ރާއްޖޭގެ ޤަދަރު އުފުލި، ކުރިއަށްވުރެ ބޮޑަށް ބަސްވިކޭ ޤައުމަކަށްވެއްޖެ: ޚާރިޖީ ވަޒީރު

Read Time:3 Minute, 33 Second

(ފޮޓޯ ކްރެޑިޓްސް: ޕީއެސްއެމް ނިއުސް)

ޚާރިޖީ ވަޒީރު ޑރ. ޢަބްދުﷲ ޚަލީލް ވިދާޅުވީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުގެ ހަރުދަނާ ޚާރިޖީ ސިޔާސަތުގެ ސަބަބުން ބައިނަލްއަޤްވާމީ މައިދާނުގައި ރާއްޖޭގެ ޤަދަރު އުފުލި، ބަސްވިކޭ ޤައުމަކަށް ވެފައިވާކަމަށެވެ. މި ސިޔާސަތުގެ މައިގަނޑު އަސާސަކީ ރާއްޖެއާއި ދިވެހިންގެ މަސްލަޙަތު އިސްކުރުން ކަމަށާއި، ރާއްޖެއަށް ފައިދާހުރި ކޮންމެ ކަމެއް ކޮށްދޭ ފަރާތަކާއެކުވެސް ގާތްގުޅުމެއް ބާއްވާނެ ކަމަށެވެ. “މޯލްޑިވްސް ފަސްޓް ޕޮލިސީ” އަކީ ބޭރުގެ ޤައުމުތަކުންވެސް ބަލައިގަންނަ ސިޔާސަތެއް ކަމަށް ވަޒީރު ފާހަގަކުރެއްވިއެވެ.

ރައީސްގެ މި ސިޔާސަތުގެ ތެރެއިން ބޭރު ޤައުމުތަކާއެކު އޮންނަ ގުޅުން މިހާތަނަށް ދުވަހަކުވެސް ބަދަހި ނުވާ މިންވަރަށް ބަދަހިވެފައިވާއިރު، އިންޑިއާ، ޗައިނާ، ޢަރަބި ޤައުމުތައް އަދި އެނޫންވެސް ދުރު ސަރަޙައްދުތަކުގެ ޤައުމުތަކާ ސްޓްރެޓިޖިކް ގުޅުންތަކެއް ވަނީ ޤާއިމުކުރެވިފައެވެ. އދ. ގެ ޖެނެރަލް އެސެމްބްލީގެ ނައިބު ރައީސްކަމާއި، އދ. ގެ ހިއުމަން ރައިޓްސް ކައުންސިލުގެ ނައިބު ރައީސްކަން ރާއްޖެއިން އަދާކުރުމަކީ ރާއްޖޭގެ ޚާރިޖީ ސިޔާސަތުގެ ވަރުގަދަކަން ދައްކުވައިދޭ ކަމެއްކަން ވަޒީރު ފާހަގަކުރެއްވިއެވެ.

ރައީސް މުޢިއްޒު ރާއްޖެއިން ބޭރަށް ކުރެއްވި ހައި ލެވެލް ސްޓޭޓް ވިޒިޓްތަކާއި، ބޭރުގެ ލީޑަރުން ރާއްޖެއަށް ކުރެއްވި ދަތުރުފުޅުތަކުގެ ތެރެއިން ރާއްޖެއަށް އެންމެ ބޭނުންވާ އެހީތެރިކަން ހޯދައި، އިޤްތިޞާދު ހަމަމަގަށް އެޅުވުމަށް މުހިންމު މަސައްކަތްތަކެއް ކުރެވިފައިވެއެވެ. މީގެ އިތުރުން ފަލަސްޠީނުގެ ހައްޤުގައި ރާއްޖެއިން ބައިނަލްއަޤްވާމީ މައިދާނުގައި ކުރަމުންދާ މަސައްކަތްތަކަށް މުޅި ދުނިޔެއިން ތަޢުރީފު ލިބެމުންދާއިރު، ރާއްޖެއަކީ ހަމަޔާއި އިންސާފަށް ލޯބިކުރާ، އިންސާނީ ޙައްޤުތަކަށް ވަކާލާތު ކުރާ ޤައުމެއްކަން މިކަމުން ދުނިޔެއަށް ސާބިތުކޮށްދެއެވެ.