ގާޒީ ފާއިޒް ވަކިކުރަން މަޖިލިހަށް ހުށަހަޅަން ޖޭއެސްސީން ނިންމައިފި

Read Time:4 Minute, 23 Second

ކްރިމިނަލް ކޯޓުގެ ގާޒީ ހުސައިން ފާއިޒް ރަޝާދު ގާނޫނުއަސާސީ އާއި ގާނޫނުތަކާ ހިލާފަށް އަމަލުކޮށްފައިވާކަން ސާބިތުވެފައި ވާތީ، އޭނާ ގާޒީކަމުން ވަކިކުރަން ރައްޔިތުންގެ މަޖިލިހަށް ހުށަހަޅަން ޖުޑީޝަލް ސާވިސް ކޮމިޝަން (ޖޭއެސްސީ) އިން އިއްޔެ ނިންމައިފި އެވެ. މިކަމާ ގުޅިގެން މިދިޔަ އޮކްޓޫބަރު މަހުން ފެށިގެން ފާއިޒް ވަނީ 60 ދުވަހަށް ސަސްޕެންޑުކޮށްފަ އެވެ. ޖޭއެސްސީން ބެލި މައްސަލަތަކުގެ ތެރޭގައި ހިމެނެނީ މަސްތުވާތަކެތީގެ މައްސަލަތަކުގައި ތުހުމަތުކުރެވޭ އަލީ އަންވަރު މުހައްމަދު ބަންދުން ދޫކޮށްލުމާއި، ނަރުހެއް މަރާލި މައްސަލައެއްގައި ޝަރީއަތް ނިމެންދެން ބަންދުކޮށްފައިވާ ހަލީމަތު ލަމްހާގެ ބަންދާ މެދު އޭނާ އަމަލުކުރި ގޮތެވެ.

އަލީ އަންވަރު، މަސްތުވާތަކެތީގެ މައްސަލައަކާ ގުޅިގެން މިދިޔަ އޮކްޓޫބަރު މަހު ހައްޔަރުކޮށް، ކޯޓުން ފަސް ދުވަހުގެ ބަންދު ދިނުމަށް ފަހު، އެއްވެސް ޝަރުތަކާ ނުލައި ދޫކޮށްލުމުން އޭނާ ލަންކާއަށް ފުރައިގެން ދިޔައެވެ. ފުލުހުންގެ މަސައްކަތުން އަލީ އަންވަރު ޑީޕޯޓްކޮށް ރާއްޖެ ގެނެސް އަލުން ހައްޔަރުކުރި އެވެ. އަލީ އަންވަރަކީ 2019 ވަނަ އަހަރު 70 ކިލޯގެ މަސްތުވާތަކެތީގެ މައްސަލައެއްގައި ވެސް ހައްޔަރުކޮށްފައިވާ މީހެކެވެ. ލަމްހާގެ މައްސަލައަށް ބަލާއިރު، އޭނާ ޝަރީއަތް ނިމެންދެން ބަންދުކޮށްފައި ހުއްޓާ ގާޒީ ފާއިޒް ދެ ފަހަރެއްގެ މަތިން ބަންދުން ދޫކޮށްލާފައިވެ އެވެ. މި ނިންމުންތައް ހައި ކޯޓުން ވަނީ ބާތިލްކޮށްފަ އެވެ. އެންމެ ފަހުން ވެސް އޮކްޓޫބަރު މަހު ލަމްހާ ދޫކޮށްލީ، މުޖުތަމައުއަށް އޭނާގެ ފަރާތުން އޮތް ނުރައްކަލުގެ އެސެސްމަންޓެއް ދައުލަތުން ނުހަދާތީ ކަމަށް ފާއިޒް ވިދާޅުވެ އެވެ. ނަމަވެސް، ފާއިޒް ސަސްޕެންޑުކުރި ފަހުން، މި މަހުގެ 4 ވަނަ ދުވަހު އަނެއްކާވެސް ލަމްހާ ޝަރީއަތް ނިމެންދެން ބަންދުކުރަން އަމުރުކުރި އެވެ.

ގާޒީ ފާއިޒް މީގެ ކުރިން 2021 ވަނަ އަހަރު ވެސް ވަނީ ސަސްޕެންޑުކޮށްފަ އެވެ. އެފަހަރު ސަސްޕެންޑުކުރީ އޭރުގެ ރައީސް އަބްދުﷲ ޔާމީން ޖަލަށްލި މައްސަލައާ ބެހޭ ގޮތުން ފަނޑިޔާރުން މީހަކާ އެކު ދައްކާފައިވާ ކަމަށް ބުނާ އޯޑިއޯތަކެއް ލީކުވި މައްސަލައަކާ ގުޅިގެންނެވެ. ނަމަވެސް އެ އޯޑިއޯތައް ސައްހަ ނޫން ކަމަށް ނިންމުމުން އޭނާގެ ސަސްޕެންޝަން އުވާލި އެވެ. އަދި ހަސްމަކު ޝަރީއަތުގެ މަޖިލީހަށް ނުވައްދައި ހުކުމްކުރި މައްސަލައެއްގައި ވެސް ޖޭއެސްސީން އޭނާއަށް ނަސޭހަތްތެރިވެފައިވެ އެވެ.