“ސިލޯނާއެކު ދިވެހިން” ކްރައުން އެންޑް ޗަމްޕާ ރިސޯޓްސްއިން 10،001 ޑޮލަރު

Read Time:3 Minute, 9 Second

ސްރީލަންކާއަށް ކުރިމަތިވެފައިވާ ކާރިސީ ޙާލަތުގައި އެޤައުމަށް އެހީތެރިކަން ފޯރުކޮށްދިނުމަށްޓަކައި މީޑިއާތަކުން ކުރިއަށްގެންދާ ސިލޯނާއެކު ދިވެހިން ޓެލެތޯނަށް ކްރައުން އެންޑް ޗަމްޕާ ކުންފުނިން 10،001 އެމެރިކާ ޑޮލަރު ހަދިޔާކޮށްފިއެވެ. ކްރައުން އެންޑް ޗަމްޕާ ކުންފުނީގެ ދަށުން ހިންގާ އެކި ވިޔަފާރިތަކުގައި މަސައްކަތްކުރާ މުވައްޒަފުންގެ ތެރެއިން 25 އިންސައްތަ ނިސްބަތްވަނީ ސްރީލަންކާއަށެވެ. އެމުވައްޒަފުންގެ ޤައުމަށް ކުރިމަތިވީ މިހިތްދަތި ހާލަތުގައި ޗަމްޕާ ކުންފުނިންވަނީ ސްރީލަންކާގެ ރައްޔިތުންނަށް ދީލަތި އެހީތެރިކަމެއް ފޯރުކޮށްދީފައެވެ. އެގޮތުން ދިވެހި މީޑިއާތައް ގުޅިގެން ކުރިއަށްގެންދާ ޚާއްސަ ޓެލެތޯންގެ ތެރެއިން ކްރައުން އެންޑް ޗަމްޕާ ކުންފުނިންވަނީ ސްރީލަންކާއަށް އެހީތެރިކަން ފޯރުކޮށްދިނުމަށްޓަކައި ދިހަހާސް އެއް ޑޮލަރު ހަދިޔާކޮށްފައެވެ.

ކްރައުން އެންޑް ޗަމްޕާ ކުންފުންޏާއި ދިވެހިން އަންނަނީ އަވައްޓެރި ޤައުމުތަކަށް ކުރިމަތިވާ މިފަދަ ކާރިސާތަކުގައި އެކި ގޮތްގޮތުން އެހީތެރިކަން ފޯރުކޮށްދެމުންނެވެ. މިމަހުގެ 26 ވަނަ ދުވަހުން ފެށިގެން ސްރީލަންކާއަށް ކުރިމަތިވި ތޫފާނުގެ ސަބަބުން އެޤައުމުގެ އެކި ސަރަޙައްދުތަކަށް ބޯކޮށް ވާރޭވެހި ބިންގަނޑު ކަނޑައިގެން ދިޔުމުން ކާރިސާތައްވަނީ ކުރިމަތިވެފައެވެ. މިކާރިސާގައި އެތައް ބަޔަކު މަރުވެ އެތައް ބަޔަކު ހާލުގައިޖެހިފައިވާ މިދަނޑިވަޅުގައި ދިވެހި މީޑިއާތަކުންވަނީ އެހީތެރިކަން ފޯރުކޮށްދިނުމަށްޓަކައި 16 ގަޑިއިރުގެ ޓެލެތޯނެއް ފަށާފައެވެ. ދިވެހި ސަރުކާރުންވެސްވަނީ ސްރީލަންކާގެ ރައްޔިތުންނަށް އެހީވުމަށް 50،000 ޑޮލަރާއި 25 ހާސް ކޭސް މަސްދަޅު ދިނުމަށް ނިންމަވާފައެވެ.