Read Time:3 Minute, 12 Second
އިނގިރޭސި ޕްރިމިއާ ލީގުގައި ރޭ ވެސްޓް ހޭމް ޔުނައިޓެޑް އާއި ދެކޮޅަށް ލިވަޕޫލް ކުޅުނު މެޗުން 2-0 ގެ ނަތީޖާއަކުން ލިވަޕޫލް މޮޅުވެއްޖެ އެވެ. ވެސްޓް ހޭމްގެ ލަންޑަން ސްޓޭޑިއަމްގައި ކުޅުނު މި މެޗަށް ލިވަޕޫލް ނިކުތްއިރު އެ ޓީމުގެ ކޯޗު އާނޭ ސްލޮޓް ވަނީ އެ ޓީމުގެ ފޯވަޑް މުހައްމަދު ސަލާ ބެންޗަށް ލާފަ އެވެ. މިއީ 2024 ވަނަ އަހަރުގެ އެޕްރީލް މަހުގެ ފަހުން ސަލާ އަށް ލިވަޕޫލްގެ ފުރަތަމަ ޓީމުން ފުރުސަތު ގެއްލުނު ފުރަތަމަ ފަހަރެވެ. ދެ ޓީމުގެ ފަރާތުންވެސް ވާދަވެރި ކުޅުމެއް ފެނިގެން ގޮސްފައިވާ މި މެޗުގެ ފުރަތަމަ ހާފުގައި ލަނޑެއް ފެނިގެންގޮސްފައިނުވާއިރު, ލިވަޕޫލް އިން ލީޑު ނަގާފައިވަނީ މެޗުގެ 60 ވަނަ މިނިޓުގައި އެލެކްޒެންޑަރ އިސާކް ކާމިޔާބުކޮށްދިން ލަނޑުންނެވެ.
އިސާކް ޖެހި މި ލަނޑަކީ އޭނާ ނިމިގެންދިޔަ ޓްރާންސްފަރ ބާޒާރުގައި ރެކޯޑް ފީއެއް ކަމުގައިވާ 125 މިލިއަން ޕައުންޑަށް ނިއު ކާސަލް އިން ލިވަޕޫލް އަށް ބަދަލުވިފަހުން އޭނާ އެ ކްލަބަށް ޖަހައިދިން ފުރަތަމަ ލަނޑެވެ. މި މެޗުގެ ފުރިހަމަ ވަގުތު ހަމަވާން ހަ މިނިޓަށް ވެފައިވަނިކޮށް ވެސްޓް ހޭމްގެ ލޫކަސް ޕަކޭޓާ އަށް ރެފްރީ ވަނީ ދެވަނަ ރީނދޫ ކާޑަކާއިއެކު ރަތް ކާޑެއް ދައްކާ ދަނޑުން ފޮނުވާލާފަ އެވެ. އަދި އެއް ކުޅުންތެރިއަކު މަދުކޮށް ވެސްޓް ހޭމް އިން ކުޅެމުންދިއުމުގެ ފައިދާ ނަގާ ލިވަޕޫލް އިން މި މެޗުގައި ދެވަނަ ލަނޑެއް ޖަހާފައިވަނީ މެޗުގެ ފުރިހަމަ ވަގުތު ހަމަވެ އިތުރު ވަގުތުގެ ކުޅުމުގައި ކޯޑީ ގެކްޕޯ ކާމިޔާބުކޮށްދިން ލަނޑުންނެވެ.
މި މެޗުން މޮޅުވުމާއިއެކު ލިވަޕޫލް އަށް ވަނީ ލީގުގައި މިހާތަނަށް ކުޅުނު 13 މެޗުން ލިބިފައިވާ 21 ޕޮއިންޓާއެކު ތާވަލުގެ 8 ވަނަ މަގާމް ލިބިފަ އެވެ. ވެސްޓް ހޭމް އަށް ލިބިފައިވާ 11 ޕޮއިންޓާއެކު އެ ޓީމު އޮތީ 17 ވަނައިގަ އެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0