ރާއްޖެއަށް ކުރަނީ ތޫފާންގެ އަސަރު، ވިއްސާރަ ބޮޑަށް ކުރާނީ މެދުރާއްޖެތެރެ އާއި ދެކުނަށް

Read Time:4 Minute, 16 Second

ރާއްޖެއަށް މިއަދު ކުރަމުންދާ ވިއްސާރައަކީ ސްރީލަންކާ ސަރަޙައްދުގައި އުފެދިފައިވާ ތޫފާނުގެ ސަބަބުން އުފެދިފައިވާ ވިއްސާރަ ވިލާތަކާއެކު ކުރަމުންދާ ވިއްސާރަކަށް މޫސުމާ ބެހޭ ޤައުމީ އިދާރާއިން ވިދާޅުވެއްޖެއެވެ. މިވިއްސާރައިގެ އަސަރު އެންމެ ބޮޑަށް ކުރާނީ މެދުރާއްޖެތެރެއާއި ދެކުނުގެ އަތޮޅުތަކަށްކަމަށް މެޓުން ވިދާޅުވެއެވެ.

ރާއްޖެއަށް މިހާރު ކުރަމުންދާ ވިއްސާރައަކީ ރާއްޖެއާ ކައިރިން 2 ސަރަޙައްދެއްގައި އުފެދިފައިވާ ތޫފާންތަކާއެކު ކުރަމުންދާ ވިއްސާރަކަށް މޫސުމާ ބެހޭ ޤައުމީ އިދާރާއިން ވިދާޅުވެއެވެ. މެލޭޝިއާ ސަރަޙައްދުގައި އަދި ސްރީލަންކާ ސަރަޙައްދުގައި އުފެދުނު ތޫފާންތަކާއެކު މިވޭތުވެދިޔަ ދުވަސްތަކުގައި ރާއްޖޭގެ ބޮޑު ބަޔަކަށްވަނީ ވިއްސާރަކޮށްފައެވެ.

މެލޭޝިއާ ސަރަޙައްދުގައި އުފެދިފައިވާ ތޫފާނުގެ ބާރު މިހާރު ދަށްވެފައިވާއިރު ލަންކާ ސަރަޙައްދުގައު އުފެދިފައިވާ ތޫފާން ރާއްޖެއާއި ދުރަށް މިހާރުދަނީ ދަތުރުކުރަމުންނެވެ. އެހެންނަމަވެސް މިތޫފާނުގެ ސަބަބުން އުފެދިފައިވާ ވިއްސާރަ ވިލާތަށް ރާއްޖެ ސަރަޙައްދަށް އަރަމުންދާއިރު އޭގެ ސަބަބުން މެދުރާއްޖެތެރޭގެ އެކި ހިސާބުތަކަށާއި ދެކުނުގެ އަތޮޅުތަކަށް ކުރިއަށް އޮތް 24 ގަޑިއިރުވެސް ވިއްސާރަކުރާނެކަމަށް މެޓު އޮފީހުން ލަފާކުރައްވައެވެ.

Alert white for heavy rain and thunderstorms with gusts of 40 mph. pic.twitter.com/fKLbbqyk5d

— Maldives Meteorology (@MetMaldives) November 29, 2025

ގުގުރުމާއެކު ބޯކޮށް ވާރޭވެހޭނެކަމަށް ލަފާކޮށް މެޓު އޮފީހުންވަނީ ކ.އަތޮޅުން ފެށިގެން ދ.އަތޮޅާއި ހަމައަށް ހުދު ސަމާލު ނެރެފައެވެ. މި ސަމާލު ނެރެފައިވަނީ މިއަދު ހެނދުނު 10:30 އިން މެންދުރުފަހު 15:30 އަށެވެ. މިވަގުތުތަކުގައި ވިލާގަނޑުގައި ގަޑިއަކު ގާތްގަނޑަކަށް 40 މޭލަށް ވައިގަދަވާނެކަމަށް މެޓު އޮފީހުން ވިދާޅުވެއެވެ.

(ފޮޓޯ ކްރެޑިޓްސް: ޕީއެސްއެމް ނިއުސް)

މިހާރު ކުރަމުންދާ ވިއްސާރަ ކޮންމެވެސް ވަރަކަށް އަންގާރަދުވަހުން ފެށިގެން އަލިކުރާނެކަމަށް ލަފާކުރެވުނު ނަމަވެސް، މޫސުން އެއްކޮށް އަލިނުވާނެކަމަށް މެޓު އޮފީހުން ވިދާޅުވެއެވެ. އެހެންކަމުން ކުރިއަށް އޮތް ހަފްތާގެ ތެރޭގައިވެސް މޫސުމަށް ޚާއްސަ ސަމާލުކަމެއް ދޭންޖެހެއެވެ. ރާއްޖެއަށް މިދުވަސްކޮޅު ވިއްސާރަކުރަމުންދާއިރު ދިވެހީން އާންމުކޮށް ގޮސްއުޅޭ ބައެއް ޤައުމުތަކަށްވެސް ވިއްސާރައިގެ ގެއްލުންތައްދަނީ ލިބެމުންނެވެ.