އިސްލާމީ ދާއިރާއިން މިހާރުވެސް ބިލިޔަން ރުފިޔާގެ މަޝްރޫޢުތައް ކުރިއަށްދޭ: ވަޒީރު ޑރ. ޝަހީމް

Read Time:3 Minute, 39 Second

(ފޮޓޯ ކްރެޑިޓްސް: ޕީއެސްއެމް ނިއުސް)

އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެފައިވަނީ، މިސްކިތްތަކާއި އިސްލާމީ މަރުކަޒުތަކާއި ވަޤުފު އިމާރާތްތަކާއި ކީރިތި ޤުރުއާނާ ބެހޭ މަރުކަޒުތައް ހިމެނޭހެން، ބިލިޔަން ރުފިޔާގެ މަޝްރޫޢުތަކެއް މިހާރުވެސް ކުރިއަށްދާކަމަށެވެ. ރައީސުލްޖުމްހޫރިއްޔާ ޑރ. މުޙައްމަދު މުއިއްޒުގެ ސަރުކާރުން މިވީ ދެ އަހަރު ދުވަހުގެ ތެރޭގައި 9 އިސްލާމީ މަރުކަޒު ތަރައްޤީކުރުމުގެ މަސައްކަތް ފަށާފައިވާ އިރު، ކީރިތި ޤުރުއާނާ ބެހޭ މަރުކަޒުގެ ގޮފިތައް އަތޮޅުތަކުގައި ތަރައްޤީކުރުމުގެ 5 މަޝްރޫޢުއެއް ވަނީ ފަށާފައެވެ. މީގެ އިތުރުން ސަރުކާރުން ބިނާކުރާ 44 މިސްކިތުގެ މަޝްރޫޢުއެއްވެސް ދަނީ ކުރިއަށެވެ.

ކޮންމެ ރަށެއްގައި ކީރިތި ޤުރުއާނާ ބެހޭ މަރުކަޒެއް ޤާއިމުކުރުމަކީ ރައީސްގެ ވައުދެއްކަން ފާހަގަކުރައްވައި، އިސްލާމީ މަރުކަޒުތަކާއި މިސްކިތްތައްވެސް ކްލާސްރޫމްތަކާއި ލައިބްރަރީތައް ހިމެނޭ ގޮތަށް ތަރައްޤީކުރާކަމަށް ވަޒީރު ވިދާޅުވިއެވެ. މާލެ ސަރަހައްދުގައި ހުރި ބާ މިސްކިތްތައް އަލުން ތަރައްޤީކޮށް، ގާތްގަނޑަކަށް 3 އަހަރުގެ ތެރޭގައި އެ ސަރަހައްދުގައި ހުންނާނީ އެންމެ ޒަމާނީ މިސްކިތްތައް ކަމުގައި އޭނާ ވިދާޅުވިއެވެ. ވަޤުފުގެ 4 މަޝްރޫޢުއެއް މާލޭ ސަރަޙައްދުގައި ފެށޭނެ ކަމަށާއި، އޭގެ ތެރޭގައި ދާރުލްއަރުޤަމްއާއި ކީރިތި ޤުރުއާނަށް ޚާއްސަ ވަޤުފު އިމާރާތާއި ހުޅުމާލޭގެ ދާރުލްސަލާމް ވަޤުފު އިމާރާތް ހިމެނޭނެއެވެ. އަތޮޅުތަކުގައި ކުރިއަށްގެންދާ ވަޤުފު މަޝްރޫޢުތަކުން ލިބޭ ފައިދާ، އެ އަތޮޅެއްގެ ނުވަތަ ސިޓީގެ ދީނީ ކަންކަމަށް ޚަރަދުކުރުމަށް ކައުންސިލްތަކާ ހަވާލުކުރެވޭނެކަމަށްވެސް ވަޒީރު ވިދާޅުވިއެވެ. މި މަޝްރޫޢުތަކުގެ އެންމެ ބޮޑު އަމާޒަކީ މިސްކިތްތަކުގެ ޚަރަދުތަކަށް ދައުލަތުގެ ބަޖެޓަށް ބަރޯސާ ނުވެ، މިފަދަ މަޝްރޫޢުތަކުން ލިބޭ ފައިދާއިން ހޭދަކުރުން ކަމަށް އިސްލާމީ ކަންތައްތަކާ ބެހޭ ވުޒާރާއިން ފާހަގަކުރައްވައެވެ.