ފަތުރުވެރިކަން ތަރައްޤީ ކުރެވޭނީ، ކާރިސާތަކަށް ތައްޔާރުވެފައިވާ އުމްރާނީ ވަސީލަތްތައް ޤާއިމްކޮށްގެން: ޝިއުރީ

Read Time:5 Minute, 11 Second

(ފޮޓޯ ކްރެޑިޓްސް: ވީއެމްސީ)

އައްސޭރިފަށުގެ ސަރަހައްދުތަކުގައި ފަތުރުވެރިކަން ތަރައްޤީ ކުރާއިރު، ޤުދުރަތީ މުއްސަނދިކަން ޙިމާޔަތްކޮށް މޫސުމީ ކާރިސާތަކަށް ތައްޔާރުވެފައިވާ އުމްރާނީ ވަސީލަތްތައް ޤާއިމްކުރުން މުހިންމު ކަމަށް ވިސިޓް މޯލްޑިވްސް ކޯޕަރޭޝަން، ވީއެމްސީގެ މެނޭޖިންގ ޑިރެކްޓަރ އިބްރާހިމް ޝިޢުރީ ވިދާޅުވެެއްޖެއެވެ. ޝިއުރީ މިހެން ވިދާޅުވީ، މިމަހުގެ 18އިން 21އަށް ޗައިނާގައި ބޭއްވި ޓްރޮޕިކަލް ކޯސްޓަލް ސިޓީ ޓުއަރިޒަމް ބައްދަލުވުމުގައި ވާހަކަ ދައްކަވަމުންނެވެ. މި ބައްދަލުވުމުގައި ޕާޓާގެ ބޯޑުގައި ދިވެހިރާއްޖެ ތަމްސީލްކުރައްވާ ވާހަކަފުޅު ދައްކަވަމުން ވިޒިޓް މޯލްޑިވްސް ކޯޕަރޭޝަން، ވީއެމްސީގެ މެނޭޖިންގ ޑިރެކްޓަރ އިބްރާހިމް ޝިއުރީ ވަނީ، ރާއްޖެއިން ފަތުރުވެރިކަމުގެ ދާއިރާގައި ހޯދާފައިވާ ކާމިޔާބީތައް ޙިއްސާކުރައްވާފައެވެ.

ޝިޢުރީގެ ވާހަކަފުޅުގައި ދިވެހިރާއްޖޭގެ ސިންގަލް-އައިލެންޑް ރިސޯޓް މޮޑެލްގެ ކާމިޔާބީއަށް ބާރުއަޅުއްވައި، އައްސޭރިފަށުގެ ސިޓީތަކުން ފަތުރުވެރިކަމާއި، އިޤްތިޞާދީ އެހެނިހެން ހަރަކާތްތަކާއި މުޖުތަމަޢުގެ އަސާސީ ޚިދުމަތްތައް ޒޯން ކުރުމަށް ކުރެވިދާނެ ކަންކަމަށް އިޝާރާތް ކުރެއްވިއެވެ. އަދި ރާއްޖޭގެ ގެސްޓްހައުސް ވިޔަފާރީގެ ސަބަބުން ރަށްރަށުގެ އިޤްތިޞާދަށް ލިބޭ ކުރިއެރުމުގެ އަލީގައި ދެމެހެއްޓެނިވި ގޮތެެއްގައި މިފަދަ ފަތުރުވެރިކަމެއް ކުރިއެރުވޭނެ ގޮތްތަކަށްވެސް އޭނާ އަލިއަޅުއްވާލެއްވިއެވެ.

މީގެ އިތުރުން ދިވެހިރާއްޖެ ފަދަ ޖަޒީރާ ޤައުމުތަކަށް ކުރިމަތިވެފައިވާ އެންމެ ބޮޑު ގޮންޖެހުމަކީ، މޫސުމީ ބަދަލުތަކުގެ ސަބަބުން ކުރިމަތިވާ ޤުދުރަތީ ލޮޅުންތައްކަން ފާހަގަކުރައްވައި ޝިއުރީ ވަނީ، ތިމާވެއްޓާއި ރައްޓެހި އުމްރާނީ ވަސީލަތްތައް ޤާއިމުކުރުމަށް ބާރުއަޅުއްވާފައެވެ. އަދި އައްސޭރިފަށުގެ ސަރަހައްދުތަކުގައި ފަތުރުވެރިކަން ތަރައްޤީ ކުރާއިރު، ޤުދުރަތީ މުއްސަނދިކަން ޙިމާޔަތް ކުރުމާއެކު، މޫސުމީ ކާރިސާތަކަށް ތައްޔާރުވެފައިވާ ފަދަ އުމްރާނީ ވަސީލަތްތައް ޤާއިމްކުރުމަށްވެސް އޭނާ ގޮވާލެއްވިއެވެ. މިބައްދަލުވުމުގެ އިތުރުން ޝިޢުރީ ވަނީ، ރާއްޖޭގެ ހައި-އެންޑް ފަތުރުވެރިކަމުގެ މޮޑަލުގެ އަލީގައި ސަންޔާގެ ފަތުރުވެރިކަން ބައްޓަން ކުރުމަށް ކުރެވިދާނެ ކަންކަމާބެހޭ ޕެނަލް ޑިސްކަޝަން އެއްގައިވެސް ބައިވެރިވެ ވަޑައިގެންފައެވެ.

ޓްރޮޕިކަލް ކޯސްޓަލް ސިޓީ ޓުއަރިޒަމް ބައްދަލުވުމަކީ، ސަންޔާ ޓުއަރިޒަމް ބޯޑު އަދި ޕެސިފިކް އޭޝިޔާ ޓްރެވަލް އެސޯސިއޭޝަން، ޕާޓާއިން ގުޅިގެން އިންތިޒާމް ކުރި ބައްދަލުވުމެކެވެ. މި ބައްދަލުވުން ބޭއްވީ، “ފްރޮމް ސަންޔާ ޓު ދަ ވޯލްޑް: ރީ ތިންކިންގް ދަ ފިއުޗަރ އޮފް ޓުއަރިޒަމް ސިޓީޒް” މި ޝިއާރުގެ ދަށުންނެވެ. މި ބައްދަލުވުމުގައި ފަތުރުވެރިކަމުގެ ސިނާޢަތުގައި ހަރަކާތްތެރިވާ ފަރާތްތަކުން ބައިވެރިވިއެވެ.