ފަލަސްޠީނުގެ ހައްގުތައް ހޯދައިދިނުމުގައި ޢަމަލީގޮތުން މަސައްކަތްކުރުމަށް ރައީސް ގޮވާލައްވައިފި

Read Time:6 Minute, 42 Second

(ފޮޓޯ ކްރެޑިޓްސް: ރައީސް އޮފީސް)

ފަލަސްޠީނު ރައްޔިތުންގެ ހައްޤުތައް ކަށަވަރުކުރުމަށް ފަލަސްޠީނުގެ ރައްޔިތުންނާއެކު ބައިނަލްއަޤްވާމީ މުޖުތަމަޢު ތިބިކަން ޢަމަލީ ގޮތުން ދައްކުވައި ދިނުމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ގޮވާލައްވައިފިއެވެ. ރައީސުލްޖުމްހޫރިއްޔާ އެކަމަށް ގޮވާލެއްވީ ފަލަސްޠީނުގެ ރައްޔިތުންނާއެކު އެއްބައިވަންތަކަން ހާމަކުރުމުގެ ބައިނަލްއަޤްވާމީ ދުވަހާ ގުޅިގެން މީސްމީޑިއާގައި ހިއްސާ ކުރެއްވި ޕޯސްޓެއްގައެެވެ.

ރައީސުލްޖުމްހޫރިއްޔާ ވިދާޅުވީ ބައިނަލްއަޤްވާމީ ގޮތުން ފާހަގަކުރާ ފަލަސްޠީނު ރައްޔިތުންނާއެކު އެއްބައިވައްތަކަން ހާމަކުރުމުގެ ދުވަސް މިއަދު ފާހަގަކުރާއިރު، ފަލަސްޠީނުގެ ބިމުގައި ހާލަތު އޮތީ އަދިވެސް ގޯސްކޮށް ކަމަށެވެ. ހަމަލާތައް ހުއްޓާލުމުގެ އެއްބަސްވުމެއް އޮތް ނަމަވެސް ޔަހޫދީން މެދުކެނޑުމެއް ނެތި ޣައްޒާއަށް ޙަމަލާތައް ދެމުންދާކަން އެމަނިކުފާނު ފާހަގަކުރެއްވިއެވެ. މީގެ އިތުރުން ހުޅުގަނގު އަސޭރީގެ އިތުރު ބިންތައް ހިފައި ޔަހޫދީން އާބާދު ކުރުވުމާއި، ފަލަސްޠީނުގެ ރައްޔިތުންގެ އާންމު ދިރިއުޅުމަށާއި ހަމަޖެހުން ޤާއިމްކޮށް އިޤްތިޞާދީ ގޮތުން ފާގަތިކަން ހޯދުމަށް ކުރާ މަސައްކަތް ހުއްޓުވުމަށް އެކި ގޮތްގޮތުން ހުރަސްތައް ކުރިމަތިކުރުވަމުންދާ ކަމަށް ވިދާޅުވިއެވެ.

As we observe the International Day of Solidarity with the Palestinian People, the reality on the ground remains devastating. The violation of the fragile ceasefire, relentless Israeli strikes on Gaza, continued settlement expansion, and severe restrictions on daily life deny… pic.twitter.com/TuZ9HpF8T5

— Dr Mohamed Muizzu (@MMuizzu) November 29, 2025

ރައީސުލްޖުމްހޫރިއްޔާ ވަނީ މިހާލަތުގައި ފަލަސްޠީނުގެ ރައްޔިތުންނާއެކު ބައިނަލްއަޤްވާމީ މުޖުތަމަޢު ތިބިކަން ޢަމަލީ ގޮތުން ދައްކުވައި ދިނުމަށް ގޮވާލައްވާ އެކުގައި މަސައްކަތްކޮށް މާނަހުރި ފިޔަޅުތައްކެއް އެޅުމަށް ގޮވާލައްވާފައެވެ. މިކަމަކީ ފަލަސްޠީނުގެ ރައްޔިތުންގެ ހައްޤުތައް ކަށަވަރުކޮށް އެ ޤައުމުގެ ރައްޔިތުނުންގެ އުއްމީދުތައް ހާސިލްކުރުމަށް ކުރަންޖެހޭ ކަމެއްކަމަށް އެމަނިކުފާނު ވިދާޅުވިއެވެ، ޢެމަނިކުފާނުގެ ޕޯސްޓު ނިންމަވާލެއްވީ ދިވެހިން ފަލަސްޠީނާއެކު ދެމި ތިބޭނެ ކަމުގެ ޔަޤީންކަން ދެއްވަމުންނެވެ. އަދި މިނިވަން މުސްތަޤިއްލު ފަލަސްޠީނުގެ ދައުލަތެއް ޤާއިމުކޮށް 1967 ގެ ކުރީގެ ބޯޑަރުތަކަށް ރުޖޫޢަވެ، އިރުމަތީ ޤުދުސްއަކީ އެޤައުމުގެ ވެރިރަށުގެ ގޮތުގައި ބަލައިގަތުމަށް ދިވެހިރާއްޖެއިން ގެންގުޅޭ ސިޔާސަތު އެމަނިކުފާނު ތަކުރާރު ކުރެއްވިއެވެ.

ދިވެހިރާއްޖެއަކީ އަބަދުވެސް ފަލަސްޠީނުގެ މިނިވަން ދައުލަތަކަށް ވަކާލާތުކޮށް ކުރަމުންދާ ޤައުމެކެވެ. ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން މިމައްސަލާގައި ދިވެހިރާއްޖެއިން ގެންގުޅޭ ސިޔާސަތު އިތުރަށް ވަރުގަދަކޮށް ބައިނަލްއަޤްވާމީ އެކި މަންސަތައް ފަލަސްޠީނުގެ ރައްޔިތުންގެ ހައްޤުތައް ކަށަވަރުކުރުމަށް ވާކާލާތު ކުރުމަށް ދަނީ ބޭނުން ކުރަމުންނެވެ. އެގޮތުން ސަރުކާރު ވަޒީރުންނާއި އެކި އޮފިޝަލުން އަދި ޚުދު ރައީސުލްޖުމްހޫރިއްޔާ ވަނީ ބައިނަލްއަޤްވާމީ މަންސަތަކުގައި މިކަމަށް ގޮވާލައި ފަލަސްޠީނުގެ ރައްޔިތުންނާއި ދެކޮޅަށް ޔަހޫދީ ދައުލަތުން ހިންގަމުންދަ ޖަރީމާތަކަށް އެ ދައުލަތާއި އެކަމުގެ އިސްވެރިން ޖަވާބުދާރީ ކުރުވުމަށް ގޮވާލާފައެވެ.

ފަލަސްޠީނުގެ ރައްޔިތުންނާއެކު އެއްބައިވަންތަކަން ހާމަކުރުމުގެ ބައިނަލްއަޤްވާމީ ދުވަހެއް ފާހަގަކުރަން ފަށާފައިވަނީ އދ. އާންމު މަޖިލީހުން 1977 ގައި މި ދުވަސް ފާހަގަކުރުމަށް ނިންމައިގެންނެވެ. އެގޮތުން މެންބަރު ޤައުމުތަކުން މިކަމުގައި ވީހާވެސް ބޮޑަށް ބައިވެ ފަލަސްޠީނުގެ ރައްޔިތުންގެ ހައްޤުތައް ކަށަވަރުކުރުމަށް މަސައްކަތް ކުރުމަކީ އދ. މި ދުވަސް ފާހަގަކުރުމަށް ނިންމުމުގެ މަޤްޞަދެކެވެ.