Read Time:3 Minute, 6 Second
(ފޮޓޯ ކްރެޑިޓްސް: ޕީއެސްއެމް ނިއުސް)
މިއަހަރުގެ މަސްވެރިންގެ ދުވަސް، މަސްވެރިންނަށް ކުލަގަދަ ޢީދަކަށް ވެގެންދާނެ ކަމަށް މަސްވެރިކަމާއި ކަނޑުގެ ވަސީލަތްތަކާ ބެހޭ ވަޒީރު ޢަހުމަދު ޝިޔާމް ވިދާޅުވެއްޖެއެވެ. ޤައުމީ ފެންވަރުގައި ރ. ދުވާފަރުގައި ފާހަގަކުރާ މި ދުވަސް، ތިން ދުވަހުގެ ގިނަ ހަރަކާތްތަކަކާއެކު ކުރިއަށްދާނެއެވެ. ވަޒީރު ޝިޔާމް މިހާރު ވަނީ މި ހަރަކާތްތަކުގައި ބައިވެރިވެވަޑައިގަތުމަށް ދުވާފަރަށް ވަޑައިގެންފައެވެ.
ދުވާފަރު ރައްޔިތުންގެ ވަރަށް ބޮޑު އެއްބާރުލުމާއެކު ކުރިއަށްދާ މި ހަރަކާތްތަކުގެ ތެރެއިން މަސްވެރިންގެ ދުވަހުގެ ޖަލްސާގައި، ބޭރުގެ އެންމެ ގިނަ ޑިޕްލޮމެޓުންނާއި ރައީސުލްޖުމްހޫރިއްޔާގެ ދެކަނބަލުންނާއި ސަރުކާރުގެ އިސްވެރިން ބައިވެރިވެވަޑައިގަންނަވާނެ ކަމަށް ލަފާކުރެވެއެވެ.
ޑިސެންބަރު 10 އިން 13 އަށް ދުވާފަރުގައި ބާއްވާ ހަރަކާތްތަކުގެ ތެރޭގައި މަސްވެރިންގެ ގުންޒަރާއި ކާބޯތަކެތީގެ މަޢުރަޒާއި މަސް ރޭހާއި ކުޑަކުދިންގެ ހަވީރާއި މަސް ކެނޑުމުގެ މުބާރާތާއި ރަހަވަރު ކެއްކުމުގެ މުބާރާތާއި މަސްވެރިންގެ ދުވަހުގެ ޖަލްސާ ހިމެނެއެވެ. ދުވާފަރު ދާއިރާގެ މެންބަރާއި ކައުންސިލް އަދި ރައްޔިތުންގެ އެއްބާރުލުމާއެކު ކުރިއަށްދާ މި ހަރަކާތްތަކާއެކު، މިއަހަރުގެ މަސްވެރިންގެ ދުވަހަކީ ހަޤީޤަތުގައިވެސް ކުލަގަދަ ޢީދަކަށް ވެގެންދާނެ ކަމަށް ވަޒީރު ޝިޔާމް ވިދާޅުވިއެވެ. ކޮންމެ އަހަރެއްގެ ޑިސެންބަރު މަހުގެ 10 ވަނަ ދުވަހަކީ މަސްވެރިންގެ ބުރަ މަސައްކަތުގެ އަގުވަޒަންކޮށް، އެ ސިނާޢަތަށް ހިތްވަރު ދިނުމުގެ ގޮތުން ޤައުމީ ފެންވަރުގައި ފާހަގަކުރާ ދުވަހެކެވެ. މިއީ ފާހަގަކުރާ 45 ވަނަ މަސްވެރިންގެ ދުވަހެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0