މިސަރުކާރަށް ވުރެ ޓެކްސީ ޑްރައިވަރުންގެ އަގުވަޒަންކުރާ ސަރުކާރެއް ނެތް: ރައީސް

Read Time:4 Minute, 30 Second

(ފޮޓޯ ކްރެޑިޓްސް: ރައީސް އޮފީސް)

ރައީސް ޑރ. މުހައްމަދު މުއިއްޒު ވިދާޅުވީ މި ސަރުކާރަށް ވުރެ ޓެކްސީ ޑްރައިވަރުންގެ އަގުވަޒަންކުރާ ސަރުކާރެއް ނާންނާނެ ކަމަށެވެ. މިއީ އާއްމު ދަތުރުފަތުރުގެ ގޮތުގައި ސަރުކާރުން ފަށަން ތައްޔާރުވެފައިވާ ޓެކްސީ ލައިންގެ ހިދުމަތާ ގުޅިގެން ޑްރައިވަރުން ކަންބޮޑުވުން ފާޅުކުރުމާ ގުޅިގެން ރޭ މާލޭގައި ދެއްވި ޖަވާބެކެވެ.

ރައީސް ވިދާޅުވީ ޓެކްސީ ޑްރައިވަރުންނަށް ސަރުކާރުން އިސްކަންދޭކަން ދައްކުވައިދެނީ، ފްލެޓު ސްކީމްގައި ޓެކްސީ ޑްރައިވަރުންގެ އާއިލާތަކަށް 50 ފްލެޓް ހާއްސަކުރުމާއި، ގާނޫނީ ހައިސިއްޔަތު ލިބިގެންދާ ޓެކްސީ ޑްރައިވަރުންގެ ދަފްތަރެއް ގާއިމުކޮށް، އެ ދަފްތަރުގައި ހިމެނޭ ފަރާތްތަކަށް ހައުސިން ސްކީމްތަކާއި ލުއި ލޯނު ފަދަ ފުރުސަތުތައް ލިބޭނެ ގޮތް ހަމަޖެއްސުންފަދަ ކަންކަމުންނެވެ. މިހާތަނަށް 100 އަށް ވުރެ ގިނަ ޑްރައިވަރުން މި ދަފްތަރުގައި ވަނީ ނަންނޯޓުކޮށްފަ އެވެ. ރައީސް އިތުރަށް ވިދާޅުވީ އެމްޓީސީސީއާ ހަވާލުކޮށްގެން ފަށާ ޓެކްސީ ލައިންގެ ހިދުމަތަކީ ޓެކްސީ ޑްރައިވަރުންގެ ވިޔަފާރި އަތުލުމުގެ ބޭނުމުގައި ފަށާ ހިދުމަތެއް ނޫން ކަމަށާއި، އެއީ ރައްޔިތުންނަށް ދަތުރުފަތުރުގެ ރަނގަޅު ހިދުމަތެއް ފޯރުކޮށްދިނުމުގެ ބޭނުމުގައި ފަށާ ހިދުމަތެއް ކަމަށެވެ. މި ހިދުމަތަށް ޑްރައިވަރުން ހޯދުމުގައި މިހާރު ޓެކްސީ ޑްރައިވަރުންނަށް އިސްކަންދޭނެ ކަމަށާއި، 150 އިލެކްޓްރިކް ވެހިކަލް އަންނަ އަހަރުގެ ޖެނުއަރީ ހިސާބުގައި ރާއްޖެ ގެނެސް ހިދުމަތް ފެށޭނެ ކަމަށް ވެސް އެމަނިކުފާނު ވިދާޅުވި އެވެ. މި ހިދުމަތުން ޑްރައިވަރުންނަށް ގަވާއިދުން ފައިސާ ލިބި، އާއިލާއާ އެކު ވަގުތު ހޭދަކޮށް، އަބުރުވެރި ދިރިއުޅުމެއް ލިބޭނެ ކަމަށް ރައީސް ވިދާޅުވި އެވެ.

24 ގަޑިއިރު ދޭން ނިންމާފައިވާ މި ހިދުމަތަކީ އޫބާ ފަދަ އެޕްލިކޭޝަނެއް ބޭނުންކޮށްގެން ދޭ ހިދުމަތެކެވެ. މި ހިދުމަތް ފަށާނީ ތިން ފިޔަވައްސަކަށް ބަހާލައިގެންނެވެ. ފުރަތަމަ ފިޔަވަހީގައި މާލެ، ހުޅުމާލެ އަދި ވެލާނާ އިންޓަނޭޝަނަލް އެއާޕޯޓަށް ހިދުމަތް ދޭން ފަށާއިރު، ދެވަނަ ފިޔަވަހީގައި 2026 އަދި 2027 ވަނަ އަހަރު ވިލިމާލެ އާއި ތިލަފުއްޓަށް ހިދުމަތް ތައާރަފްކުރާނެ އެވެ. ތިންވަނަ ފިޔަވަހީގައި ރަސްމާލެ، ގިރާވަރު، އައްޑޫ އަދި ފުވައްމުލަކުގައި މި ހިދުމަތް ފެށުމަށް ހަމަޖެހިފައިވެ އެވެ. ކުރިން މި ހިދުމަތް މި އަހަރުގެ އޮގަސްޓްގައި ފެށޭނެ ކަމަށް އިއުލާނުކޮށްފައިވީ ނަމަވެސް، އެކި ސަބަބުތަކާ ހުރެ ވަނީ ލަސްވެފަ އެވެ.