ތޫފާން ދިތުވާ: ގެއްލިގެން 228 މީހުން ހޯދަނީ، 1 މިލިޔަން މީހުން ޙާލުގައި ޖެހިފައި

Read Time:3 Minute, 9 Second

(ފޮޓޯ ކްރެޑިޓްސް: ރޮއިޓާރސް)

ދެކުނު އޭޝިޔާގެ ޤައުމުތަކަށް ކުރިމަތިވެފައިވާ ނުރައްކާތެރި ތޫފާން ދިތުވާގެ ސަބަބުން ސްރީ ލަންކާގެ އިރުމަތީގައި އޮންނަ މަވިލް އަރޫ ސަރަޙައްދުގައި ތާށިވެފައި ތިބި 121 މީހުން ސަލާމަތްކޮށް ރައްކާތެރި ސަރަޙައްދަކަށް ބަދަލުކޮށްފިއެވެ. މަވިލް އަރޫގައި ވަނީ ވަރަށް ބޮޑަށް ފެންބޮޑުވެ ދަތުރުފަތުރަށް ބުރޫއަރައިފައެވެ. އެެހެންކަމުން އެ ސަރަޙައްދުން މީހުން ސަލާމަތްކުރުމަށް ބޭނުންކޮށްފައި ވަނީ އަސްކަރީ ހެލިކޮޕްޓަރެވެ. ސްރީ ލަންކާއަށް ކުރުމަތިވި ތޫފާނުގައި ބޯކޮށް ވާރޭވެހި ފެންބޮޑުވެ ބިންގަނޑު ކަނޑައިގެން ދިއުމުގެ ޙާދިޘާތަކުގައި 200 މީހުން ވަނީ މަރުވެފައެވެ. އޭގެ އިތުރުން ގެއްލުނު 228 މީހުން ހޯދުމުގެ މަސައްކަތް ސްރީ ލަންކާގެ އަސްކަރިއްޔާއިން އަދިވެސް ދަނީ ކުރަމުންނެވެ. ރަސްމީ އިދާރާތަކުން ބުނެފައިވާ ގޮތުގައި ތޫފާން ދިތުވާގެ އަސަރު އެ ޤައުމުގެ އެއް މިލިޔަން މީހުންނަށް ކޮށްފައިވެއެވެ.

އިޤްތިޞާދީ އަނދަވަޅަކުން އަރައިގަންނަން މަސައްކަތް ކުރަމުންދާ ސްރީ ލަންކާއަށް ކުރިމަތިވި ތޫފާނުގެ ސަބަބުން އިތުރު ދަތިތަކަކާ ކުރިމަތިލާން ވަނީ ޖެހިފައެވެ، ތޫފާނުގެ ސަބަބުން ފަތުރުވެރިކަމާއި ދަނޑުވެރިކަމުގެ ޞިނާޢަތްތަކަށް ބޮޑު ލޮޅުމެއް އަރާނެ ކަމަށް ބެލެވެއެވެ. ސްރީ ލަންކާގެ އިތުރުން ތޫފާން ދިތުވާގެ އަސަރު ވަނީ ދިވެހިރާއްޖެއާއި އިންޑިޔާއަށް ވެސް ކޮށްފައެވެ. އެ ގޮތުން އިންޑިޔާގެ ތަމިލް ނާޑޫގެ ސަރަޙައްދުތަކަށް ވަނީ ރަތް ސަމާލު ނެރެފައެވެ. ތަމިލް ނާޑޫގެ އިތުރުން އިންޑިޔާގެ އިރުދެކުނުގައި އޮތް ޕުދުޗެރީގެ ސަރަޙައްދުތަކާއި އަންދްރަ ޕްރަދޭޝް ސްޓޭޓްގެ ދެކުނުގެ ސަރަޙައްދުތަކަށް ވެސް ތޫފާނުގެ އަސަރު ދަނީ ކުރަމުންނެވެ.