Read Time:3 Minute, 48 Second
ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، ކުރީގެ ރައީސުންނަށް ދެމުން އައި އޮފީސް ޚަރަދު އުނިކޮށް، ކުރީގެ ނައިބު ރައީސުންނަށް ވެސް ޢިނާޔަތްތައް ދިނުމަށް ހުށަހެޅި ޤާނޫނަށް ހުށަހެޅުނު އިޞްލާޙުތައް މިއަދު ތަޞްދީޤުކުރައްވައިފިއެވެ. މި ބިލަކީ 2025 ޑިސެންބަރު 1 ގައި ރައްޔިތުންގެ މަޖިލީހުން ފާސްކުރި ބިލެކެވެ. މި އިޞްލާޙުގެ މައިގަނޑު ބޭނުމަކީ ރައީސުލްޖުމްހޫރިއްޔާކަމާއި ނައިބު ރައީސުލްޖުމްހޫރިއްޔާކަން ކުރެއްވި ފަރާތްތަކަށް ދެވޭ ރައްކާތެރިކަމާއި ޢިނާޔަތްތައް ކަނޑައަޅައި، އެ ދިނުމުގެ އުސޫލުތައް ބަޔާންކުރުމެވެ. ޤާނޫނަށް ގެނެވުނު މުހިންމު ބަދަލުތަކުގެ ތެރޭގައި، ކުރީގެ ރައީސުންނަށް ދެމުން އައި އޮފީސް ހިންގުމުގެ ޚަރަދު އުނިކުރުމާއި، އެ ބޭފުޅުން ދެވަނަ ދައުރަކަށް އިންތިޚާބުވެއްޖެނަމަ ނުވަތަ ދައުލަތުގެ އެހެން މަޤާމެއް އަދާކުރައްވާނަމަ، އެ މުއްދަތުގައި ޢިނާޔަތްތައް މެދުކެނޑޭނެ ކަމަށް ވަނީ ކަނޑައަޅާފައެވެ. އަދި ރާއްޖެއިން ބޭރުގައި ދިރިއުޅޭނަމަ އެ މުއްދަތުގައި ރައްކާތެރިކަން ފޯރުކޮށްދިނުން ލާޒިމު ނޫންކަމަށް ވެސް ވަނީ ބަޔާންކޮށްފައެވެ.
މީގެ އިތުރުން، ޤާނޫނުއަސާސީގައިވާ ގޮތުގެ މަތިން ރިޔާސަތުގެ ފަސް އަހަރުގެ ދައުރެއްގައި ނައިބު ރައީސްކަން ކުރައްވާފައިވާ ބޭފުޅުންނަށް ވެސް މިހާރު ޢިނާޔަތްތައް ލިބިވަޑައިގަންނަވާނެއެވެ. އެގޮތުން މަހަކު 30،000 ރުފިޔާގެ މާލީ ޢިނާޔަތަކާއި، ދައުލަތުގެ ޚަރަދުގައި ރާއްޖެއާއި ރާއްޖެއިން ބޭރުން ޞިއްޙީ ޚިދުމަތް ލިބިދެވޭނެ އިންތިޒާމު ހަމަޖެއްސުން ހިމެނެއެވެ. އެއްވެސް ރައީސެއް ނުވަތަ ނައިބު ރައީސެއް މަޤާމުގައި ހުންނަވައި ޖިނާއީ ކުށެއް ކުރިކަން ޝަރީޢަތަށް ސާބިތުވެއްޖެނަމަ، އެ ބޭފުޅަކަށާއި އަނބިކަނބަލުންނަށް ނުވަތަ ފިރިކަލުންނަށް މި ޤާނޫނުގެ ދަށުން ލިބޭ އެއްވެސް ޢިނާޔަތަކާއި ރައްކާތެރިކަމެއް ނުލިބޭނެ ކަމަށް ވެސް ވަނީ ބަޔާންކޮށްފައެވެ.
ރައީސުލްޖުމްހޫރިއްޔާ މި ބިލު ތަޞްދީޤުކުރައްވައި ދިވެހިސަރުކާރުގެ ގެޒެޓުގައި ޝާއިޢުކުރެއްވުމާއެކު، މިހާރު މި ޤާނޫނަށް ވަނީ ޢަމަލުކުރަން ފަށާފައެވެ.
Happy
100 %
Sad
0 %
Excited
0 %
Sleepy
0 %
Angry
0 %
Surprise
0 %
0
0