ސްވިމިން އެސޯސިއޭޝަން ޗެމްޕިއަންޝިޕުގެ އެންމެ މޮޅު ފެތުންތެރިންނަކީ އާން އާއި އަންޖަލް

Read Time:4 Minute, 0 Second

(ފޮޓޯ ކްރެޑިޓްސް: ސްވިމިންގ އެސޯސިއޭޝަން)

ސްވިމިން އެސޯސިއޭޝަން އޮފް މޯލްޑިވްސްއިން އިންތިޒާމުކޮށްގެން ބޭއްވި 18 ވަނަ ސްވިމިން އެސޯސިއޭޝަން ޗެމްޕިއަންޝިޕުގެ ސީނިއަރ ކެޓެގަރީގެ އެންމެ މޮޅު ފިރިހެން ފެތުންތެރިއަކަށް މުޙައްމަދު އާން ހުސައިން އަދި އެންމެ މޮޅު އަންހެން ފެތުންތެރިއަކަށް ފާތިމަތު އަންޖަލް ފަޔާޒް ހޮވިއްޖެއެވެ. ސްވިމިންގ އެސޯސިއޭޝަން ޗެމްޕިއަންޝިޕްގެ މިއަހަރުގެ އެންމެ މޮޅު ފެތުންތެރިންނަށް ހޮވިފައިވަނީ މޫސާ ޖާއިޝް ސަނާއުﷲ ޝަކީބް، މަރިޔަމް ޒިވާ ޒާހިދު، މުޙައްމަދު އަލްމާން ޒޫމަލް ރަޝީދު، އައިޝާ ޒާޔާ ހުސައިން، ޒާކިން އަޝްރަފް، އަމްނާ ތަޒްކިޔާ މިރުސާދު، އާން އަދި އަންޖަލްއެވެ.

މި ފެތުންތެރިންގެ ތެރެއިން ޖާއިޝް އެންމެ މޮޅު ފެތުންތެރިޔާގެ މަގާމު ހޯދީ އީއޭޑީ ކެޓަގަރީގެ ފިރިހެން ކުދިންގެ ބައިންނެވެ. މި ކެޓަގަރީގެ އަންހެން ކުދިންގެ ބައިން އެންމެ މޮޅު ފެތުންތެރިއަކަށް ހޮވިފައިވަނީ ޒިވާއެވެ. ފިރިހެން ކުދިންގެ ޖޫނިއަރ އޭ ކެޓަގަރީން އެންމެ މޮޅު ފެތުންތެރިޔާގެ މަގާމު ހޯދީ އަލްމާނެވެ. މި ކެޓަގަރީގެ އެންމެ މޮޅު އަންހެން ފެތުންތެރިއަކަށް ހޮވިފައިވަނީ ޒާޔާއެވެ. ޒާކިން އެންމެ މޮޅު ފެތުންތެރިޔާގެ މަގާމު ހޯދީ ފިރިހެން ކުދިންގެ ޖޫނިއަރ ބީ ކެޓަގަރީންނެވެ. މި ކެޓަގަރީގެ އެންމެ މޮޅު އަންހެން ފެތުންތެރިއަކަށް ހޮވިފައިވަނީ ތަޒްކިޔާއެވެ.

(ފޮޓޯ ކްރެޑިޓްސް: ސްވިމިންގ އެސޯސިއޭޝަން)

ނޮވެމްބަރު 24 އިން ފެށިގެން 28 ވަނަ ދުވަހުގެ ނިޔަލަށް ކުރިޔަށް ގެންދިޔަ މި މުބާރާތުގައި އެކި ކެޓަގަރީތަކުގައި 200 އަށްވުރެ ގިނަ ކުދިން ބައިވެރިވިއެވެ. މި މުބާރާތުން ވަނަތަކަށްދިޔަ ފެތުންތެރިންނަށް މެޑެލް އަދި އިނާމު ދެއްވީ އެކަމަށްޓަކައި ހޮނިހިރު ދުވަހު ހުޅުމާލެ ސްވިމިންގ ޕޫލްގައި ބޭއްވި ރަސްމިއްޔާތުގައެވެ. މި ރަސްމިއްޔާތު ޝަރަފުވެރިކޮށްދެއްވީ ކުޅިވަރާއި ހަށިހެޔޮކަމާއބެހޭ ވުޒާރާގެ ސްޓޭޓް މިނިސްޓަރު އަބްދުއްރައްޒާގް އިބްރާހީމެވެ.

އެންމެ މޮޅު ފެތުންތެރިންގެ އިތުރުން ކޮންމެ ކެޓަގަރީއެއްގެ ދެވަނަ އަދި ތިންވަނައަށް އައި ފެތުންތެރިންނަށްވެސް މި ރަސްމިއްޔާތުގައި ވަނީ ޓްރޮފީ އާއި މެޑެލް ހަވާލުކޮށްދެއްވާފައެވެ