މާލޭގައި އަލަށް ހުޅުވި ޕްރައިމަރީ ހެލްތުކެއަރ ސެންޓަރުން ޚިދުމަތް ދޭން ފަށައިފި

Read Time:4 Minute, 52 Second

(ފޮޓޯ ކްރެޑިޓްސް: ރައީސް އޮފީސް)

ޢާންމު ޞިއްޙަތުގެ ނިޒާމު ވަރުގަދަކުރެއްވުމުގެ ގޮތުން، ސަރުކާރުން މާލެ ސަރަޙައްދުގައި ޤާއިމުކުރެއްވި ފުރަތަމަ އަރބަން ޕްރައިމަރީ ހެލްތުކެއަރ ސެންޓަރުން ޚިދުމަތް ދޭންފަށައިފިއެވެ. މި ސެންޓަރު ހުޅުވައިދެއްވާފައިވަނީ މިމަހުގެ 19 ވަނަ ދުވަހު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއެވެ. އައިޖީއެމްއެޗްގެ ދަށުން ހިންގާ މި ސެންޓަރުން ޞިއްޙީ އާންމު މަޢުލޫމާތު ދިނުމާއި، މެޑިކަލް ޗެކަޕްތައް ހެދުމާއި، އާންމު ބަލިތަކަށް ބޭސްފަރުވާ ކުރުމުގެ ޚިދުމަތްތައް ފޯރުކޮށްދެއެވެ. މީގެތެރޭގައި ޖީޕީ ކްލިނިކާއި، ކުޑަކުދިންގެ ހެލްތު ކްލިނިކާއި، ވެލްނެސް ކްލިނިކެއް ހިމެނެއެވެ. މި ސެންޓަރުން ކޮންމެ ދުވަހެއްގެ ހެނދުނު 8:30 އިން ރޭގަނޑު 10 އާ ހަމައަށް ޚިދުމަތްދޭއިރު، ހުކުރު ދުވަހު މެންދުރުފަހު 3:30 އިން ރޭގަނޑު 10 އާ ހަމައަށް ޚިދުމަތް ދެއެވެ.

(ފޮޓޯ ކްރެޑިޓްސް: ރައީސް އޮފީސް)

ސެންޓަރުގެ ޚިދުމަތްތައް މައިގަނޑު ގޮތެއްގައި ބެހިފައިވަނީ އާންމު ބަލިތަކުގެ ޑޮކްޓަރުންނަށް ދެއްކުމާއި، އިތުރު ފަރުވާ ބޭނުންވާ ހާލަތްތަކުގައި ޚާއްޞަ ޑޮކްޓަރުންގެ ލަފާ ހޯދުމުގެ އިންތިޒާމު ހަމަޖައްސައިދިނުމަށެވެ. އަދި ޢާންމު ޞިއްޙަތު ކުރިއެރުވުމަށް ޤައުމީ ފެންވަރުގައި ހިންގާ ޕްރޮގްރާމްތައްވެސް މި މަރުކަޒުގައި ކުރިއަށްގެންދެއެވެ. އެގޮތުން، ކުޑަކުދިންގެ ހެދިބޮޑުވުން ބެލުމާއި ވެކްސިން ދިނުމުގެ ޚިދުމަތްތަކުގެ އިތުރުން، ޞިއްޙީ ރަނގަޅު އާދަތަކަށް ހޭލުންތެރިކަން އިތުރުކުރުމާއި، ނަފްސާނީ ދުޅަހެޔޮކަމާއި، ދުންފަތާ ދުރުވުމަށް އެހީތެރިވެދޭ ކުލިނިކްތަކުގެ ޚިދުމަތްވެސް ލިބިގެންދާނެއެވެ. ޖީޕީ ކްލިނިކުން އާންމު ބަލިތަކަށް ފަރުވާ ދިނުމާއި، ޓެސްޓު ހެދުމާއި، ބޭސް ސިޓީ އައުކުރުން ފަދަ ޚިދުމަތްތައް ދޭއިރު، ކުޑަކުދިންގެ ކްލިނިކުން ތުއްތު ކުދިންގެ ހެދިބޮޑުވުން ބަލައި، ވެކްސިން ދީ، ކެއިންބުއިމާ ބެހޭގޮތުން އިރުޝާދު ދެއެވެ. ވެލްނެސް ކްލިނިކުން ދަތުރުވެރިންގެ ވެކްސިނާއި ދުންފަތާ ދުރުވުމަށް އެހީތެރިކަމާއި ނަފްސާނީ ދުޅަހެޔޮކަމުގެ ކައުންސެލިންގް ޚިދުމަތް ދެއެވެ.

ބަލިޖެހުމުގެ ކުރިން، ބަލިތަކުން ދިފާޢުވުމަކީ ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒުގެ ޞިއްޙީ ސިޔާސަތުގެ މުހިންމު ބަހާއަކަށް ވާތީ، މާލެ ސަރަޙައްދުގައި މިފަދަ އިތުރު 5 ސެންޓަރު (މާލޭގައި 3 ސެންޓަރު، ހުޅުމާލޭގައި 2 ސެންޓަރު) ތަރައްޤީކުރެއްވުމަށް ވަނީ ހަމަޖެހިފައެވެ. ޞިއްޙީ ދާއިރާ ހަރުދަނާކުރެއްވުމަކީ ރައީސުލްޖުމްހޫރިއްޔާ ޚާއްޞަ އިސްކަމެއްދެއްވާ ކަމަކަށްވާތީ، 2026 ވަނަ އަހަރުގެ ބަޖެޓުގައި އެންމެ ބޮޑު އިސްކަމެއް ދެއްވާފައިވަނީވެސް ޞިއްޙީ ދާއިރާއަށެވެ.