Read Time:3 Minute, 33 Second
ހުކުރު ދުވަހުގެ ރޭ ބާއްވާ ވޯލްޑް ކަޕް ފުޓްބޯޅަ މުބާރާތުގެ ގުރު ނެގުމުގެ ރަސްމިއްޔާތު ޝަރަފުވެރި ކޮށްދެއްވާނީ މުބާރާތް ބާއްވާ އެންމެ އިސް ގައުމު ކަމަށްވާ އެމެރިކާގެ ރައީސް ޑޮނަލްޑް ޓްރަމްޕް ކަމަށް ފީފާއިން ބުނެފިއެވެ. ދުނިޔޭގެ ފުޓްބޯޅަ ޖަމިއްޔާއިން މިހެން ބުނީ ގުރު ނެގުމުގެ ރަސްމިއްޔާތަށް ވޮޝިންގްޓަނުގެ ކެނެޑީ ސެންޓަރަށް ރައީސް ޓްރަމްޕް ވަޑައިގަންނަވާނެކަން އެމެރިކާގެ ރިއާސީ ގަނޑުވަރު ވައިޓް ހައުސް އިއުލާނު ކުރެއްވުމުންނެވެ. ރައީސް ޓްރަމްޕް މި ރަސްމިއްޔާތަށް ވަޑައިގަންނަވާއިރު މުބާރާތް ބާއްވާ އަނެއް ދެ ގައުމުގެ ތެރެއިން މި ރަސްމިއްޔާތަށް އެމެރިކާ އަށް ވަޑައިގަންވާނެކަމުގެ ޔަގީންކަން ދެއްވާފައިވަނީ ކެނެޑާގެ ބޮޑު ވަޒީރު މާކް ކާނޭ އެވެ. ތިން ގައުމު ގުޅިގެން މުބާރާތް ބާއްވާއިރު މެކްސިކޯގެ ރައީސް ކްލައުޑިއާ މި ރަސްމިއްޔާތުގައި ބައިވެރިވެވަޑައިގަންނަވާނެ ކަމުގެ ޔަގީންކަން އަދި ނުދެއްވަ އެވެ. ފީފާއިން ބުނީ ގުރު ނެގުމުގެ ރަސްމިއްޔާތު ވެގެންދާނީ މިހާތަނަށް ބާއްވާ އެންމެ ފުރިހަމަ ރަސްމިއްޔާތަށް ކަމަށެވެ.
ފުރަތަމަ ފަހަރަށް 48 ގައުމު ބައިވެރިކޮށްގެން ކުޅޭ މުބާރާތަށް މިހާތަނަށް ވަނީ 42 ގައުމު ކޮލިފައިވެ އެވެ. ބާކީ ހަ ޖާގަ ލިބޭނީ ޔޫރަޕުގެ ޕްލޭއޯފްގެ ގަދަ ހަތަރު ޓީމާއި އެހެން ބައްރުތަކުން ގަދަ ދެ ޓީމަށެވެ. މި ފަހަރުގެ ރަސްމިއްޔާތުގައި ވޯލްޑް ކަޕަށް ކޮލިފައިވެފައިވާ އިރާނުން ބައިވެރިނުވާނެ އެވެ. އިރާނުން ވޯލްޑް ކަޕް ޑްރޯ ބޮއިކޮޓް ކުރަން ނިންމީ އެ ގައުމުގެ ފުޓްބޯޅަ ފެޑަރޭޝަނުގެ ރައީސް އާއި އިތުރު ފަސް މީހަކަށް މި ރަސްމިއްޔާތަށް ވަޑައިގަތުމަށް އެމެރިކާއިން ވިސާ ހަމަޖައްސައިނުދިނުމުންނެވެ. އިރާނުން ބުނީ މިއީ ފުޓްބޯޅައިން ބޭރުން ސިޔާސީ ގޮތުން އެމެރިކާއިން ކުރާ ޖެއްސުމެއް ކަމަށާއި މިކަން ހައްލުކޮށް ދެއްވުމަށް ފީފާގެ ރައީސް ޖިއާނީ އިންފަންޓީނޯއާ މަޝްވަރާ ކުރި ނަމަވެސް ކުރިއެރުމެއް ލިބިފައިނުވާ ކަމަށެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0