ވޮލީން ސަރަހައްދީ ފުރަތަމަ ރަން މެޑަލް ހާސިލް ކުރާނީ ކަނބަލުން: ލަޠީފް

Read Time:3 Minute, 18 Second

(ފޮޓޯ ކްރެޑިޓްސް: ޕީއެސްއެމް ނިއުސް)

ވޮލީބޯލް އެސޯސިއޭޝަން އޮފް މޯލްޑިވްސް (ވީއޭއެމް)ގެ ރައީސް މުޙައްމަދު ލަޠީފް ވިދާޅުވީ، ރާއްޖެއަށް ސަރަހައްދީ ފުރަތަމަ ރަން މެޑަލް ގެނެސްދޭނެކަމަށް ގަބޫލުކުރައްވަނީ ގައުމީ އަންހެން ވޮލީ ޓީމު ކަމަށެވެ. އޭނާ ފާހަގަކުރެއްވި ގޮތުގައި ރާއްޖޭގައި ވޮލީ ކުޅޭ އަންހެނުންގެ އަދަދު ފިރިހެނުންނަށްވުރެ ގިނައެވެ. އަދި އަތޮޅުތެރެއިންވެސް މި ކުޅިވަރަށް އަންހެނުންގެ ފޯރި ބޮޑެވެ. ވީއޭއެމްއިން މިދިޔަ އަހަރު އަންހެން ކޯޗުން ތަމްރީނުކުރުމާއި ކުޅުންތެރިންގެ ކުރިއެރުމަށް ގިނަ މަސައްކަތްތަކެއް ކޮށްފައިވާކަމަށްވެސް ލަޠީފް ވިދާޅުވިއެވެ.

ނަމަވެސް، މިދިޔަ އަހަރު ވީއޭއެމްއިން އުންމީދުކުރި ނަތީޖާތަކެއް ހާސިލުނުވާކަން ފާހަގަކުރައްވައި ލަޠީފް ވިދާޅުވީ، މައްސަލައަކީ ކުޅުންތެރިންގެ ކަމެއް ނޫން ކަމަށެވެ. އެއީ ގައުމީ ޓީމު ހިންގުމުގައި އެސޯސިއޭޝަނަށް ދިމާވި ގޮންޖެހުންތަކެއް ކަމަށާއި، އެކަންކަން ހައްލުކޮށް ރަނގަޅުކުރުމުގެ މަސައްކަތް ކުރަމުންދާ ކަމަށެވެ. އިސްލާހީ ފިޔަވަޅުތައް އަޅާއިރު، ބައެއް ފަހަރު ކުޅުންތެރިންނާއި ކޯޗުންގެ ހިތްހަމަނުޖެހުން އަމާޒުވާ ކަމަށާއި، މިފަދަ ހާލަތްތަކުގައި ސީދާ އެސޯސިއޭޝަނާ ގުޅައިގެން ހަގީގަތް ބެއްލެވުމަށް ލަޠީފް އެދިވަޑައިގަތެވެ. ވޮލީ އާއިލާ ގުޅިގެން މަސައްކަތްކޮށްގެން ނޫނީ މި ކުޅިވަރު ކުރިއެއް ނުދާނެ ކަމަށް އޭނާ ވިދާޅުވިއެވެ. ވީއޭއެމްއިން އަބަދުވެސް ކުޅުންތެރިންނާއެކު ދެމިތިބޭނެ ކަމަށާއި، އެއްވެސް ކުޅުންތެރިއެއްގެ ކެރިއަރަށް ދެރައެއް ލިބިދާނެ އެއްވެސް ކަމެއް ނުކުރާނެ ކަމުގެ ޔަގީންކަން ލަޠީފް ދެއްވިއެވެ. އަދި ފިޔަވަޅު އަޅަންޖެހޭ ހާލަތްތަކުގައި އެ ފިޔަވަޅު އަޅަނީވެސް ކުޅުންތެރިން އަނބުރާ ވޮލީގެ ތެރެއަށް ގެނައުމަށް ކަމަށް އޭނާ ވިދާޅުވިއެވެ.