ކުރިއާ އަޅާބަލާއިރު، މިހާރު ގޭންގު ކުށްތައް ހިންގާ މިންވަރު %23 މަދު: ދާޚިލީ ވަޒީރު

Read Time:3 Minute, 46 Second

(ފޮޓޯ ކްރެޑިޓްސް: ޕީއެސްއެމް ނިއުސް)

ދާޚިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިޙްސާން ވިދާޅުވެފައިވަނީ، ކުރިއާ އަޅާބަލާއިރު ގޭންގުތަކުން ހިންގާ ކުށްތައް %23 މަދުވެފައިވާ ކަމަށެވެ. މިކަން އެނގުނީ ސަރުކާރަށް ދެ އަހަރު ފުރުމުގެ މުނާސަބަތުގައި ޕީއެސްއެމް ނިއުސްއަށް ދެއްވި އިންޓަވިއުއަކުންނެވެ. ވަޒީރު ވިދާޅުވި ގޮތުގައި، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އިސްކަންދެއްވާ އިޖުތިމާޢީ މައްސަލަތަކުގެ ތެރޭގައި ގޭންގުތައް ހުއްޓުވުން ހިމެނެއެވެ. ކުރިން ގޭންގު ކުށްތައް ހުއްޓުވުމާ ގުޅޭ ޤާނޫނު އޮތްގޮތުން ހައްލެއް ހޯދުމަށް ދަތިތައް ހުރުމާއެކު، ފުރަތަމަވެސް ގޭންގު ކުށްތަކާ ބެހޭ ޤާނޫނު އިސްލާޙު ކުރެވުނެވެ.

ޤާނޫނު އިސްލާޙު ކުރުމަށްފަހު ފުލުހުންގެ ތެރޭގައި ގޭންގު ކުށްތައް ހުއްޓުވުމަށް ޚާއްސަ ތަޙުޤީޤީ ޔުނިޓެއް އުފައްދައި، މިދިޔަ ދެ އަހަރު ދުވަހުގެ ތެރޭގައި ކުރި މަސައްކަތްތަކުގެ ނަތީޖާއެއްގެ ގޮތުން ގޭންގު ކުށްތައް %23 މަދުވެފައިވާ ކަމަށް ވަޒީރު ވިދާޅުވިއެވެ. ކުރިއަށް އޮތް ތިން އަހަރު ދުވަހުގެ ތެރޭގައި ގޭންގުގެ މައްސަލަ ރައްޔިތުން ޤަބޫލުކުރާ މިންވަރަށް ހައްލުކުރާނެ ކަމުގެ ޔަގީންކަން ވެސް ވަޒީރު ދެއްވިއެވެ.

ރައީސް މުޢިއްޒު ވެރިކަމަށް ވަޑައިގަތުމަށްފަހު މަސްތުވާތަކެއްޗާއި، ޤަވާއިދާ ޚިލާފަށް އުޅޭ ބިދޭސީންގެ މައްސަލައިގެ އިތުރުން ގޭންގު ކުށްތައް ހުއްޓުވުން ހިމެނޭ ތިން މައިގަނޑު އިޖުތިމާޢީ މައްސަލަ ހައްލުކުރައްވާނެ ކަމަށް ވިދާޅުވެފައިވެއެވެ. މިގޮތުން ގޭންގު ކުށްތަކާ ދެކޮޅަށް ހިންގާ އިންތިޒާމުވެގެން ކުރާ ކުށްތައް ހުއްޓުވުމުގެ ޤާނޫނު ރައީސް ތަޞްދީޤުކުރެއްވީ މިއަހަރުގެ މެއި 25 ގައެވެ. އޮގަސްޓު 25 ގައި މި ޤާނޫނަށް ޢަމަލުކުރަން ފެށި ފަހުން ތިން މީހުން ހައްޔަރުކޮށްފައި ވެއެވެ. މި ޤާނޫނުގެ ދަށުން ގޭންގުތައް ކޯޓުން ކަނޑައަޅައި، އެ ގޭންގުތަކުގެ މެންބަރުންނަށް ބޮޑެތި އަދަބުތައް ތަންފީޒު ކުރެވޭނެއެވެ. މި ސަރުކާރުން މިކަމަށް ކުރާ މަސައްކަތަކީ ކުރިން ފެނިފައިނުވާފަދަ ހިތްވަރުގަދަ މަސައްކަތެކެވެ.