އައްޑޫ ޑްރަގު ނެޓްވޯކުގައި ހިމެނޭ 10 ތަނެއް ބަލައިފާސްކޮށް 10 މީހަކު ހައްޔަރުކޮށްފި

Read Time:3 Minute, 45 Second

އައްޑޫގައި މަސްތުވާތަކެތީގެ ވިޔަފާރިކުރާ މީހުންނަށް އަމާޒުކޮށް ފުލުހުން ފަށާފައިވާ “އޮޕަރޭޝަން އަލިމަގު” ގެ ދަށުން މިހާތަނަށް 10 ތަނެއް ބަލައިފާސްކޮށް 10 މީހަކު ހައްޔަރުކޮށްފިއެވެ. މި މީހުންގެ ތެރެއިން ހަ މީހެއްގެ ބަންދުގެ މުއްދަތު ކޯޓުން އިތުރުކޮށްފައިވާއިރު، ސ. ހިތަދޫ، ގުލްކަނދުގޭ ހަސަން ނަޒީފް ނަމަކަށް ކިޔާ މީހެއްގެ ބަންދަށް އިތުރު ފަސް ދުވަސް ވަނީ ދީފައެވެ. މި އޮޕަރޭޝަންގެ ތެރެއިން މިދިޔަ ބުދަ ދުވަހުގެ ރޭ ހައްޔަރުކުރެވުނު ހިތަދޫއަށް ނިސްބަތްވާ ފަސް މީހެއްގެ ވަނަވަރު ފުލުހުން ވަނީ އާންމުކޮށްފައެވެ. އެއީ އަލީ ނަދީމް، ހާފިޒު ފައުޒީ، އިބްރާހިމް ސިރާޖު، ހަސަން އަލްފާފް އަދި އަމީން މުހައްމަދެވެ. މި މީހުންގެ ތެރެއިން ނަދީމާއި ހާފިޒު އަދި ސިރާޖު 30 ދުވަހަށް ބަންދުކުރަން ކޯޓުން އަމުރުކުރިއިރު، އަލްފާފާއި އަމީން ބަންދުގައި ބަހައްޓަން ކޯޓުން ދިނީ ފަސް ދުވަހެވެ. މި އެންމެންނަކީ ހިތަދޫ “މައިލޯ” ގުރޫޕަށް ނިސްބަތްވާ މީހުން ކަމަށްވާއިރު، އެ ގުރޫޕުގެ އެންމެ އިސް މީހަކީ ނަދީމް ކަމަށް ވެއެވެ.

ފުލުހުން ބުނި ގޮތުގައި މި ނެޓްވޯކްގެ މީހުންނަށް އަމާޒުކޮށް މަސްތުވާތަކެތި ޓްރެފިކް ކުރުމާއި މަނީ ލޯންޑާ ކުރުމުގެ ތަހުގީގު ފެށީ މި އަހަރުގެ މާޗު މަހުން ފެށިގެންނެވެ. އަދި 2017 ވަނަ އަހަރުން ފެށިގެން މި ގުރޫޕުން މަސްތުވާތަކެތީގެ ވިޔަފާރި ކުރަމުންދާ ކަން ވަނީ ހޯދާފައެވެ. ހިތަދޫގެ މި ޑްރަގް ނެޓްވޯކްގެ ހަތަރު މީހެއްގެ އެކައުންޓުގައި ފާއިތުވި ފަސް އަހަރު ތެރޭ 19 މިލިއަނަށް ވުރެ ގިނަ ރުފިޔާ ދައުރުކޮށްފައިވާ ކަމަށް ފުލުހުން މައުލޫމާތު ދީފައިވެއެވެ. މީގެ އިތުރުން، މަސްތުވާތަކެތީގެ ގާނޫނަށް ގެނައި އިސްލާހުގެ ދަށުން، ރާއްޖެއަށް މަސްތުވާތަކެތި އެތެރެކުރާ މީހުންނަށް ނުވަތަ އޭގެ ވިޔަފާރިކުރާ މީހުންނަށް މަރުގެ އަދަބު ދެވޭނެ ގޮތަށާއި، އުމުރު ދުވަހުގެ ޖަލު ހުކުމުގެ ގޮތުގައި އޮންނަ 25 އަހަރުގެ އަދަބު އެމީހަކު މަރުވަންދެން ޖަލުގައި ހުންނަން ޖެހޭ ގޮތަށް ބަދަލުކުރުމުގެ ބިލެއް ރައްޔިތުންގެ މަޖިލީހުން މިދިޔަ ބުދަ ދުވަހު ވަނީ ފާސްކޮފައެވެ.