Read Time:3 Minute, 14 Second
(ފޮޓޯ ކްރެޑިޓްސް: އިސްލާމިކް މިނިސްޓްރީ)
އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެފައިވަނީ، ކުރިއަށް އޮތް ދެ އަހަރުގެ ތެރޭގައި ޒަކާތު ފަންޑުން އިންވެސްޓްކޮށް، ދާއިމީކޮށް ފަންޑަށް ފައިސާ އިތުރުކުރެވޭނެ ގޮތްތަކެއް ހޯއްދަވައިދެއްވާނެ ކަމަށެވެ. މުޅި ރާއްޖެއަށް ޚާއްސަ ޒަކާތާ ބެހޭ ޤާނޫނެއް ފުރަތަމަ ފަހަރަށް ތަސްދީޤުކުރެވިފައިވާއިރު، މި ޤާނޫނުގައިވަނީ ޒަކާތު ފަންޑުގެ ފައިސާ، އިސްލާމީ ޝަރީޢަތާއި ޤާނޫނު ހުއްދަ ކުރާ ގޮތެއްގެ މަތިން އިންވެސްޓްކުރެވިދާނެކަމަށް ބަޔާންކޮށްފައެވެ. ނަމަވެސް އެކަން ލާޒިމު ނުކުރެއެވެ.
ވަޒީރު ވިދާޅުވީ، ޒަކާތުގެ ބެހެނިވެރިންގެ ބޭނުންތައް އިތުރުވެފައިވާތީ، ލިބޭ މިންވަރަށް ވުރެ ބޭނުންވާ މިންވަރު ގިނަ ކަމަށެވެ. އެހެންކަމުން، ޒަކާތުގެ މަންފާ ވީހާވެސް ގިނަ ބަޔަކަށް ފޯރުކޮށްދިނުމަށްޓަކައި، ފަންޑުން އިންވެސްޓްކުރުމުގެ ވިސްނުން ސަރުކާރުގެ އެބަހުރި ކަމަށާއި، އެކަން ކުރާނީ ބެހެނިވެރިންގެ ޙާޖަތްތަކަށް އެއްވެސް އުނިކަމެއް ނާންނަ ގޮތަށް ކަމަށެވެ. ފިޤްހު އެކަޑަމީތަކާއި ފަތުވާ ކައުންސިލްތަކުގެ ދިރާސާތަކަށް ބުރަވެފައިވާ މި ކަމުގެ ސަބަބުން، ޒަކާތު ހައުސްއަކީ ދިވެހިން ފަޚުރުވެރިވާފަދަ މުވައްސަސާއަކަށް ވާނެކަމުގެ ޔަޤީންކަން ވަޒީރު ދެއްވިއެވެ.
މިދިޔަ ދެ އަހަރަކީ ރާއްޖެއަށް ޒަކާތުގެ ގޮތުގައި އެންމެ ގިނަ އަދަދަކަށް ފައިސާ ޖަމާވި ދެ އަހަރު ކަމަށް ވެއެވެ. މިދިޔަ އަހަރު އެކަނިވެސް ފަންޑަށް 100 މިލިއަނަށްވުރެ ގިނަ ރުފިޔާ ޖަމާކުރެވުނެވެ. ޖެނުއަރީ 1 އިން ފެށިގެން އަމަލުކުރަން ފަށާފައިވާ ޒަކާތު ޤާނޫނުގެ މަޤުސަދަކީ ޒަކާތުގެ ނިޒާމު ހަރުދަނާކޮށް، ދެފުށް ފެންނަ އަދި ރައްޔިތުންގެ އިތުބާރު ލިބިފައިވާ ނިޒާމަކަށް ހެދުމެވެ.
Happy
33 %
Sad
0 %
Excited
0 %
Sleepy
0 %
Angry
33 %
Surprise
33 %
0
0