Read Time:4 Minute, 35 Second
(ފޮޓޯ ކްރެޑިޓްސް: ރޮއިޓާރސް)
ޔަހޫދީން ހިންގަމުންދާ ލާއިންސާނީ ޖަރީމާތަކަށް ރައްދު ދިނުމަކީ ޙިޒްބުاللهއަށް ލިބިގެންވާ ޙައްޤެއް ކަމުގައި އެ ޖަމާޢަތުގެ ވެރިޔާ ނަޢީމް ޤާސިމް ވިދާޅުވެއްޖެއެވެ. އޭނާ މި މޭރުމުން ވިދާޅުވެ، ޔަހޫދީންނަށް އިންޒާރު ދެއްވާފައި މި ވަނީ، ޔަހޫދީން ދާދިފަހުން ދިން ނިރުބަވެރި ޙަމަލާތަކެއްގައި އެ ޖަމާޢަތުގެ އިސް ކޮމާންޑަރެއް ޝަހީދު ކޮށްލުމާ ގުޅިގެންނެވެ. ޤާސިމް މި މޭރުމުން ވިދާޅުވުމާ އެކު، ޔަހޫދީންނާއި ޙިޒްބުاللهގެ މުޖާހިދުންނާ ދެމެދު އަނެއްކާ ވެސް ލޭއޮހޮރުވުން ބޮޑު ހަނގުރާމައެއް ފެށިދާނެ ކަމުގެ ބިރު ވަނީ ހީވެފައެވެ.
ޙިޒްބުاللهއަކީ ލުބްނާންގެ ސިޔާސީ މައިދާނުގައި ހަރަކާތްތެރިވާ މުޖާހިދުންގެ ޖަމާޢަތެކެވެ. ޔަހޫދީ ފައުޖުން ޙިޒްބުاللهގެ އަސްކަރީ ގޮފީގެ އިސް ކޮމާންޑަރު، ހަޔިޘަމް ޢަލީ އަލް-ޠަބްޠަބައީ ޝަހީދު ކޮށްލާފައި ވަނީ ލުބްނާންގެ ވެރިރަށް ބައިރޫތުގެ ރަށްބޭރުގެ ސަރަޙައްދަކަށް ނޮވެންބަރު 23ވަނަ ދުވަހު ދިން ނިރުބަވެރި ޙަަމަލާއެއްގައެވެ. ލުބްނާންގެ ޢާންމު ރައްޔިތުންގެ ނަސްލުހޭދު ކުރުމަށް ޔަހޫދީ ފައުޖުން ހުސްވި އަހަރު ޤަތުލުޢާންމަކާ އެއް ފަދަ ލާއިންސާނީ ޖަރީމާތަކެއް ހިންގާފައިވާއިރު، ޠަބްޠަބައީ ޝަހީދު ކޮށްލުމަށް ދިން ޙަމަލާއަށް ފަހު އެ ޤައުމުގެ ޢާންމުންނާ ދެކޮޅަށް އަލުން ލާއިންސާނީ ޖަރީމާތަކެއް ހިންގަން ފަށާފާނެ ކަމުގެ ބިރު ވަނީ ބޮޑުވެފައެވެ.
ޓީވީ މެދުވެރިކޮށް ލުބްނާންގެ ރައްޔިތުންނާ މުޚާޠަބު ކުރައްވައި ވާހަކަފުޅު ދައްކަވަމުން ޤާސިމް ވިދާޅުވީ ޠަބްޠަބައީ ޝަހީދު ކޮށްލުމަށް ދިން ޙަމަލާގެ ބަދަލު ޙިޒްބުاللهން ހިފާނެ ކަމުގައެވެ. ނަމަވެސް، އެ ކަން ކުރާނީ، އެ ކަމަށް އެންމެ މުނާސަބު ވަގުތުގައި ކަމުގައި ވެސް އޭނާ ވިދާޅުވިއެވެ. އަދި، ޙިޒްބުاللهއާ ދެކޮޅަށް ކަމަށް ބުނެ ލުބްނާންގެ ޢާންމު ރައްޔިތުން ދިރިއުޅޭ ރަށްތަކަށް ބޮންއަޅާނެ ކަމުގެ އިންޒާރު ޔަހޫދީ ދެމުން ދިޔަ ނަމަވެސް، އެ ފަދަ އިންޒާރުތަކަށް ޙިޒްބުاللهން ފަސްނުޖެހޭނެ ކަމުގައި ވެސް ޤާސިމް ވިދާޅުވިއެވެ.
“ފަހުން ހަނގުރާމައެއް ފެށިދާނެ ކަމަށް ބެލެވޭތަ؟ އެ ކަން ފަހަރުގައި ހިނގާފާނެ. އާދެ، އެ ކަމުގެ ފުރުޞަތު އެބައޮތް، އަދި ހަނގުރާމަ ނުހިނގުމުގެ ފުރުޞަތު ވެސް އެބައޮތް،” ޤާސިމް ވިދާޅުވިއެވެ. ލުބްނާންގެ ޢާންމު ރައްޔިތުންގެ ނަސްލުހޭދު ކުރުމަށް ޔަހޫދީން އަލުން ލާއިންސާނީ ޖަރީމާތަކެއް ހިންގަން ފެށުމުގެ ފުރުޞަތު އޮތް ކަން ފާހަގަ ކުރައްވައި، ޤާސިމް ވަނީ ޔަހޫދީންނާ ކުރިމަތިލުމަށް ތައްޔާރުވުމަށް ލުބްނާންގެ ސަރުކާރާއި އަސްކަރިއްޔާއަށް ގޮވައިލައްވާފައެވެ.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
0
0