ޓޫލްކިޓް ތަޢާރަފްކުރުން ހިމެނެއެވެ. ސަރުކާރުގެ މުއައްސަސާތަކަށް ތަމްރީނު ލިބިފައިވާ ފަންނީ މުވައްޒަފުން ފޯރުކޮށްދިނުމަށް ޚާއްޞަ އެންޓި-ކޮރަޕްޝަން އެކަޑަމީއެއް އުފެއްދުންވެސް މި މަސައްކަތްތަކުގެ ތެރޭގައި ހިމެނެއެވެ.

ރައީސް ފާހަގަކުރެއްވީ، ކޮރަޕްޝަނާ ދެކޮޅަށް މަސައްކަތްކުރުމުގައި މަދަނީ ޖަމްޢިއްޔާތަކާއި ބައިނަލްއަޤްވާމީ ގުޅުންތަކުގެ އިތުރުން، އަމިއްލަ ފަރުދުންނާއި އަމިއްލަ ފަރާތްތަކުގެ ބައިވެރިވުން ކޮންމެހެން ބޭނުންތެރި ކަމަށެވެ. މެސެޖު ނިންމަވާލައްވަމުން ރައީސް ވިދާޅުވީ، ޤައުމަށް އަމާނާތްތެރިވުމާއި، އިޚްލާޞްތެރިވުމާއި، ދެފުށް ފެންނަ އުސޫލުތައް ދެމެހެއްޓުމަކީ، ޤައުމުގެ އެންމެން ގުޅިގެން އަދާކުރަންޖެހޭ ވާޖިބެއް ކަމަށާއި، މި ސަރުކާރުން ނަޒާހަތްތެރިކަމާއި، ޑިމޮކްރެޓިކް ވެރިކަން ހަރުދަނާކޮށް، ޤާނޫނުގެ ވެރިކަން ނަގަހައްޓައި، ހަމަހަމަކަމާއެކު ޢަދުލު އިންޞާފު ޤާއިމުކުރާނެ ކަމުގެ ޔަޤީންކަން ދެއްވިއެވެ.

ބައިނަލްއަޤްވާމީ އެންޓި-ކޮރަޕްޝަން ދުވަސް ކޮންމެ އަހަރެއްގެ ޑިސެންބަރު މަހުގެ 9 ވަނަ ދުވަހު ފާހަގަކުރަނީ، 2003 ވަނަ އަހަރު އ.ދގެ އާންމު މަޖިލީހުން ޔޫ.އެން.ސީ.އޭ.ސީ ބަލައިގަތުމާ ގުޅުވައިގެންނެވެ.