ޕޮލިސް ކޮމިޝަނަރު ނަވީނާއި އިތުރު އޮފިސަރުންތަކެއް ސަސްޕެންޑުކުރަން ހުށަހަޅަން ފާސްކޮށްފި

Read Time:3 Minute, 6 Second

ރައްޔިތުންގެ މަޖިލިހުގެ މާލިއްޔަތު ކޮމިޓީން އިއްޔެ ފާސްކޮށްފައިވަނީ ޕޮލިސް ކޮމިޝަނަރު އިސްމާއިލް ނަވީނާއި ފުލުހުންގެ އިތުރު ހަ އޮފިސަރަކު ސަސްޕެންޑުކުރަން ކަމާބެހޭ ފަރާތްތަކަށް ހުށަހަޅާށެވެ. މި ނިންމުން ނިންމާފައިވަނީ ފުލުހުންގެ ވެލްފެއާ ކުންފުނި ޕޮލްކޯ އާއި އެހެނިހެން ބައެއް ކަންކަމާ ގުޅިގެން ކޮރަޕްޝަނަށް ތުހުމަތު ކުރެވޭ މައްސަލަތަކަކާ ގުޅިގެން، ކޮމިޓީން ބޭއްވި ސިއްރު ބައްދަލުވުންތަކެއްގަ އެވެ.

މި ހަތް ބޭފުޅުންގެ ތެރޭގައި ސުޕްރިންޓެންޑް އޮފް ޕޮލިސްއަކާއި އެސިސްޓެންޓް ކޮމިޝަނަރުން ހިމެނެ އެވެ. މި ކޮމިޓީގެ ރިޕޯޓު ރައްޔިތުންގެ މަޖިލިހުގެ ތަޅުމުން ފާސްކުރަން ޖެހޭނެ އެވެ. ކޮރަޕްޝަންގެ ތުހުމަތުތަކާ ގުޅިގެން ފިޔަވަޅު އަޅަން ހުށަހެޅުނު އޮފިސަރުންގެ ތެރެއިން އޭސީޕީ މުހައްމަދު ދާއޫދުގެ މައްސަލައެއް މިދިޔަ މަހުވެސް ކޮމިޓީން ވަނީ ފެންމަތިކޮށްފަ އެވެ. އެއީ އޭނާގެ އާއިލާގެ ބައެއް މެންބަރުންގެ އެކައުންޓުތަކަށް ނާޖާއިޒް ފައިސާ ޖަމާވި ކަމަށް ތުހުމަތު ކުރެވޭ މައްސަލައެއް ކަމަށް ކޮމިޓީގެ ރިޕޯޓެއްގައިވެ އެވެ. ދާއޫދު އެ ތުހުމަތުތައް ދޮގުކުރެއްވި ނަމަވެސް، މިދިޔަ މަހުގެ އެއްވަނަ ދުވަހުން ފެށިގެން އޭނާ ވަނީ ހުޅުމާލޭ ޕޮލިސްގެ އެންމެ އިސްވެރިޔާގެ މަގާމުގެ މަސްއޫލިއްޔަތުތަކުން އެކަހެރިކޮށްފަ އެވެ. މާލިއްޔަތު ކޮމިޓީން ޕޮލްކޯއާ ގުޅޭ ކޮރަޕްޝަންގެ މައްސަލަތައް ބަލަމުން އަންނަތާ ދުވަސްތަކެއް ވެފައިވާ އިރު، ކޮމިޓީގެ ނައިބު ރައީސް އަހުމަދު ނާޒިމް ކުރިން ވިދާޅުވީ ތުހުމަތު ކުރެވޭ ބޭފުޅުން އިސް މަގާމުތަކުގައި ތިއްބެވުމުން މަސްލަހަތު ފުށުއަރާނެ ކަމަށާއި، ޖިނާއީ ތަހުގީގެއް ހިންގޭނެ ވަރަށް ހެކި ހުރި ކަމަށެވެ.