އަބަދު އެއް ހަރަކާތަކުން ޔަމާލް މޮޅެއް ނުވާނެ: ރިވާލްޑޯ

Read Time:3 Minute, 19 Second

އަބަދު އެއް ކަމެއް ކޮށްގެން ބާސެލޯނާގެ އެޓޭކިން މިޑްފީލްޑަރު ލަމީން ޔަމާލް މޮޅެއް ނުވާނެ ކަމަށް އެ ޓީމުގެ ލެޖެންޑް ބްރެޒިލްގެ ރިވާލްޑޯ ބުނެފިއެވެ. ބާސެލޯނާގައި މޮޅަށް ކުޅެ 1999 ވަނަ އަހަރުގެ ދުނިޔޭގެ މޮޅު ކުޅުންތެރިޔާގެ މަގާމު ހޯދި ރިވާލްޑޯ ބުނީ ޔަމާލް ދަނޑުމަތީގައި އުޅޭގޮތް ތަފާތު ކުރަން ޖެހޭ ކަމަށެވެ. “ޔަމާލަކީ މޮޅު ކުޅުންތެރިއެއް. އެކަމަކު އަބަދު އެއްކަމެއް ކޮށްގެން އޭނާގެ މޮޅު ކަމެއް ނުފެންނާނެ. އޭނާ ކުޅެނީ އަބަދު އެއްތަނެއްގައި. އަބަދުވެސް ކުރަނީ އެއް ކަމެއް. ގެންނަނީ އެއް ހަރަކާތެއް. ބޯޅަ ޑްރިބްލް ކުރުމުގައި ވެސް އަބަދުވެސް އެއް ކަމެއް ކުރަނީ. މިގޮތަށް މީހާގެ މޮޅުކަމެއް އަބަދަކު ނުދެއްކޭނެ. ޗެލްސީ (ޗެމްޕިއަންސް ލީގުގައި ޗެލްސީ އަތުން ބާސެލޯނާ 3-0އިން ބަލިވި) މެޗުގައި ފެނިގެންދިޔައީ މިކަން،” ރިވާލްޑޯ ބުންޏެވެ.

“ޗެލްސީ މެޗުގައި ކީއްވެ ޔަމާލަށް މޮޅަށް ކުޅެ ގޯލް ނުޖެހުނީ. ސަބަބަކީ އިދިކޮޅު ކުޅުންތެރިން އޭނާ ދެނެގަނެފައިވާތީވެ. އޭނާ ކުރަނީ ކޮންކަމެއްކަން ދެނެގަނެ އޭނާ ވަރަށް ބޮޑަށް މާކްކޮށްގެން ކުޅުނީ. މިހެންވެ ޔަމާލް އެބަޖެހޭ އަބަދު އެއްތަނެއްގައި ނުހުރެ ދަނޑުމަތީގައި ތަފާތު ހުނަރުތައް ދައްކަން. އޭނާގެ މޮޅުކަން ފެންނާނީ އޭރުން،” ރިވާލްޑޯ ބުންޏެވެ. އުމުރުން 18 އަހަރުގެ ޔަމާލަކީ ބާސެލޯނާގެ އިތުރުން ދުނިޔޭގައި މިވަގުތު ހުރި އެންމެ މޮޅު އެއް ކުޅުންތެރިޔާ އެވެ. ނަމަވެސް ޔަމާލްގެ މޮޅުކަން ސާބިތުކޮށްދިނުމުގައި އިތުރަށް މަސައްކަތް ކުރަންޖެހޭ ކަމަށް ގިނަ ބަޔަކު ދަނީ ބުނަމުންނެވެ. ބާސެލޯނާގެ ކުރީގެ ކޯޗު އަދި މިހާރު މެންޗެސްޓާ ސިޓީގެ ކޯޗު ޕެޕް ގާޑިއޯލާ ބުނީ ޔަމާލް އާއި ބާސެލޯނާ އާއި އާޖެންޓީނާގެ ލެޖެންޑް ލަޔޮނަލް މެސީ އަޅާ ކިޔަން ޖެހޭނީ މެސީ މެދުކެނޑުމެއްނެތި ދެއްކި މޮޅު ކުޅުން ޔަމާލް 10 އަހަރު ދައްކައިފިނަމަ ކަމަށެވެ.