Read Time:3 Minute, 52 Second
ދިވެހީންނަކީ އެތައް ހާސް އަހަރެއްގެ މުސްތަޤިއްލު ތާރީޚެއް އޮތް ބަޔެކެވެ. ހުރަވީ ދުވަހަކީ މި މިނިވަންކަން ނަގަހައްޓަން ކުރެވުނު ހަނގުރާމައަކުން ލިބުނު ކާމިޔާބުގެ ހަނދާން އާކުރާ ދުވަހެކެވެ. މީލާދީން 1752 ވަނަ އަހަރުގެ ޑިސެމްބަރު މަހު، އައްސުލްޠާން މުޙައްމަދު ޢިމާދުއްދީނު ރަސްކަން ކުރައްވަމުން ގެންދެވިއިރު، އެ ރަދުންނަކީ ރައްޔިތުންނަށް އޯގާތެރި ބޭފުޅެކެވެ. ނަމަވެސް، އުއްތަމަ ފަނޑިޔާރު މުޙައްމަދު ޝަމްސުއްދީނާއި އެބޭފުޅާގެ ކޮއްކޮ ޚަޠީބު އަޙްމަދު މުޙްޔިއްދީނުގެ ހިތުގައި ރަސްކަމަށް ދަހިވެތިކަން އުފެދި، ރާއްޖޭގެ ޒަމާންވީ ޢަދުއްވު ކަންނަންނޫރު ޢަލީ ރާޖާއަށް ދިވެހިރާއްޖެ ހިފުމަށް ސިއްރިޔާތުގައި ދައުވަތު ދިނެވެ. ރާއްޖޭގެ ހާލަތު އިސްލާމީ އުސޫލުތަކާ ޚިލާފުވެފައިވާ ކަމަށް ބުނެ ރަސްމީ ސިއްކަ ޖެހި ފަތްކޮޅެއް ފޮނުވުމުން، ޢަލީ ރާޖާ ހޮޅީންގެ ލަޝްކަރެއް މާލެއަށް ފޮނުވައި، ދިވެހިރާއްޖެ ހިފިއެވެ.
މި ހާދިސާގައި އައްސުލްޠާން މުޙައްމަދު ޢިމާދުއްދީން އާއި އެހެން ބޭކަލެއް ކަންނަންނޫރަށް ގެންދެވުނުއިރު، ދިވެހީންގެ މިނިވަންކަން ނިގުޅައިގަނެ، ޢަލީ ރާޖާ ދިވެހިރާއްޖޭގެ ރަސްކަމަށް އިޢުލާނުކުރިއެވެ. ހޮޅީންނަށް އެހީވި ދެ ދިވެހިންނަށް އަނިޔާކޮށް ކަނޑުފެއްތުމަށްފަހު، ހޮޅީން ދިވެހީންގެ މުދާތައް ފޭރި، އަނިޔާކޮށް، ދިވެހީން ނިކަމެތިކޮށްގެން މާލޭގައި ދިރިއުޅެމުން ދިޔައެވެ.
ތިން މަސް ދުވަހުގެ އަޅުވެތިކަމަށްފަހު، ދިވެހި ހިތްވަރުގަދަ ފަހުލަވާނުންތަކެއް ހޮޅީންގެ ވެރިކަމާ ދެކޮޅަށް ތެދުވުމުގެ މަޝްވަރާ ފެށިއެވެ. މުލީގޭ ދޮން ހަސަން މަނިކުފާނު (ފަހުން ދޮންބަންޑާރައިން) ގެ އިސްވެރިކަމުގެ ދަށުން 200 ފަހުލަވާނުންގެ ލަޝްކަރެއް އެއްކޮށް، ހޮޅީން ނިދާފައި ތިއްބާ ކުއްލި ހަމަލާއެއް ދީ ނަސްރު ހޯދިއެވެ. މީލާދީން 1753 ވަނަ އަހަރު ޖުމާދިލްއާޚިރު މަހުން 3 ވީ އާދިއްތަ ވިލޭރޭގައެވެ. މި ދުވަހުގެ މުހިންމު ބަޠަލަކީ ފަހުން އައްސުލްޠާނުލްޣާޒީ ޙަސަން ޢިއްޒުއްދީނުގެ ނަމުން މަޝްހޫރުވި މުލީގޭ ދޮން ހަސަން މަނިކުފާނެވެ. މިއަދު އަޅުގަނޑުމެން ފާހަގަކުރާ ހުރަވީ ދުވަހަކީ މި ކާމިޔާބީގެ ހަނދާނެވެ.
Happy
0 %
Sad
0 %
Excited
100 %
Sleepy
0 %
Angry
0 %
Surprise
0 %
0
0