Read Time:3 Minute, 18 Second
ކުރީގެ އިމިގްރޭޝަން ކޮންޓްރޯލަރު މުހައްމަދު ޝަމްއާން މަގާމުގެ ނާޖައިޒު މަންފާ ހޯދި ކަމަށް ތުހުމަތު ކުރާ މައްސަލާގައި، ފުލުހުންނަށް ސީސީޓީވީ ފުޓޭޖުތައް އަވަހަށް ފޯރުކޮށްދިނުމަށް އިމިގްރޭޝަންގައި އެދުނީ ދެ އިދާރާގެ މިނިސްޓަރުގެ ހައިސިއްޔަތުން ކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެ އެވެ. މި މައްސަލާގައި ހެކިބަސް ދެއްވަމުން އިމިގްރޭޝަންގެ އޮފިސަރަކު ވިދާޅުވީ، ފުޓޭޖުތައް ހަވާލުކުރަން އޭނާ އަށް އެންގީ އައިސީޓީ ސެކްޝަންގެ އިސްވެރިޔާ ކަމަށާއި، އެއީ މިނިސްޓަރު އިހުސާން އެދިވަޑައިގަތުމުން ކަމަށެވެ. މިނިސްޓަރު އިހުސާން ވިދާޅުވީ، ކަންކަން ލަސްވާ ނަމަ އަވަސް ކުރުމަކީ އެމަނިކުފާނުގެ ޒިންމާއެއް ކަމަށާއި، އެކަމަށް ފާޑުކިޔުންތައް އަމާޒުވުމުން ކަންބޮޑުވާ ކަމަށެވެ.
ނަމަވެސް ޝަމްއާންގެ ދިފާއީ ވަކީލު ވަނީ މިނިސްޓަރުގެ އެންގުން ރަސްމީ ޗެނަލްތަކުން އައިސްފައިވޭތޯ ސުވާލުކޮށްފަ އެވެ. ހެކިވެރިޔާ ބުނީ އާންމުކޮށް ފުލުހުން ސީދާ އެންގިޔަސް، ވަގުތުގެ ހާލަތަށް ބަލައި މިނިސްޓަރުންނާއި އިސް އޮފިސަރުންގެ އެދުމަށް ވެސް ފުޓޭޖު ދޫކުރާ ކަމަށެވެ. ޝަމްއާންގެ އާއިލާއިން އޭނާ ހައްޔަރުކުރުމުގައި މިނިސްޓަރު އިހުސާން ނުފޫޒު ފޯރުވާފައިވާ ކަމަށް ތުހުމަތުކޮށްފައިވީ ނަމަވެސް، މިނިސްޓަރު އިހުސާން ވަނީ އެއީ ޒާތީ ކަމެއް ނޫން ކަމަށް ވިދާޅުވެފަ އެވެ.
ޝަމްއާން މަގާމުން ވަކިކޮށް ހައްޔަރުކުރީ، ބިދޭސީއެއް ދޫކޮށްލުމަށް ފަހު، އެ އިދާރާގެ މުވައްޒަފުންނާ ގުޅިގެން އޭނާގެ އަތުން 500،000ރ. ހޯދި ކަމަށް ތުހުމަތު ކުރާ މައްސަލާގަ އެވެ. ޝަމްއާންގެ މައްޗަށް ރަސްމީ ހައިސިއްޔަތު ނަހަމަ ގޮތުގައި ބޭނުން ކުރުމާއި، ފޭރުމާއި، މަނީ ލޯންޑްރިންގެ ދައުވާ ދައުލަތުން ވަނީ އުފުލާފަ އެވެ. އޭނާ މިހާރު ހުރީ ޝަރީއަތް ނިމެންދެން ބަންދުގަ އެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0