އަންނަ އަހަރު ވިލިމާލޭގައި ޑޮލަރު އޭޓީއެމްއެއް ބަހައްޓާނެ: ރައީސް

Read Time:4 Minute, 25 Second

(ފޮޓޯ ކްރެޑިޓްސް: ޕީއެސްއެމް ނިއުސް)

އަންނަ އަހަރު ވިލިމާލޭގައި ބީއެމްއެލް ޑޮލަރު އޭޓީއެމެއް ބަހައްޓަން ނިންމަވާފައިވާކަން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިޢުލާންކުރައްވައިފިއެވެ. އެމަނިކުފާނު މިކަން އިޢުލާންކުރެއްވީ ވިލިމާލޭގެ ރައްޔިތުންނާ ބައްދަލުކުރެއްވުމަށް ބޭއްވި ބައްދަލުވުމުގައި ވާހަކަފުޅުދައްކަވަމުންނެވެ. އާބާދީގައި 2000 އަށްވުރެ ގިނަ މީހުން ދިރިއުޅޭ ކޮންމެ ރަށެއްގައި ޑޮލަރު އޭޓީއެމް ބެހެއްޓުމަށް ސަރުކާރުން ވަނީ ނިންމަވާފައެވެ. އެގޮތުން، އަންނަ އަހަރުގެ މާޗު މަހާ ހަމައަށް އިތުރު 70 ރަށެއްގައި ޑޮލަރު އޭޓީއެމް ބަހައްޓަވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ ވިދާޅުވެފައެވެ.

ރައީސުލްޖުމްހޫރިއްޔާ ވިލިމާލޭގެ ރައްޔިތުންނާ ބައްދަލުކުރައްވައި ވިދާޅުވީ އެ އަވަށުގެ ރައްޔިތުންގެ ހުރި ކަންބޮޑުވުންތަކަށް ހައްލު ގެނެސްދިނުމަށް ސަރުކާރުން މަސައްކަތް ކުރައްވަމުންދާ ކަމަށެވެ. އަދި އެމަނިކުފާނު ވެވަޑައިގެންފައިވާ ވައުދުތައް ފުއްދެވުމަށް މަސައްކަތްތައް ކުރިއަށްދާކަންވެސް އެމަނިކުފާނު ވިދާޅުވިއެވެ. ރައީސް ވިދާޅުވީ ކުރާ ކުޑަކަމަކުންވެސް ރައްޔިތުންނަށް އޭގެ ފައިދާ ކުރާނެ ކަންކަން ހުންނަ ކަމަށާއި އެގޮތުން ޑޮލަރު އޭޓީއެމް ބެހެއްޓުމަކީވެސް އެފަދަ މަޝްރޫއެއް ކަމަށް އެމަނިކުފާނު ވިދާޅުވިއެވެ. “އަޅުގަނޑު މިދޭތެރެއިން އިއުލާންކުރިން 70 ރަށެއްގައި ޔޫއެސް ޑޮލަރު ބަހައްޓާވަހަކަ. މިއަންނަ މާޗު މަހުގެ ނިޔަލަށްދާއިރު ބަހައްޓާވާހަކަ. އޭގެ ތެރެއިން އެއް އޭޓީއެމް ވިލިމާލޭގައި ބަހައްޓާގޮތަށް ވަނީ ހަމަޖެހިފައި،” ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވިއެވެ.

ސަރުކާރުން އިސްނަގައިގެން މުޅިރާއްޖޭގައި އޭޓީއެމް ބެހެއްޓުމަށް ކުރިއަށްގެންދާ މަޝްރޫޢުގެ ދަށުން، މިހާތަނަށް މީހުން ދިރިއުޅޭ ހުރިހާ ރަށެއްގައި ވަނީ ބީއެމްއެލް އޭޓީއެމް ބަހައްޓާފައެވެ. މިމަސައްކަތް ފުޅާކުރުމުގެ ގޮތުން ރަށްރަށުގައި ޑޮލަރު އޭޓީއެމްތައް ބަހައްޓަން ނިންމަވާފައިވަނީ ފަތުރުވެރިކަމުގެ ދާއިރާގައި މަސައްކަތް ކުރާ ވިޔަފާރިތަކަށް ލުއިތަކެއް ހޯދައިދިނުމަށް ކަމަށް ރައީސް ވަނީ ވިދާޅުވެފައެވެ. ޑޮލަރު އޭޓީއެމް ބެހެއްޓުމަށް ސަރުކާރުން ނިންމަވާފައިވަނީ ގެސްޓް ހައުސް އެންމެ ގިނަ ރަށްރަށާއި، އަރބަން ސެންޓަރުތަކާއި، އާބާދީ 2000 އަށްވުރެ ގިނަ މީހުން ދިރިއުޅޭ ހުރިހާ ރަށެއްގައެވެ.