ވޯލްޑް ކަޕުގެ 12 ގްރޫޕަށް ޓީމުތައް ސީޑްކޮށްފި

Read Time:5 Minute, 9 Second

އަންނަ އަހަރު އެމެރިކާގައި ބާއްވާ ދުނިޔޭގެ ތަށްޓަށް ކުޅޭ ފުޓްބޯޅަ މުބާރާތުގެ 12 ގްރޫޕަށް ޓީމުތައް ސީޑްކޮށްފިއެވެ. މުބާރާތް ކުޅޭ 48 ގައުމު ކުޅޭނެ ގޮތުގެ ގުރު ނެގުމަށް ތައްޔާރުވުމަށް ޓީމުތައް ސީޑްކުރިއިރު އެއްވަނަ ސީޑުން ޖާގަ ގެއްލުނު އެންމެ ގަދަ ގައުމަކީ ކްރޮއޭޝިޔާ އެވެ. 2018 ވަނަ އަހަރުގެ ވޯލްޑް ކަޕު ފައިނަލް ކުޅެ އެންމެ ފަހުގެ ވޯލްޑް ކަޕުގެ ތިން ވަނަ ހޯދި ގައުމު ލައްވާލީ ދެ ވަނަ ސީޑުގަ އެވެ. މީގެ މައިގަނޑު ސަބަބަކީ ރޭ އިއުލާނުކުރި ފީފާ ރޭންކިންގައި ކްރޮއޭޝިޔާ ގަދަ ނުވަ ގައުމުގެ ތެރޭގައި ނުހިމެނުމެވެ. އެ ގައުމު ލައްވާކީ 10 ވަނަ އަށެވެ.

އެއްވަނާގައި ސީޑްކޮށްފައިވާ 12 ގައުމުގެ ތެރޭގައި ހިމެނެނީ އެންމެ ފުރަތަމަ ހިމަނާފައިވަނީ މުބާރާތް ބާއްވާ ތިން ގައުމެވެ. އެމެރިކާ އާއި ކެނެޑާ އާއި މެކްސިކޯ އެވެ. އޭގެ ފަހުން ދުނިޔޭގެ ރޭންކިންގެ އެންމެ ގަދަ ނުވަ ގައުމެވެ. އެއީ ޔޫރަޕުގެ ޗެމްޕިއަން ސްޕޭނާއި ދުނިޔޭގެ ޗެމްޕިއަން އާޖެންޓީނާ އާއި ރޭންކިންގެ ތިން ވަނާގައިވާ ފްރާންސް އަދި ހަތަރު ވަނާގައިވަނީ އިނގިރޭސިންގެ އިތުރުން ފަސް ވަނާގައިވާ ބްރެޒިލާއި ހަވަނާގައިވާ ޕޯޗުގަލް އާއި ހަތް ވަނާގައިވާ ނެދަލޭންޑްސް އަދި އަށް ވަނާގައިވާ ބެލްޖިއަމާއި ނުވަނާގައިވާ ޖަރުމަނެވެ. މީގެ ތެރެއިން ބްރެޒިލް އަކީ ވޯލްޑް ކަޕުގެ އެންމެ ކާމިޔާބު ގައުމެވެ. މިހެން ކަމުން ވޯލްޑްކަޕުގެ ގްރޫޕްތައް ބެހިގެންދާނީ މި ޓީމުތައް ހިމެނޭ ގޮތަށެވެ. 48 ގައުމު ހަތަރު ކެޓަގަރީއަކަށް ބައިކޮށްފައިވާއިރު ކޮންމެ ކެޓަގަރީއަކުން ވެސް ކޮންމެ ގްރޫޕަކަށް ދާނީ އެއް ޓީމެވެ. ކެޓަގަރީތައް ބަހާލާފައިވަނީ އެންމެ ފަހުގެ ފީފާ ރޭކިންގައިވާ ތަރުތީބުންނެވެ.

މި ގޮތުން ދެ ވަނަ ސީޑް ނުތަވަ ދެ ވަނަ ކެޓަގަރީގައި ވަނީ ކްރޮއޭޝިޔާ އާއި މޮރޮކޯ އާއި ކޮލަމްބިއާ އާއި އުރުގުއޭ އާއި ސްވިޒަލޭންޑް އަދި ޖަޕާނާއި ސެނެގާލް އާއި އިރާން އަދި ދެކުނު ކޮރެޔާ އާއި އިކުއެޑޯ އާއި އޮސްޓްރިއާގެ އިތުރުން އޮސްޓްރޭލިޔާ އެވެ. ތިން ވަނަ ކެޓަގަރީގައި ހިމެނެނީ އަލަށް ވޯލްޑް ކަޕަށް ހޮވުނު ނޯވޭ އާއި ޕެނަމާ އާއި މުސުރާއި އަލްޖީރިއާ އާއި ސްކޮޓްލޭންޑާއި ޕެރެގުއޭ އާއި ޓިއުނީޝިޔާ އާއި އައިވަރީ ކޯސްޓް އަދި އުޒުބަކިސްތާނާއި އެންމެ ފަހުގެ ވޯލްޑް ކަޕް ބޭއްވި ގަތަރާއި ސައޫދީ އަރަބިއާ އާއި ދެކުނު އެފްރިކާ އެވެ. އެންމެ ފަހު ކެޓަގަރީގައި ހިމެނެނީ ޖޯޑަން އާއި ކޭޕްވާދޭ އާއި ގާނާ އާއި އެންމެ އާބާދީ މަދު ގައުމުގެ ގޮތުގައި މިހާތަނަށް ވޯލްޑް ކަޕަށް ކޮލިފައިވި މެދުތެރޭ އެމެރިކާގެ ކުރަކާއޯ އާއި ހައިޓީ އާއި ނިއުޒީލޭންޑެވެ. މި ކެޓަގަރީގެ ބާކީ ހަ ޖާގައިގެ ތެރެއިން ހަތަރު ޖާގަ ލިބޭނީ ޔޫރަޕުގެ ޕްލޭއޯފް ޗެމްޕިއަނުންނަށެވެ. އަނެއް ދެ ޖާގަ ލިބޭނީ އެހެން ބައްރުތަކުގެ ޕްލޭއޯފުން ކުރި ހޯދާ ދެ ޓީމަށެވެ.

ވޯލްޑް ކަޕް ގުރު ނެގުން އޮންނާނީ އަންނަ މަހުގެ ފަސް ވަނަ ދުވަހު އެމެރިކާގަ އެވެ.